Nu naupangchik khat in hiai damsung Lampi zui ding in kisa hi.
‘Hiai lampi a sau hia?’ chi in mi kiangah donga.‘A sau a, zuih leng a haksa a; atawp na tun main na kumte tamin na teek dinga.Ahihziakin, abullam sang in atawp lam ahawih zaw ding,’ chia hilhin awm hi.
Bangteng hileh hiai Nu akipak thotho a,tukum sang a kum hawih zaw awm ding in leng akineem kei hi.Huai Lampi a apaikawm in a tate tawh akimawl a,lamkianga pakte alo ua, lamsak zotui siangkilkelte dawnin akisil ua, ‘Hiai sang a nuam zaw awm ken teh maw’ achi hial uhi.
Zaankhua hawngmiala,huihpi hawng nunga- vuahpi ahawng zu a, apaina lampi uh amiala, a tate lau leh vawtsa in aliing keuhkeuh ua, a Nu un atate a aang ah akawi a, apuanza azawn a.A taten ‘Nu, nangna awm a ka lau kei uh’ achi uhi.Hiai Nu in ‘Tuni, ni hawih hina maizen e,ka tate haangsaan dan ka sinsaka,’ chi hi.
Zing khua hawngvaka, amaban uah taangsaangpi a awma, huai taang ah akahto ua, a tate ahawng gim ua, a Nu uh ahawng tawla, ahihziakin a Nu un ‘ Neukha pailai le huaitan tung ding’ achi to zela. Huai taang saangpi hawng kahto/ lawnto zelin, atawp in taang dawn hawng tungto uhi.Taang dawn ahawng tun un ataten ‘ Nu, nang awm lo hi le chin hiai tantan kahto zo lo ding hi unga’achi uhi.
Zaan ahawngtung nawna, a Nu un alupna tunga pan angaihtuah chiang in alungsim in ‘Tuni, nidang sang in hawih hina e,ka tate haksatna a tuah chiang ua lungke loa pan teitei ding ahihdan ka zilsaka, zaan niin haangsan dan kasin saka-tuni in hatna,kuhkalna leh thuak-hatna ka sinsaka’ chi hi.
Azing nawnin a taten chikmaha amuh ngei loh uh meipi lamdang tak; sa-leh-gala ki-etna,huatna, hiamgamna leh sisansuahna a dim, kidona meipi in ateenna gam uh ahawn tuam kimvela,a tateen paina ding theilo in huai meipi mial nuai ah mabaan amai pawmpawm ua, aki suipai ua.Himahleh a Nu un ‘Tunglam a Vak kiu kiau en to un’ chi hi. A taten tunglam a ento ua, huai meipi vawm ngeingawi tung a Tangtawn a Vakna amu ua, huai Vakin ama uh piin meipi khen lamah damtak leh bit takin api galkai hi.A Nu un ‘Nidang tengteng sangin tuni ni hawihpen hiin ka thei- aziak tuh ka tate Pathian kamu saka’ chi hi.
Ni leh khate hawng pai zelin, kumte hawng thak to zela, a Nu uh hawngteek in kun kheukheu in ahawng pai a. Hunte apai dungzui in a tate ahawng lian ua, adinte uh hawngsang in, hattak leh hangsan takin kalsuan zaangkhai takin malam anawt ua.Lampi ahaksat chiangin a Nu uh apanpih ua; a Nu uh abah chiangin – adawm ua. Ahawngpai zel ua, atawpin lamtawp hawng tungta uhi. Adinna uh taang tung apana a et chiang un huai Luigal lehlam a Lampi Vak leh Suangmantam Kawngkhak kihawng agalmuh uhi.
A Nu un ‘Ka khualzin tawpna ka tungta a, tun zaw atuung sangin atawplam a hawih zaw chih ka thei chianta ve, ka tate- kei tello a- atasawn atusawnte utawh- kasul nung zuia, huai Suangmantam Kawngkhak manawha pai daan ka sin sak a’ chi hi.A taten ‘Nu, huai Kawngkhak a nawn lutsan nung chiang in leng nawn sinsak nate ziakin ka kiang ua awm gige bang in kawn thei thotho ding uh’ chi uhi.
A Nu uh pialgal kai a, Suangmantam Kawngkhak aluut agal-et ua, a taten ‘A mel mu nawn kei mahle ung ka Nu un ka kiang uah hawn awm pih tawntunga, ko Nu bang nu zaw lungsima theih gige mai hilo in ka lungtang uh sungnungpen suangpek a gelh bang ahi’ achi uhi.
Gelhtu- Temple Bailey
Zokam a lettu- G.Khamkhokam
Subscribe to:
Post Comments (Atom)
2 comments:
Nute itna hoihtak a hilhchet na, Haksa chiteng thuak le uh leng NUTE'n Tate a ding thil ahih nak leh IIT nei lo, haksa teng tuak ngam chih i theih sa uh himah leh hiai ka sim apat in Nu leh pa itna a letdan hon hilh chian diak in ka thei e.
Hiai lehkhabu min hon gen sin mah ve maw?? Ka na sim ut tei. Eipau a na hon leh dan leng a nalh mahmah a, pau lam ah na hauhsak na hong dawk diak hi. Simnop law mahmah
Norman Vincent Peale Laibu " Treasury of confidence and Courage" chih bu apan ka laak hi. Peom leh short story leh bible verse tuamtuam alaak khom, i discourahe chiang a sim ding, i daily life a phatuam ding thu tuamtuam koih khomna bu ahi. A original title " A parable about mothers" chih ahi. A bu a page 225 na ah a om ding.
Post a Comment