SIHNA ZAWHLOH ZOMITE ITNA

BY- KHAMKHOKAM GUITE

(Zomite itna leh sihnung thu-gin Pu K.Vungzalian leh Ngambawm hinkhua pan suina)

“ Aw malbang hon kouta nung chia
Zalai lawibang I than man maw
Sing dang siangah saan mun na muang”

Hiai Laphuaktu, Pu K.Vungzalian pen Lamka khuapi a milun khat hi a, a-sep-a- bawl teng khempeuh khawtang in gen nuam sapeuh mah uhi. Tangval chethei leh tal-lang mahmah hia, nitaak a aleenglatna, anungak helna teng azingchiangin nungaktengin theithei zel uhi. Tuachihnaklai in, namdang nungak tawh kingai zawng uh ahih chiangin, luikhuk ahleh Zenhang Bazar suktengah genchimtheilo uhi.

“Ngilhni tuang hongtung thei ding hiam
Na tun tong suah kasinlai ah
Melmak sing ang saumunna muan leh
Kha na pham ding chi a tong chiam
Kha na pham sang gibang khenni”.

Tuabanga kithanga, miteng gengen ahihlai un a ngaihzawngnu Nu in “Melmak sing ang saumun na muan leh/ Kha na pham ding chi a tong chiam”, “mi dang - namdang tawh nakiten peuh mah leh si ding na hi” chiin a tanu vau hi. Hiai a nungaknu Nu kampau Pu Lian in nnasa lua mahmah ahihchiangin ‘chikmahchiang a zawng mang-ngilh lo ding hi’ng’ chi hi. Tua nungaknu pen a Nu leh Pa’n pawmang uh a, Pu Lian in sam vawngvawngin ‘Mal bang ko ko’ leh zawng kohphak leh sap phakin awmta lo hi.

Itna in itsiikna, hazatna leh thikthusia kengtel a. Tangval khat adingin angaih zawngnu mi dang zi hi ding a, mi dang ang a lum a, midang tanu-tapa a gil a paai ding chih ngaih ngam huailo penpen khat hi. . Tampite ngaih danin “ ken katan khak kei dingleh, si zaw vet leh himai’ chih hi a. Himahleh, hiai La phauktu in, a nungaknu itna diktak in it hi.

Apostle Paul in Itna hichi bangin hilh chian hi “ Itna neite a lungduai-in migi hi, itna aneite in amah angsung kia khual lo hi, itna neite in hazatna lungsim nei loin, zong kisathei lo hi…..’ chi hi. Pu Vungzalian itna in amah angsung kia khuallo a, haza lo bawk hi. A itpen asih saangin, nungta in damleh chih deihsak zaw hi. Huaiziakin, it tak leh duat takin ‘singdang siang a sanmun muang’ dingleh ‘vawn zatam tawi’ dingin “ Kha na pham sang gi bang khen ni”, na sih sangin kikhen ni” chiin kha khia hi.

“Phamna kul sin i tuah nung chia'n
Thangvan ah dawn bang ki tuakni
Tua ah khenna om lou chi uh
Heisa bang in i paal khawm dia
Nun khat in aw luai ton tani"

Zomiten Pu leh Pa apanin sihnung lam-etna ki nei hi. Kristian sahkhua Zomiten ahawn zuih chiang un huai thu-gin hawnpawm kip in, Kristian sahkhua in hawn namkip nawn hi. Khupching/Zawlciing leh Ngambawm tangthu ah enta le hang.

Nidanglaiin Nungak leh tangval ki ngai mahmah Khupching leh Ngambawm awm uhi. Tuachi banga a awmlai un damlohna ziakin Khupching hawng si hi. Khupching khawten a hankuang ding teh detdet in bawl uh a. Khupching siluang tua hankuang a ahawnsial dek chiang un tazolo hi. Huchi bang a beidawngtak a a awm nung un Ngambawm panpihna va ngen uhi. Ngambawm zawng hawng pai in Khupching siluang kiang ah “ Ching aw, ikimuh tawpna hi kei in teh nana ki neu sak in” chi in ngen hi. Tua chiangin, Khupching hongki neu sakin hankuang sung ah hong ta hi. Khupching honvui dek chiang un, a han khuk ding a a leitawh uah talo nget hi. Ngambawm in “ Ching aw, na kineu sakin iki muh topna hi kei in chia” achih chiangin Khupching hawng kineu sak in vuizo thei hamham uhi.

Tuakia hiloin, Ngambawm pen, Khupching tenna misi khua ah vahawh hi. Khupching kha-mi hia, Ngambawm pen sami-hinna a hing mihing hi. Huchibang hindan kibanglo takte kalah haksatna, counseling in zawng abawl lem theihloh; itna lianpen in zawng azut man theihloh, kha-mi leh sa-mihinna ahing kal ah hakkawl kibang puak hawnghaksa a. Khami Khupching pen khawvel mihingte bangin ‘Time and Space’-hun leh mun in atungah vaihawmlo a, amah a utpeuhleh huihtawh leengin tunglam a meipite tawh kimawl in kithawh thei zel uhi. Sami hinna a hing Ngambawm bel vuah a thuak zek chiangin zawng Hitaang khawsik in a nap peuh tawlh nilhnelh thei zel hi.

Khalam hiinkhua ahing Khupching a ding a, vawmpi/savawm te, Sami hinna a hing Ngambawm adingin Lungmul maimai hia. Khupching a ding a ngasa/sa-nga chi a, zawlkelkel a meikiang a ahai miinte, Ngambawm a dingin mau-nah/gaw-nah maimai hia, Khupching em banga meikiang a a em chiangin kangtum zel hi. Misi khua a teeng Khupching Innkatau/cialdawh, Telhawng kung a bawlte Ngambawm in asik khak chiangin, kichim in zan gawp zel hi.

A tawp a tawp chiangin Zawlciing in Ngambawm kiang ah “ U Ngambawm aw, ki it in ki ngai tawkmah lehang zawng, awmkhawm thei nailo hi hangin, khawvel ah vachiah kik nawnphawt inla, kei bang a na hawng sih sam khit a, misi khua a nawng pai chiangin - kei banga khami nahawng hih sam chiangin zaw ‘tuanglam nihka luitui bang gawm ni’” chiin ki khe-lahtak leh maban liimchitak tawh khawvel ah hawn sawlkik hi.

Tuabangin, Neino tangthu leh Vanlengtanu thangthu ah zawng sihna pan a damkhawsuak, sihna zawhloh itna gending tampi tak awm hi. Huaiziakin, Zomite itna pen khawvel ah gawlpen a, a tawngtung itna hi. Romeo leh Juliet te itna – sihna in a khentheih itna pen Zomite itna tawh tehpih taaklo leh tehpih thamlo hi.

Tuachi bang a, itna sihna in a zawhloh leh itna tangtawn daih nei minam sungpan a khang khia Pu K. Vungzalian, Bible in “ Itna neite lungkia chih om ngei lo hi” achih bangin lungkia in beidawng mai lo hi. Teisiangtang apan a itna mit a en a, itna kha a aleen chiangin Thangchiingtang in liahzolo a, Leentang in dalzolo hi. Tuitha Lui leh Gun Lui(Maha Chiautui) ah Lei dawh ngailo hi. Mangkangten, ‘Khitui a kainiuniau mit ten van-gam zawng muban hi’ chi uh a. Pu K. Vungzalian lungsim a kikhawl khawm,a mit a hawnglet khia mit tui ten a sanneemno awmna mun leh khawsakna teng lungsim suangtuah nain akiang a awm bang in musak hi.

Tangval lungzuang Pu Lian in, Inn tung a Kawlgit nu-pa tuang khawm a, ding khawm hilhelte amuh chiangin a lungleen kaitho a, theipi nun a theipi gahkhawm a kaikhawm hilhelten taangkhat ahihna phawk sakden hi.

Mihing a piangpeuhmah chikni hiam chiang a si ding ua, tua mahbangin a ngaih zawngnu zawng si dia –amah, Pu K. Vungzalian zawng asihni awm ngei ding hi chih Pu Lian in thei hi. Hi e, Ngambawm leh Khupchingte pen asihkhit chiang un Misi khua zuan uh a. Pu K. Vungzalian bel Misi khua a pailoin Thangvan ah a itpen tawh kituak ding a paito ding hi chih thei chian hi. Hiai theihchetna in, Pu Lian neem a, tangkhat akisaknate, a lungzuante a thuak nuamsak a, alungsim zawng chidam sak hi. Hiai khawvel ah a itpen tawh kikhen mah le uh Zawlciing leh Ngambawm kinepnate in amah Pu Vungzalian zawng lametna pia a. Hiai lam-etna in Pu Lian zaan chiangin khim ihmu a, zingkal in kaitho a; hiai lam-etna in sun nitum in tha pia hi.

Pakte pak-huanah pak-khawm uh a. Huihin amut chiangin kihet kha hialhial in, apakte uh kimai tuah in nui siusiau uh hileh kilawm in awm uh hi.Theipi kungten a gah na’ng nun/hnun nei ua, tua a nun ah a gahte kimat chitchet in gah uhi. Pu K. Vungzalian in a itpen tawh van-gam ah pakte pak-huan a apak khawm bang un leh theipi gahte bangin a itpen tawh kiimatchitchet in nunkhat ah luaikhawm a, gahkhawm dingin kineem hi.

Hi e, Van-gamah kikhenna awm nawnlo ding a, a tawntung in nunnuam in, lungdeih tawh ngabang leng denta ding uh chih in Pu K.Vungzalian neem hi. Tu niin lungsim suangtuahna khawvel ah langmilmial in Pu Lian in mu mahleh, huai hun chiang in zaw kimai tuah in hita ding hi.