ZOGAMNOMICS

Gelhtu- G.Khamkhokam


Pathian in Zomite adingin Zogam Ak mai chia bek khovel zapi sungah pia a, Zogam lou ngal koimah ah mun leh mual nei lou uhi. Zomiten nam dang alian zaw leh changkang zawte sumsinna hiin, siamna tuamtuam ah elpha zou lou ua, tua hangin Pathian in apiak gam sungah- Zogambek ah nekzawnna tuamtuam ah lam-et ding nei uhi. Delhi hiam, Kolkata, Yangon ah hiam ahihkeileh, Marwarite hongkipatna Rajasthan hiam ah sumsinna ah kuamah va compete zoulou ua, tup zawng tum zoulou uhi. Tua hangin amau gam ding a Pathian in apiak sung ah thilbang kim nekzawn theihna peuhpeuh a pumbilh uhle zawng ahi ding mah hi.

State leh Centre Govt ten down sizing thupibawl ua, kaam sepding tawm hiai hiai a. Solkal nna a semsate zawng pension in tampitak potta ua, tuate mun luah ding / thakhek ding mithak, sepna muthak om lou hi.Huaiziakin, tunung hunsawt lou chiangin Zomite lakah Govt nnasem tawm mahmah ding a, tua hun chiangin Zogam sum leh pai dinmun nakpitak in kise ding hi. Tua hun chiang in Saptuam thohlawm leh sawm-a-khat a kingate leh pawlpi khenkhatten sum-leh-pai ah haksatna lianpi tuak ding ua, tua a dinmun uh sanga neu zaw leh niam zaw a a kiseek neu(down sizing) uh ngai ding hi. Saptuam leh pawlpi khenkhatte pukse gawp zawng om ding uhi.Tua hun ding a kisak kholh hunta hi.

Zogam ah development fund lutloua, develop zawng develop bawk lou hi.Thilbawl khiatna(Industry) gentham ding omlou a,mun tuamtuama sepna neiten a thohkhawm uh,Zogam economy suak hi. Zogam economypen Money Order economy ahi chile hang suallou ding hi.Tua hitaleh, tua sepna neite abei chiang ua bang chita ding? A mihing phazah / population et in Zogam ah industry lawhching taka phuhkhiat naang gamla lai hi. Huai hun I tun ma un sangtampi mualliam in –khangtampi duhthusam bekbek toh hingin milohsam sihin si in mangthang ding uhi. Bang ilohta dia le? Hiai dawtna don naang om sun hiai hi- Zomiten akhe ua adin theih naang uh angaih tuah uh ngai hi.

Zogam akhe a adin theih naang a pan lak theihna omsun khenkhat anuai a bang ahi-

(1) SUMSINNA(Bussiness)

(2) KIKAWMTUAHNA(Communication & Transportation)

(3) NEK-LEH-TAKA KITOUDELH

(4) INDIA LEH MYANMAR GAMGI A KISUMDON TUAHNA- Behiangzang ah

(5) GAM LEH SUMSINNA LAMPANGA KIHUMBITNA(6th schedule)

HIAI ATUNGATE NGENTEL ZAW DEUHIN ANUAI A BANGIN SUILE HANG:

(1) SUMSINNA(Business): Dawrkai/Sumbukbawl leh sumsin ichih hauhsakna bulpi hia, gamsung sum leh pai dinmun ki ngakna lianpen hi. Sumsinna in laisiam nnasep neilou tampite sepna guan ding hi. Tua hangin, aneulua alian lua om lou in –lamkianga pandukan apat dawr lianpenpentan a Zogam sunga sumbuk bawlna khempeuh Zomite khuta a om ding hi. Zogam lou-ngal koimah ah namdangte Zomiten compete phalou ding hi. Huaiziakin, Zogam sung a bawltheih septheih om tengteng lak vek Zomiten a tup ding uhi(by merit, of course). Tualou in, mipiten zawng Zomite mah va dawl lehang, aziak banghiam I chih leh Zomi sunga sum lut te mah Saptuamah hiin I pawlpi tuamtuam ah lut hi. Namdangte dawra van nalei teng in- Zogam sum State dang ah leeng khia hi chih mang ngilh ken.

Huanah, Zomi laisiamten zawng sumsinna lampang hahtakpi a akisin ding uh hi a, sumbawlna tawhkisai a ngaihdan thak,customer service leh tulai a namdangte accounting system hoih penpente kizil a, igam ua laklut I tup ding uhi. Sorkal nnasep ding om non lou a, business lampang a khovel pai ahi chih mang-ngilh kei ni.Hiai khovel chindan tawndan kikhek khek ah, thilthak a hoihlam bawh baih thei comunityte tungnung ding uhi. Huanah, thuneihna zawng a sumhau community te khut ah om ding hi.

Bangziaka Jews tomkhaten USA sorkal, a utna lamlam uh ngasak a, a ut lamlam uh gensak thei uh hiam ichihleh, Jews sumdawng hausate ziak ahi hi.Vote zawnlai in Jews sumdawng hausaten Candidate te sum-leh-pai in vuk ua, election zawh chiang in elected memberten Jews sumdawng hausate deihdan in policy decision bawl uhi. ‘Ka nungthak hong khuatsak inla, tua zohchiang in nang nungthak zawng hong khuat sak ning e’ chih bekbek in khovel pai hi. Sawisel (complain) in omzia nei lou ding hi.

Bangziaka tuni a India gam sunga English hichituka kizang hiam I chihleh England apat sumdawng pawl khat East- India Companyte ziak hi. Sumsinhat leh lawhching ten a pau-leh-ham, culture leh a minam ngaihdan uh thehdalh nasapen ua, hiai in nation building ah munpoimohtak luah hi. Nang sumdawng a na kipei kei leh minamdangte sumdawng ding ua,chikchiang hiama nang hiam, natate hiam ahihkeileh na tute assimilate a om ding uhi.

(2) KIKAWMTUAHNA(Communication & transportation): Zogam sunga kikawmtuahna lama sum muh theihna tengteng Zomite khuta a om ding hi. Etsakna dingin Lamka ‘to’ Imphal, Dimapur, Shillong, Guwahati, Aizawl etc leh Lamka ‘to’ Singngat, Thanlon, Parbung area leh Hiangliap area etc te hi sumsinna lian pi ahia, hiaite control hi Zogam economic leh politics adia thilkul petmahte hi. Hiai kikawmtuahnaten Zogam nungak leh tangval tampi employment pe ding hi.

(3) NEK-LEH-TAKA KITOUDELH: Zogam abiiktaka Lamka zang hi singtangmite teenna muntelaka gamhoihna penpen mun ahi chile hang khiallou ding hi. Tuahang in, Lamka a tengte namdangten loua haichi –mehding neng neng a, avaak/chawm uh pen, ngaihdam theihlouh khelhna hi. Zomiten gam ombangbang lou hiam huan hiama neih a, abiiktaka meh ding anteh louhing a a kitoudelh ngeingei ding uhi. Mahni sanga hausa zawte sepkhiaksa a ki-ngaka , sum neihsunsuna mehding nengneng anteh lou hing namdangte sepkhiaksa lei a,huai a kingak akin theipena tawpsan ding ahi.

Zomite ipi-ipute au pat mi thanuam leh nnasep peihte I hi ua , namdangte sepsa a ikingakna uh tunai chin hi. Hiai bang chiindaan hoihlou akinthei bangpena I topsan uh minam leh gam dam naang bulpi hi.

Zaanglou/tuilou leh mahni huang(compound) neih bangbang bawla buh-leh-bal, mehding anteh-louhing a ikitoudelh uh minam damkhosuah naang a kul takpi hi.Zogam sung himhim koimun peuh haichi in a ngeihlouhna omlou ahih ziak in- akisam om sun hi thanopna leh taimakna chauh hi. Zomite pupa akipan minam thanuamte I hi ua, huaiziakin sem in bawl le nei mai ding i hi uhi. Haksa lou hial hi. Huanah, mahni khuta nnasep ichihpen mahni sum-leh-pai dinmun adia aphattuam banah mihing lungsim pichiin naang a apoimoh khat ahihdung zui in, khuta nnasem peihlou minam khovel koimahah damkhosuak ngei lou uhi.

Huanah lou neihnaanga munhoihpenpente inn mun dinga I hawmhawm uhpen ikisik hun uh awm dingin um ing.

(4) BORDER TRADE-BEHIANGZANGAH : Govt of India in Myanmar leh India tohkala border trade neih naang in mun nih telta uha, huaite Moreh(Manipur) leh Champhai/Zokhawthar(Mizoram) te hi. Zokhawthar apat lamlian omsa omlou ahihchiangin, India solkar in hiai boder trade lohchin theihnangin Myanmar sungah lamlian lai tawm hi.

Lamka –Teddim lamlian pen Japan gallai apat omsa hia, hiai a omsa a border trade bawllou a, lamlian omloupi laitawma, border trade Zokhawthar achih khawng ua a bawl pen uh, Behiangzang-Teddim border trade zang phatuam ding Zomite political- light ziak hi a chi om uhi. Dik dingin zawng um ing.

(5) LAND & TRADE PROTECTION : Tribalte gam humbit naang India Constitution ah na tuangkiau a, tribalte laka anachang theite leh State solkar tribal deihsakten tua daanna zui uhi. Norht-East India State teng Manipur chihlouh State dangtengphial in hiai dan zangin tribal gamna humbit ua, tualou in hiai dan zang/nei ten a bial sung ua trade licence zawng control uhi. Hiai dan in hon humbit kei leh border trade hiin thildang ah hita leh singtang mite damkhosuah naang om tuanlou hi.

A na chang thei I om uhia? I theih leh theih louhlam hi loua, nam leh gam adia itaimakna uleh i principle, i integrity te un daih lou zawng hi thei hi.Huanah, I dinmun uh bawl hoih naanga sep-leh bawl leh tawmkha thuakzek ngaite, sempeihlou leh thuak/inconvenient peihlou minam I hihleh Zomi a pian hamsiatna sukding hi.Khovel ah a sempeih leh thuakpeihte mah dinmun hoihpen zela, van-gam ah zawng khovela a sempeih leh thuak peihte mah in hinna manglukhu ngah ding uhi. Zogam leh Zomite dinmun namdang in hongbawlhoih saklou dinga, Zomite khut bekbek ah kinga hi.