Thursday, July 1, 2010

PATE NI A SERMON

By – Upa G. Khamkhokam

Tuni a Pate Ni I zat un khenkhatte a dingin hun nuam taka hi thei a. Himahleh khenkhatte adingin hun nuamlou leng ahi thei bok a. khenkhatte’n na pate uh toh tengkhawm napi a na pate uh theicianlou leng tampi na om thei ua.

Pa giloupi leh mivuak hattak nei khate adding bangin Pathian bang leng Pate bang a ngaihtuah thil haksapi ahi thei a. New York a pastor khat in tuh a saptuam ua Toupa Hon Sinsak Thumna bang leng “ Ka pa uh vaan a om’ cilou in “ Pathian vaan a om, ka pi bang a hon it’ ci a kheng ka hi uh aci a. Aziak ahihleh, huai saptuam memberte pate kha inn a om ngeilou, mivuak hat, phunciak lua khong ahih ziak uh ahi a. A pi te un it pen a akitheih ziak uh ahi a. Huai ziak in, Pathian’ pat bang a ittu bang a pomhksa sa uh ahi hi.

Tampite nekzonna a lohcing bang, a polam et a nuamsa huntawk a kilang bang leng, kuamah muhphaaklouh leh theih pihlouh in sung-gil ah a pate uh toh kal ahoihlouh ziak a nuamsa hetlou gaalguuk dou gige bang leng tampi a om ua. Khenkhatte a pate un itlou a kithei a lungsim sung gil a ‘ahawm’ khat toh hankhuk a alut dong ua lungsim na vilvel gige bang leng om thei uh hi.

Tapa Taimang Tangthu

Khenkhatte’n Tapa Taimang Tangthu icih uh hih ‘ Na Ngak Ngiitngeet Pa Khat’ cih zawk ding ahi aci ua,khenkhat leuleu in lah ‘Unau Nih Tangthu’ cih zawk ding ahi aci hial uh hi.

Bangteng hileh, a tangthu hici bang in genta le: Nikhat tangvalnou khat apa kiang a vapai in ‘ pa, sikhin bang in kingai inla, tuni na sihni zingciang dan in koih inla, na gou kei tan thouthou ding teng tun honpe ngal in. tua deih ngal ka hi. Sum tampi nei ut ka hi, sum nei leng nuamsa ding a kigingta ka hi’ va ci hi.

A tapa ngetna bang in apa’n a gou tan dingteng a sumtang a pia hi. A pa thil hih hoih leh pil huai ahi de aw? Apa’n bang dia ‘ ngak deuhlai in’ cilou ahi ding? Khenkhatte’n a tate uh ahoih na’ng uh ahihkhaakleh ci in hostel khong ah koih ua, atapa/tanu uh a ding a hoih ding a agintaak uh, sum tampi a senna bang uh na hoihlou mai mahthei hi. Pastor khat in le ‘ka tapa 17 mi in ka lomte toh inn luah a om ka ut’ aci a, kou leng anu toh kum huaizahvel ka hihlai un laizil a inn nosia ka hihciang un, mahni kitoudelh kizilna leng hi ding hiven ci in a ut bang in a tuam in inn ka luah sak ua, tu kum 20 nung in ka tapa un ‘bang dia huai lai a atuam a non om sak’ ci in hon phul den ahi’ aci a. huai a tapa uh kristian leng hi hut nonlou mok hi!!

Hiai tapa taimang hih a va omna lam a a lawm thulimloute toh kikhawl a, numei hoihlou teng toh party nei gige khat uh hi mai thei hi. A inn vengte un thei vek, ahihziak a a nu-le-pa in thei na nungpen leng hithei uh hi. A hilh sunsunte’n leng ‘na naupa uh a omna lam a ‘a cepui thei khop mai’ ci henghang cauh uh leng hi thei hi. A pa’n koilaia hihkhial kha ka hita mai zen a, ci in kisikna leh zumna in pum dim mai thei hi.

Hiai tangval in khual gamla a a omna ah zillai hoihtak va zil khia a. a sum teng va zang gai a, huan ah sum neihlai a lawmte hih lawmtaktak ahihlouh lam va zil khia hi. A gilkial mang bang in, Judate adding a a utlouh penpen uh vokva khoi a, vok an neek khong va lung-gulh ngoihngoih hi. Huai vok kul apan in hong halh khia a. A pa kiang a athu gen ding teng hon ngaihtuah in apa siahlohte khat bang a om van ngen dingin hong kisa a. Gilkial tak kawm in inn lam hon zuan hi.

A pa’n niteng in ‘ka tapa ahong kik de aw’ ci a a hongpaina ding lam na en gige hi mai thei hi. Huai ziakin, gamlapi hong tuna pan in apa’n na gaal muh pah hi. A tapa a gaal muh in puteek e cilou in atapa delh in tai ngal hi. Huai hunlai a mite puteek taingeilou uh hi. Puteek a ding in tai hih thilkilawmlou in ngai uh hi.

Atapa in a pa toh akituah ciang ua a thugen dinga akiginna bang hon gen mahleh apa’n theiphalou hi. Atapa pom in na tawp tonton hi. Atapa hong kikna zin buai kei a, hong kik a dam a akimuh ziak un a lungkim hi.

Toupa Jesu thuhilhna a thupipente lak a khat hih mikhialte ihihlai un leng Pathian in hon it hi cih ahi a, hiai tangthu apan in atapa bang cituk in khial mahleh apa’n na pom in a khelhnate ziak in atapa na niallou hi cih I mu hi. Huai mahbang in I khelhnate toh, I ciinlouhna te toh Pathian zong le hang, Amah honna muak dingin kimansa gige hi cih I mu thei hi.

Apa’n zung buh, puan-ak hoih penpente leh khedap honla ding in a sikhate hilh ngal a, bongnou thau gou ding in leng thupe ngal hi.

Hiai tapa taimang in apa tuak masalou in a u pa tuak masa leh bang aci ding???

Hiai tangthu a apa pen mohsak thil kilawmlou bang mahleh, apa mohsa tale hang; bang dia apa’n a tau pa pen inn a thumang tak a om hiathiat pen pahtaak dan siamlou ahi ding? A thulimlou leh tate lak a tuantual pen a ding a hun tamzaw zat hih thil om thei leh thil om sek ahi a, ahihziak in, a thumang a thanuam a nnasem pen mang-ngilh/neglect khaak theih ahi a. A thumang a cih nuampen in kisuang lahtak a ahon ngetna ngai khoklou a, a genhakte leh phunciakte nget teng piak pahpah thei hi thei ahi a. Huci bang a hiai tangthu a a upa mahbang a lungsim guuk a a felte khase velvul a koih khaak theih ahi , cih leng I zil khe thei hi.

Huai ziak in, pa na hihna a lohsam nakisak a, lungsim naa velvul a na om ciang a na theih ding ahihleh;
a) Hun paisa na kheek thei kei, ahihziak in ngaihdam ngen inla, hun om lel leh hun hong tung ding subuai sak ken,
b) Ase zawng a mahni siat theih na’ng khop a mahni moh kisakna neihlouh ding ahi, ase zawng mahni kimohsakna leh a hoih zawng ding a mahni kibawl phat tupna toh mahni hihkelhte et ding ahi,
c) Hun paisa a natate toh nang hih khelhna te ziak a kisiatna na neih uhleh, ngaihdam ngen in hun hong tung ding a pata, nuta’ kal a kingaihnatna hoih zaw neih na’ng in mala in.

Tuni in tapa taimang hiam, tanu taimang hiam, nu taimang hiam, pa taimang hiam ngaihdam ngen a Pathian innkuan sung a om ding a hong kik non a om ziak in, hiai tangthu a I muh mah bang in, vaan ah Pathian in ‘party throw’ mai thei hi.

Pa bawl ding, lam ding hita leng: Hebru 3: 4 “ Ahang bel, inn peuhmah mi khat tei’ lam ahi a, ahihhang a, bang kim lampa bel Pathian ahi”, cih I mu hi.

Pathian hih thil hoih teng lamtu ahi a, pa hoih bang leng a lamtu ahi hi. Tu Pate Ni I zat un, pa khat kem lamdekta leng, bawl dek ta leng, ka duhthu sam kon gen himhim ding hi.

1. Pa lam dek ta leng, pa lung duai/pa thuak zou ka lam ding.
Ka tate tung a ka lungduai louhna, ka kisik mahmah khat kon gen dia: - Ka tate a neulai un tangthu ka hilh dek ciang in a kilawp thei mahmah ua. Ahihziak in ka mai a tuding akituh sek ua. A hong kinak ciang un, thubuai la buai phelh mailou in, na kinak ziak un thangthu leng hon hilh kei ning ci in kei a pa pen kana nuak sek hi.

2. Pathian miitna nei pa ka lam ding
Konelia sepaih za heutu hi a, hun neilou ding a buai mahmah ding hi. Ahihziak in, Pathian miitna nei azi leh tate lohzou hi. Nasepte 10: 1- 3.

3. Itna hau pa ka lam ding.
“ Kumpi pa a liing a, kongpi tunga inndan ah a kahtou a, a kap hi. A pai kawmkawm in: Ka tapa, ka tapa Absolom! Nang sikin kei si zaw leng maw. Absolom aw, ka tapa, ka tapa! A ci a.” 2 Samuel 18 : 33.

Kristian Pa

Kristian pa ka neih ka kipak mahmah,
Hon limsak a, hon awlmoh a, hon hehpih hi.
A hehpihna khut leh a aw men takte,
Ka thei khe zelzel hi.

Na nungchangte kei nungchang ah a belh den a,
Na hon thilpiak thupi pen tuh -
A thu a non hilhte sang in,
Ka muhtheih a etton ding non piakte ahi.

Pate kia in a hihtheih ding uh thu hoihte,
Nang a kipan in tampi ka sin hi.
Kei a dingin makaitu na hi a,
Ka tuna ding ngimna hoihtak non pia a.

Pathian in pa laklak ah a hoihpen honna telsak ei ve,
Hicibang a ahoih tawmcikte lak a khat,
Huaiziak in Pathian kiangah hiai ka ngen hi,
Kei leng ka pa bangin hon bawl in, ci in.

By – Larry Howland.


Thu Khitna: I topna ding in, hiai a hong kikhawm pa hilel, pa hong hi dingte leh pu hit ate tengteng hong ding unla, k’on thumsak dia:

1 Korin 3: 7 “ Ke’n haici ka pawi a, Apollo in tui a buak a, ahihhang in, a khangsakpa Pathian ahi”.
Mihing in bang teng gen in tum mah le hang Pathian thil teng lampa, thil teng khangsakpa, tupte lohcing sakpa kiang a ngetna thum na I nei ding uh.

“ Ka Pa uh vaan a om, hiai a Na ma a hong dingte lak ah, pa hihna a lohcing a kipak mahmah a om ding ua. Khenkhatte ahihleh, pa hih haksa sa a, lungsim guuk a liampi thuak bang leng a om mai thei uh. Pa ka hihna ua ka cinlouhnate uh, ka hihkhelh khaakte uh, ka mawlna uh leh ka theihkhelhte uah hon ngai dam in. Huanah, ka vek un, kou mau pate’n ka tung ua hihkhelh khaak a neih uhleh ngaihdam theihna hon guan in. Hiai na mai a hong dingte, pa hita bang, pu hitate mahni inn sung ciat a, Na siampu hoih hiciatta ding in Na kha in hon thuam in. Huanah, tunung ciang a pa hong hi dingte leng ahun uh a tun ciang ua, pa hihna dinmun na lungtunna bang a semkhe thei ding in Na kha in ompih a pi dingin ka hon ngetsak ahi. Ni topni ciang a, Na vaihawmna mai a ko’ng ding ciang ua, “ Na hih hoih e, pa hoih leh ginom na hi, Ka kipahna ah lut in” Na cih ka zak theihna ding un kingai niamtak in Na maima ah lungsim khasia toh Na panpihna ngen in ka hong ding ua, Na kha in hong buak in hon ompih tawn tungta in ci in kou hondam Jesu kris min in ka hong thum uh hi, Amen”.

[June 20, 2010 Pate Ni a thugen]

Wednesday, June 16, 2010

VAAN KHOPI KONGZING

Lettu: Khamkhokam Guite

[ Hiai tangthu- na lungkham hon nemtu ding a gelh ahih kei a. Nep leng hon nem zoulou ding hi. Himahleh, hiai tangthu na sim ciang in mihingte hinkhua thuuk zaw deuh in hon ngaihtuah sak ding a, na kim leh kiang a omte theihsiamna hon tun ding in I gingta hi. June 13 a hongtun a ‘Naupangte Ni’ I zat un, na omna veng koisan hiam ah, kuate hiam in a ta duatluat uh, naupang damlou khat lungkham mangbang tak a enkol lel uh ahi cih na lungsim in na phawk gige in aw]

Damdoi inn kiang a panin nitumkuan eng singseng en in tu a. Nidang hun dang bang hileh zaw kilawmsa in muhnop huai sa law ding hi a. Himahleh, tuni in zaw etnop huai sa thei mahmahlou hi. Et mai in leng beidong ahi cih theih mai dingin, dingtou phut in, a tutna ngei ah tusuk nolh hi. Hiai nu zaw mangbang lua in a lungsim vaan a khai bang hi.

A tutna Park a kipan gaalleh lam gamlalou a pindan sunga a tanu neihsun ihmut limtak a ihmu hileh zaw hici tak a lumgkhamlou ding hi a. Damdoi inn a khophoklou a polut ahih ziak in, ihmu hia ihmulou cih leng theitheilou hi. A nakvang ah oxygen piakna pipe kiguanglut a, a lupna tung ning khat ah a nak leh nak louh theih na’ng in monitor khat kikhai a, a lungphu in a phut lai leh phutlouh theih na ding in huai monitor ah rong hing giitkoi khat pai leplep zel hi. A tanu mel a etciang in lungkim thei mahmahlou a. A kiang a om gige ut mahleh, om gige phallou ua. ICU pindan pua ah khukdin suk nop in “ Toupa, ka tanu thuak ding teng kei hon thuak sak mai ve” ci in thum keuhkeuh hi.

Nite hong pai liam zel ua, himahleh atanu in hoih lam nawt thei tuanlou hi. Sun nitum in a kiang ah ompih sek mahleh, zanciang a leng a tanu kianga a awmlouh ciang in, a lungkim thei mahmahlou hi. Nurse te’n inn lama vakhawltawl dam dinga acih ciang un leng, inn ah ihmu thei tuanlou hi.

Zankhat a tanu duatluat sihpih ding khop in hong om a, oxygen pia in nak thei lai hamham hi. Doctor te’n ahihtheih teng uh hihta ua. Bangzah vei ahia a tanu a dinga athuum taak cih ngaihtuahlou hi. Mangbang tongkhong in Pathiam loungal sap ding thei tuanlou ahih ciang in:

Aw Toupa Pathian, pindan 304 na akipan bok in
Zinglam dak nih hitamahleh k’on sam non zel ding
Kiveh hun beita a,ka tanau teng un honpaisanta ua
Kou nuta’ kia tangkhat tak a ka om hun uh tung nawnta a
Ka nau in khovak tan hon dampih louh khak ding lau lua kei ve.
Dam ut in theihtawp in pang mahleh
A natna nasa lua a maw
Hiai ka khitui taak keuhkeuhte’n ka nau tuam dam thei leh ci nang e.

Vaan kongzing khong a mi a tamtam maizen ding uh toh
Bang ziak a Toupa, ka nau khelkhel na kiang a pi tum na hia
Cikciang hiam a na tanu duat tak tangtawn a hithouthou ding hi a maw
Tua zaw Nang sang a aleh tampi a kiphamoh zaw kei ve
Huai ban a, atuam a om dinga zaw neulaw lai ei ve
Kum sagih hipan phet a maw.
Vaan khopi kongzing lunlai khong a
Lampi a kaan ciang a
Kuan a khuta na kaita ding a hia?


Nunlui Tangta Hun Nuamte
“ A nuam ah leh a haksa ah bang….’ acih zoh un a kitenna uh theihpihtu leh loppihtu hongpai khom mipite mai ah anih un kitawp tonton ua. Mipite’n kipahpih tak in na en uh hi. Dakkal nih nung in amaute geel kia in, huai duhthu a sam na inn sungngei uah, aki-itna uh nuam tak in bucing sakta uh hi.

Niteng in a ki-itna uh thuuk deuhdeuh in, sun nitum a asepna lama om a pasal toh phone in kihou zel uh a. A pasal in a seppihte nuihzabuuk hi ding khop in, inn a om a zi phone deuh gige hi. Tulai khovel ah hici tuk a nupa ki-it tuah om thei ding ahi de aw, cih ding khop in ki-it tuah uh hi. Kum nih nung in tanu hon nei ua, ‘eite gel nu-le-pa hita mawk hang a maw’ ci in ki-en tuah ua, kipawm tonton zel ri-ngot uh hi.

Pa Lungsim Luahtu
A tanu nuihmai a lungsim mitkha ah tam den a, a hohna peuh ah atanu limlak asakhau ah kuah den hi. A khual zinna a numei naupang amuh peuh in atanu phawk khe sak zel hi. A nu’n suty la a atanu uh enkawl thei tuam acih ciang in, a lawinu bang thiik kha dek sek hi. Huci bang a nupa kituak tak dia bawl a, tanu deih huaitak petu Siamtu tung ah vui leh vai na’ng theilou uh hi. Nuamtak in hun hong tung dingte gal dawn in zingthou ua, “ Office kai nuam”, Skul kai nuam aw le” cih in zingteng in kikha khe zel uh hi. Nitaklam cianga inn a an ahuanlouh ciang un, a innkuan un pawt ua, naupangte park ah a cangleh kimawl ua, khat veivei tuipi kiang ah khawl toldam in, huai piaunelte apan in inn lem khong bawl khawm zel uh hi.

Huaite zaw hun bangtan hiam paita a aom dan uh hi. Tun zaw natna lauh huaitak in a tanu uh leh a innkuan nopsakna tengteng uh damdoi inn lupna ah hen cibilh hi. Lupna tunga lum a tanu uh awlawl a hong taang in haksa sa pipi in a nu lam hon en phei a. A pau theihlouh ziak in a mit-hah apan in anu kiang ah hon panpih in cih hon ngen a. A pa muh ut in amit in apa zawng a, amuhlouh takin, a mit meng zangin, anu kiang ah ‘ka pa koi a om hiam’ cih kan hi. Jane in a pasal a cauh gawp ziaka inn lama va khawltawl dam ding in utlou pipi in ama in na sawl khia hi.

Duatcimlouh vontawi
Huci bang a nu-le-pa ngai ngoihngoih ahihziak in damdoi inn lupna a lupdet ning law mahmahta a, ‘ I inn uah paita ni’ ci deuh gige hi. A pa’n, “ na hong dam siang ciang in I pai ding uh aw” acih ciang in leng, a nu kiang ah, Doctor pa kiang a” ka pawtta ding uh” cih va gen dingin kun teitei hi. A khut a sisan piak na’ng a phim kithuahsa leh huai sisan bawm a lupna tung a kikhai en vungvung zel hi. Jane in a tanu daang dildel a et ciang in a sung-giil ah thum vungvung zel hi. Doctor siampenpente’n khawl hoih penpente zang a enkol uh ahi cih leng athei a. Himahleh, sisan cancer sukdam haksat dan, a beidot huai dan leng haih tuanlou hi.

Damna zaw Pathian khut a awm ahi cih leng thei a, Pathian in a tanu a lak saklouh na’ng in paulap atheih tengteng Pathian kiang a gen khinvekta in kithei hi. Gen beh ding leng athei non kei hi. Himahleh, Pathianlou sap ding dang a thei kei hi. Pathian in a tanu a laksaklouh na ding a paulap thulimlou lua cih omlou in gen gai vek hi. Hici bang numei naupang maimai, mahni ziat leh vei lam leng khentheilou ahi cih Toupa, hon theihpih nei ve maw?

Aw Toupa, na thei lai hia
A birthday ka lop nanung peng ua
Mombati a muut mit a cake a aat lai a
Na kianga a duhthusam a hon tut kha?
A let ciang a sakol tung a atuan ding khong
A picin ciang a pasal a apa neih a tup lai khong!

Aw Toupa, hong kingaihtuah thak mah dih! Amah kia a khahzan theih hinailou ei ve. Kahlouh haksa hina mai zen e!

A Bul Hong Kipatna
A tanu, Mary leh apa kimawl lai anhuan inn tolet apan in en cim thei ngeilou hi. A pak huan sunga pakte tui a piaklai a, Mary leh apa’ nuih ging zaak nuam hina mai zen e! Ni khat Mary kahging za a, tolet a ava dak khiak leh, apa’n Mary na pawm in, a khekawl tom in a khuh phaklouhna akhuuk nuai a sipot mu hi. First Aid bawm honla khia in hon tuam ua, bai laihlaih in pai hi. Ni khat, TV a apa toh Tom and Jerry a et lai un, a pa alawmte khat in pawt dingin hong zawn a, a nasepna lampang toh kisai ahihziak in, pot lou theilou hi. A pa’n a pawtsan kaal a amah kia a Tom and Jerry a etlai in, khophoklou in Mary na puuk a. Doctor a etsak uhleh, sisan cancer ahi cih hon mu khia uh hi. Kahlouh thei hilou hi!

Huai nunga a khovel hinkhua uh zaw bel lehkhup vot toh kibang hi. Damdoi inn, a awm tampen na mun uh hong suak a, kipak a anuih gingte uh kah ngoihngoihna in khek khia a, a phur nate uh nguina suak leh sal ah tangta hi. Niteng a kipaktak a kikha khe gige nupa in nguitak kawm in zing an ne khawm ua. Jane an neek lim ngei mahmahlou hi. Mark in azi sukkipah ding dan tuan theilou hi. Kaplou a thuum khawm thil hithei lou hong suak a, a tawp a tawp in atuam tuak in thuum khong uh hi.

Dawnlouh Thumna
Damdoi inn hulliap ah vial paipai a, apasal khualzin kaal in kithuak-hat saktak in atanu na khamuan a, a kiang a tu in akhutte letsak a. Nurse fel tak a goih un a kiang uah vil gige hi.

Pathian sam munlawta mahleh, A dawnna om in theilou hi. Dawng hileh zaw a tanu in hoihlam not ding a, a inn ua nuamtak a ihmu hiit-hiatta ding hi a. Himahleh, kiakniam lam not huaihuai a, Pathian in a thumnate dawn taak a ngailou ahi de aw? Nidang a athumnate uh dawng zel ahi cih lah athei ciantu hi si a. Dawng hetkei leh leng, belh ding dang leh taina ding dang tuan bel neilou hi.

Ngetna Nanungpen
Nitaklam hong hi a, nasemte inn lam zot hun hong hita a. Damdoi in umna pua ah hih ding neiloupi in vial vakvak a. Lamlian kiangah khopi ceina dinga kibawl tui kikhoh khia(fountain) om a, akiang ah, tui dawn ding kunsuk cianga kamsung a hong kikhoh lut thei mai ding a abawl uh om hi. Huai paam deuh a lamlian kiang a park a tutphah zawnsau ah vatu hi. Traffic light a san hong vak ciang a lamlian a Gari khawl depdupte leh, Gari-te a khawl ciang ua mipi kintaktak a lamlian kaantan a pai dumdumte a gaal a pan in en hi. A pamdeuh ah, biak inn tung vuum ah kros kitaak mu a…….

A lungsim in thilkhat ngaihtuah khe guih a! A tanu damna ding a Pathian kiang a thu tut ding dan leh nget ding dan, paulap bawl ding dan atheih tengteng gen gaivek a kisakleh, hici bang in thum ding dan thak khat hon ngaihtuah khia a:

Toupa, Nang zaw Angel tampi nei cin a maw
Ken, hiai ka tanu, ka Angel neih sun hi a
Amah a dia mun na bawl khit taakleh leng
Hiai ah tenna ding inn nei khin ahi cih k’on hilh himhim ding
Ka mangbat thumnate na ngai khia hiam ka thei kei a,
Na ngaihkhiak kei a leh leng, Nang kianglou taina ding ka nei kei
Na kiang a thuum thuum mailouh hihtheih dang ka nei tuan kei.
Huaiziak in, Toupa Pathian hon hehpih mahmah ve maw
Ka dinmun n’on theih siam pih leng ka gingta
Nang leng, Na tapa tang neihsun na khuaita nahih cia’n!


Thu Leh La Tawpna
Lei apan ngetna a tawp tungta a, himahleh vaan lam apan dawnna muh ding omlou hi. Pathian hehpihna hiipkhe ding in a hehpih huai thei pen ding a angaihtuah teng sam gai vekta hi. Gen beh ding athei non kei. Mihing zaw zoh in om a, vuallelta hi. Mit tui luang khe dingte dal theih hilou a, vaan lam thilhihtheihna leng mihing in nan aa nan zoh vual ding hilou hi. Damdoi inn kiang a Park ah kun ngiungiau a tu in Pathian lungsim thuzoh tum in a hehpihhuai thei pen ding a atheihdan tengteng gen gai vekta a. Gen ding athei non kei. Hiai bang in a thumna suktop hunta hi:

Toupa, Na hih ding dan teng thupuukna bawl khin na hihleh
Na kianga ka mangbat thu hong gen genle phatuam nonlou di’n ka thei a
Tua ka tanu duat luat hon laaksak ding na hihleh
Na kiangah thil khat ka hon ngen lai ding
Vaan khopi kongzing lunlai a lampi akaan dek teng in
A veilam leh taklam na en sak zel thei diam?
Hiai ka nau neu ciiciau in-
Vaan khopi a lamlian a kaan dek cia’n
Na khut ngei in Na lenin, Na pi gige in aw.

………………………X……………………….
STREETS OF HEAVEN

Hello God, it’s me again, two a.m. room 304,
Visiting hours are over, time for our bedside tug ‘o’ war,
The sleeping child between us may not make it through the night,
I’m fighting back the tears, as she fights for her life.

And it must be kind of crowded, on the streets of heaven,
So tell me, what do you need her for?
Don’t you know one day she’ll be your little girl forever?
But right now, I need her so much more,
She’s much too young, to be on her own, barely just turned seven,
So who will hold her hand when she crosses the streets of heaven?

Tell me God, do you remember, the wishes that she made,
She blew out the candles, on her last birthday cake,
She wants to ride a pony, when she’s big enough,
She wants to marry her daddy, when she’s all grown up

Lord don’t you know, she’s my angel,
You’ve got plenty of your own,
And I know you hold a place for her, but she’s already got a home,
Well I don’t know if you’re listening,
But praying is all that’s left to do,
So I ask you Lord have mercy, you lost a son once too.

Lord I know, once you’ve made up Your mind,
There’s no use in begging,
So if you take her with you today,
Will you make sure she looks both ways?
And will you hold her hand when she crosses
The streets of heaven

(Source: Adapted from Lengzem)

NGILHMOH NUNLUI

Zanciang zalna laikhun tung a
Selung khuam bang ka gelgel cia’n
Ngilhmoh nunlui ngoubang hong lang e.
Ngou bang lang e, nunlui mualliamsa
Vualngaih tengtoh um bang I kholh lai ,
Pal tung lakmai luankhi I nul nite
Maimit kisuan lungdeih simthu I kup laini
Cikleh ngilh ni tuang tung diam aw.

Tunlah maimit khimbang zingtah e
Nunnop laini’n lenmual khumzouta
Kouhkik theihlouh nunlui mualliamsa
Ngai in kham kha vei loh ngawn ing e.
Laikhun tunga khuam bang ka gelgel cia’n.
Nahsing bang pulh siallei tangsa
Vual ngaih teng mel in mu’ng nge
Mel in mu’ng e lungzuan thel bang thou sak.

Ka nun tuang lam ka gelgel cia’n
Buh-al loihsa lunta saumang nuam
Saumang khimzing gial bang dai nuai a
Khattang hei toh ka nun lawm sang e.
Khattang sawl bang hei toh ka nun lawm sang
Ngilhmoh nunlui ngai in lakmai luan khi’n zel e
Luankhi’n zel e, ngaihtam sial a -
Sen lai nau bang kahlai ka baang mawh hi e.

PAI PHEEN PHEEN AA GAW LEEN LEEN

A luzaang ah lu-nget vui philphel a, a khe nuai ah nga-mit nih leh thum om deuh gige hi. Huai a khe nuai a ga-mit hak kilkelte leh, a luzaang a lu-nget vui philphel kikaal - feet 5 vel sung a khosa in, pai pheenpheen in gaw leenleen hi. Hoih tak a na et vengveng chiang in, Pathian in leng thil tengteng tup leh ngiim nei a, a ziak gen ding om a thil teng na bawl saamlou hi, chih na thupukna hilou theilou hi.

“Hiai khovel zaw haksatna ngen a dim a”, chi in khoisa vungvung sek hi. “Hiai khovel – ni khat chauh kisillouh chiang a zawng lu-nget khuatkhuatna gam, hiai khovel mahni duhzawng tak sa-neek ding muh sunsun chiang a leng ha kaal holhholh a kulna khovel, hiai khovel inn kong ah pot khe zek le veilam khepi suih khaakna khovel, a baan neukha pai lai le maban lampi’ zohngeu vom in hong kaan chitchiatna na mun”, chi a lungkimlou in kinuainuai mai hi.

Amah khom in a omna munah, hiai khovel bawlhoih tum in a khuak neih tengteng seng in na ngaihtuah tei a. Mihingte khepek Siamtu in beem velvol in na bawl leh veilam khepi suih khaak chih omlou ding hi a; huai sang mah in leng, khepek khat kia nei in mihingte na bawl henla, khepek beem velvol in bawl zawmahlai leh; veilam khepi suih khaak gentaklouh, taklam khepi tanpha suih khaak ding zawng omlou ding hia, chih khong a ngaihtuah khiak chiang in Siamtu bang mohsa simpian hi. Ahihleh, mihingte’n khepek khat kia neitaleh bangchi paita ding chih leng, ‘tawm leuhleuh lel ve’, achih chiang in fel deer in koih hi.

Mihingte ha bang leng, atung leh anuai, ‘Great Wall of China’ bang in, sakhat in Siamtu in na bawl demdomta leh, a kaal a sa-neng kizep na’ng omlou ding hi a, chih khong na buai pih khop a. “Huai ahih kei leh leng”, chi hi, “shark ha bang in zum zeuhzouh in a kikaal za pipi in, sa-baak tanpha akaal a tang theilou ding in na bawl leh, sa-neek khitteng a ha kaal holhholh chih omlou ding hi a”, chih khong khuak sa vutvut zen in na ngaihtuah sek hi. “En ve ua”, chi in a kiang a om teng kiangah, “sahang vompi in cooker in sa a huan ngei ua hia? Sahang vompi’ ha kaal holhholh na mu ngei ua hia? Bang dia kei cooker a sa guh tanpha huan min aa ne gige pa’n ka ha kaal ka holholh ngai sese ahi”, a chih chiang in a vui leh vai na’ng na mu get hi.

“Khovel ah zohngeu vom om non kei leh, ‘unlucky’ chih bei dia, mihing tengteng ‘lucky’ vekta ding uh hi” achih chiang in, mihingte problem sehthum suah a sehtampi sukvai veng theih na’ng thu-guuk poimoh tak mukhia bang in kingaihsun hi. “Huai ziakin”, chi hi, “zohngeu tengteng genetically a modified hi henla, a rong vom mawngmawng piang nonlou ding in bawl le hang”, achih chiang in phur deuhdeuh hi. “A short term a ding in ahihleh, a vom a piangsa tengteng a rong ngou nuh vek le hang, zohngeu vom in lampi kaan akisak chia, a ngou na hi daih ding”, chih khong a ngaihtuah chiang in choh sa law mahmah hi. “Zohngeu vom khovel ah beita leh, Delhi kholai a gari a pai chiang a, zohngeu vom in lampi a kaan ziak a gari ding chot a, neu kha back a pai non chih bang le om nonlou dia, hun tampi ki-save dia, gari jam omlou dia, carbon emission bang le tampi a kiam ding hi” achih chiang in khovel hondamtu ding, khovel in ana ngakngak uh bang kisa kha dektak hi.
“Huai kia leng hilou a”, chi in a baan sun zawm a, “ liimlang in thu sawm piakte lak a a giatna boh sia ei ve” chikhe phong mawk hi. A Mangkam ngat in “You shall not bear false witness against your neighbour” chi in ceiling lam entou vengvang hi. “ Ka tate leng kum 16 pel ngeilou dia, a kum teng a kum 16 chi gige ding khop a ‘sithu nam zen a’ pan ka laak lai a, bang dia liimlang maimai khongin ka hihlouhna pipi a hon ngoh gige ahia”, chi in Pope’ numei pawngsual thubuai awhsak toh kibang in, a righteous injury toh hak khe pheiphai hi. “ Ka right leh dignity humbit ngamlou ding non sa ua hia?”chi in amai a dohkaan tung tuum deklaw mahmah hi. Neu kha hihleh tuum suk mai ding hi! “ Cartel system leh monopoly himhim a hoih om kei. Liimlang tengteng kithutuak ua, ki-guul luuk ua, ki-uitui ua, a gen uh ki-ekbat vek zomah lai ei ve! Monopoly and Unfair Trade Practice Act chih omna gam ah hichi bang om non kei leh hoih in teh” chi in, liimlang sinlai hoih sinsak ding a mohpuakna poimohtak a liangkou a ki-nga ahi chih muh theih mai ding in, ding khia in, liimlang hilhpil dinga a mohpuakna semsuah dingin, pai pheenpheen aa gaw leenleen in, hon nawseta hi.

LUNGKIM MOH

KA sakmel ah lungkim moh ing e
KA maimit heem deidawi a,
KA besam koi lenglong a
KA beng saipi beng bang dedaw a
KA hatu’ ga-tam cia in ka mai liah a
KA sakmel teenniik sia toh lawm sang e.

KA awm ah lungkimlou ing e
KA awm guh pawng eu ou a
KA naak guh tungnung dektak a
KA liang tual deepdawp a
KA awm sung ging luapluap a
KA awm sukteng singbul kaang baang bang e.

KA gil awm dan ah lung kimlou ing e
KA gil puak kei koi a
KA lai pawng eu ou a
KA diip thuuk keukuau a
KA gilsung ging ngawingawi den a
KA gil lak teng pioneer-te sai-ip sia toh tehpih ing e.

KA phei phung suan ah lungkimlou ing e
KA zadangah meikang pawn om a
KA khuuk saak lemlom a
KA khezung in sim leh mal kawk a
KA khetul khikham deuh gige a
KA pheiphung suan in nuihciam lel hi e.

KA aw gin dan ah lungkimlou ing e
KA simthu lel in lungkuailou a
KA zaila sak akpi kaw-keek bang a
KA nuih ging sikha kap bang a
KA khuhciang in kek kia bang a
KA aw gin dan in kahtha suaksak lawmlawm e.

KA pilna vok-kuang bang dai a
KA ziat ka vei theikhenlou ing a
KA ngaihtuah in vual phalou a
KA lem geelna in Babel in sang lam a
KA pil dan ah hai lua ing a
KA haina in kholhpih vual teng khuup hi e.

KA naakvang veikawi in gawtmun kawk a
KA tawbou zawng tawkheng bang a
KA nungzang guh Kaihlam tang bang a
KA pheipi kangsezau bang leekluak a
KA ngawng Eden huan a gulpi bang a
KA khutzung musane’ khezung toh tehpih ing e.

KA lungdeih in sum-bang hon nial a
KA aanglai ah uitebi bang pou a
KA silhpuan in khimkhua zing sak a
KA kaihdial thou in bawm a
KA sumtual ah kuhsaling bang pou a
KA sanmennou in mel in ma hi e.

KA sakmel vual in englou a
KA sakmin ah lungkim moh ing e
KA pianna vangkhua duhthusamlou a
KA pianna pi-le-pu ah lungsit lua ing e
KA beh-le-phung in hon pampaih a
KA tantawk dia Sian lem gelah lungkim moh hi'ng e.

[ Hiai tangthu toh a hinkhua kibang kha, a sisa hiam a damlai hiam mihing a om leh, “ chi nawn zezen” ka ci ding]

Wednesday, May 12, 2010

DISTRICT COUNCIL MEMBER HONG HI DINGTE KIANGA LAIKHAK HONSA

Gelhtu: Khamkhokam Guite



A Zahtak Huai Mahmah Pu,

Member of District Council (MDC),
Churachandpur District/Manipur Sim Bial.


Amasa in District Council Member khat hi dinga teelcing a na hong om ziak in kipahpihna sangpen kei leh CCpur District mipite’n ka hon pia uh hi. Ka pallai ding ua Pathian honpiak na hi cih ka pawm ua, na maban a nam- le- gam a dinga na septouhna ah leng ka hihtheih tantan ua hon kithuahpih ka kithalawp lamtak uh ahi hi.

Na theihsa mahbang in, Manipur singtang bialte a District Council I cih India Constitution 6th Schedule pansan a kibawl ahihlouh ziak in leh, Manipur gam, politic ah hi in thil dang ah hita leh, moral leh principle neilou penpen tualsuak a kibawl khia mai ahihziak in, nam-le-gam a dinga na septouhna ah haksatna in hon pumbuah ding cih leng k’on theipih ua. Huci banga na maban a haksatna omte gaal muh kawmkawm a leng District Council Member khat hi dinga na hong kipiak khiak ziak in phatuam ngai ka hon sa ua, k’on pakta uh hi.

Na theihsa mah bangin, I mipite un kiteelna a meltheih pat tung ua – kiteel manphatna, mipite’n atung ua vaihawmtu ding mahni deihteel theihna neih kici thupi dan, mahni vote manphatna leh, kiteel I cih mipi vantang gamsung vaihawmna a atel theihna uh(participation) - a tantuan uh thupi tak ahi, cihlam kisinsakna om khalou a , kiteelna apan piang thei thil hoihlou ‘nohcizuak politics’ a heutu masate’n mipite luut pih kha lakloh uh ahih ciang in, tu election ah leng sum-le-pai tampi seng in na principle tampite cerlem(compromise) in a om ngal ding cih leng ka hon theih pih ua, na maban paitou zel ding ah gah hoihlou a suah a, na tup louhpi a sum-le-pai haksatnate ziak a, hun paisa a mipi palai khen khatte vei sia in hon loh khaak ding leng k’on lau pih mahmah uh hi.

Na kim na kiang na et ciang in, nang bang a mipi ai-oh khenkhatte’n gam sung etkawl na’ng sum a za-ip dim ua guang ua, a le-nuai dim ua zep theih teng zep ua, khut a a aangpawm theih teng uh aangpawm ua, a val omlai teng a khe ua pal baw zaw mahlai leng na mu ding hi. Himahleh, nang zaw Siamtu in I gam uh a dinga ‘kilamdanna/kikheekna’, Sapte’n ‘change’ acih uh hon tuntu ding a A hon sehtuam hi ding in k’on na gingta ua, nang ah lam-etna thupi tak leh saang tak k’onna nei uh hi.

Hiai anuai ah, awlmoh huai kasakte uh ka hawn vual suk ua, hehpih a na lungsim leh hun hon pia a hon simsuak sak a, gam adia na septouh zelna ding a leng hon ngaihpoimoh sak a, nang hon makaihtu hi dinga zang dingin ka hon ngen uh hi:

Khatna ah, Manipur Sim Bial, CCpur District kici in a District pum uap a, a District sik- le-taang a pau ding leh, semtu ding neilou hi. Huaiziak in, na constituency kia hilou in, na seppihte toh a District sik-le-tang a pau a, a District pumpi sik-le-tang a sem ding in, hiai District sung a tengte khentuam leh kiciziatna tellou a gim-le-tawl khawksa lou a sem ding in k’onna lam-en ding uh hi. CCpur District in haksatna tampi nei a, himahleh a District uap mipi mandate nei, pawl leh organization dang, a Bial pumpi sik-le-tang a pau ding District Council lou ngal neilou hi. Huai ziak in, a District mipite haksatnate tangkou pih a om ngeilo a, Delhi a India gam thupi tak vaihawmna Innpi in leng Manipur Hill District a tengte – zuunlouh leh puahlouh a khosa uh ahi cih thei kha ngeilou ding in ka gingta uh hi. Huai ziak in, lungsim lian huntawk, a District pumpi uapzou lungsimpu kawm in, a District pumpi a dinga hon sem ding in nang leh na seppihte k’onna lam-en uh hi.

Hiai District sung a teeng tengteng ma-nohna(destiny) kibang, tunna ding(goal) kibang ngen I hi ua, kuamah aki taisan hiam, a hontaisan thei ding hiam om tuanlou hi. I vangsiat leh se khom ding, I vang a phat leh pha khom ding I hi cih a kuapeuh in mang-ngilh kei ni hang. Huai dingin, na Member pihte laka nang banga lungsim lian nei, na lungsim kibat pihte toh semkhawm ding in pawl hong kibawl unla, nidang a ineih ngeilouh uh a District pumpi khekhat a ding a, pang khawm a, I District uh takna toh puah ding in pan honla ding in ka hon ngen nuam uh hi. CCpur District ei gam ahi a, a gam neitute mah in I zuun kei leh kuaman hon zuun saklou ding uh hi. Huanah, Pu MDC aw, I District un a phutawk a ngaihsak State solkal apan amuh kei leh leng, mipite mandate nei na hih ziak in, India a solkala a lian penpen leh politics lam a lian penpente kiang ah leng tangkou thei na hi cih kimang-ngilh het ken aw.

I District un District pumpi uap, District pumpi sik-leh-tang a pau ding aneihlouh zik in, Nagate’n Manipur (Hill Areas) District Council (3rd Amendment) Act 2008 deihlou a akiphinna bang uh leng, support ngeingei ding ci himahleh, ei District ah malatu ding omlou mok hi. Huaiziak in, a District pumpi en a, a District pumpi hoihna ding hon ngaihtuah a, pan honla ding in ka hon ngen tuantuan uh hi.

Nihna ah, nang leh na Member pihte nna masa pen nihna ding a ka honna lem geel pih uh ahihleh, India Constitution 6th Schedule nuai a District Council I District un a neih theihna ding a malak ahi a. Hiai nna poimoh tak semkhe ding in District Council a Memberte loungal omlou hi. La in ‘ Laikuang a umpih teng dougal tang zouta uh’ acih bang deuh in, phaizang a tengte sang mah in singtang bial a palaite(MLA), na singtang mi hihpihte leh ‘ laikuang na um pih’ te mah a doutu hihtheihna mun ahih ziak in ‘vakhu bang a poikhoihlou a, guul bang a pil’ kiukiau in ma nalak uh ngai ding ahih ciang in, na hihna tak, na quality hiai ah hong kilang ding hi. A ziak bang hiam na cih leh, singtang Bial apan phaizang a palai a va pai, Manipur Innpi a vaphungkaite’n a an kuang uh betbuak sak a hon ngai ding uh hi. Hiai ziak tak a tuni tan a 6th Schedule nuai a District Council nei zoulou I hi cih gentam ngailou a na theihsa hi. Bangteng hileh, CCpur District a dingin leh, singtang District teng a ding a hoih ding ahihna ah, na term sung un 6th Schedule lai khiak teitei hon tum un aw.

Thumna ah, Mihing in hun paisa I theihlouh ciang in, hun paisa a mi masate hihkhelh mah hihkhial in, a kipalpukna mah uah kipal puuk theih ahih ziak in, hiai anuai a bang in hun paisa neu kha I en ding hi:

Singtang bialte a solkal skul a beina san ahihleh District Council ziak ahi a. Hiai hih thil pawm haksa bang in lang mahleh thudik ahi hi. Kum 1970 leh 1980 kikaal in District Council omna District te a L.P Schoolte District Council nuai ah koih in om hi. Ahihziak in, Manipur solkal in skulpute khaloh ding sum, District Councilte kiangah a hun in pelou ua, District Council nuai a a om nung uh kha tampipi skulpute’n loh la lou in hong om uh hi. Loh a laaklouh sawt ciang un skulpute skul kai hong ki-thadah suah ua, a tawp a tawp in skul hong kailou in, skul kailouh ciin dan in hon nei uh hi. Hiai in LP School kia hilou in JB School, J/H School leh High Schoolte honlawh tou in 1970 leh 1980 kikaal in Manipur Hill District te ah, solkal school hong bei uh hi. School kia hilou in singtang a solkal office tengteng leng hon lohtou in, Manipur singtang gam teng solkal etkawl louh, gamsa banga asung a teeng mipite a khosakna gam uh hong suak hi.

Manipur singtang gam, a biiktak in CCpur District singtang gam ah kum 1970 leh 1980 kikaal apanin hun khawl a, bang lam peuh ah masawnna omlou in, kiakniam lam ngen nawt hi. Singtang khuate a skulpu leh solkal nasemte omlouh nung, lou nasemte sepsuah anteh louhing leh haite a leisaktu ding omlou a, sum-le-pai leeng ding hong omlou a, mipite sum-le-pai din mun setuan mahmah hi. Masawnna himhim 1970 leh cih apan a khawl baan in, solkal nasem leh laisiamte’n singtang khuate hon nawt siat ciang un ‘intellectual’ lam ah zawng kiak niamna lianpi hon tun hi. Huai ziakin, singtanglamte innteen-louteen, a innsung uh, a khosak dan uh, a lupna uh, a ekbuuk uh leh thil tengteng 1970 akipan 1980 kikaal a ahihdan ngeina uh, kilamdanna omlou in tuni tan zangden uh hi. Burma ah 1950 leh 1960 kikaal in hun khawl a, huai kaala a om dan un tutan om uh hi, ci uh hi. Huai mah bangin, CCpur District a singtang lam ah 1970 leh 1980 kikaal in hun khawl a, 1970 leh 1980 kikaal a akhosak dan ciahciah un tutan khosa uh hi. Pu MDC aw, huci bang in I gam uh om densak na phal ka gingta kei ua, I gam uah ‘change’, a hoihlam a ‘kilamdanna’ hon tuntu hong hi in.

Lina ah, I haksatnate uh ‘Manipur phaizang’ lamte ngoh mai thil awlsam tak ahi a. Ahihziak in, midang leh sadangte ngoh a I khuttal a I kawk ciangin, I khut zung thum in ei hon leh kawk ahi cih mang-ngilh kei ni hang. Manipur solkal leh, Manipur solkal nasemte a thulim kei uh, cih I gen mun ua, dik leng a dik. Ahihleh, ei a liauliau District Council leh District Council nasemte a hoih zaw uh hia le? A sepna mun ua om in, a sep ding bang uh gin-om tak leh innteek pan takin a sem uh hia? Pathian in talent bangzah kemtu ding in cin-aa-siam ding in hon gingta dia le? I talent neih sunsun uh laksak a anei zaw kiang a piak hoih zaw ding in Pathian in hon mu diam maw? Manipur solkal in a phuah tawm District Council, financial power leng nei manglou le enkol taaklou houh I hi diam? Ei mohpuakna pozau ding in pan honla thak unla, District Council Memberte leh, District Council nasemte – Manipur MLA leh Manipur solkal nasemte etton tham ding in hong khosa un, cih ka hon thukhaak nuam uh hi. Singtang lama solkal office leh a semtute, a omna mun ding ua omloute leng, asepna mun ua pai dingin, agenna ding mun a va gen gentu in hong pang in. Na heu in Manipur bawl hoih ni, ahihkei a, I bawl hoih zoh kei ding vanglak leh, kipek khia ni hang. Tua I dinmun uh I ‘vaang’, I ‘fate’, I ‘karma’ hi dinga Pathian hon piak hi zenzenlou hi. Mi thulimloute toh bawmkhat a I kikhum khaak ziak maimai hi.

Ngana ah, District Council in development work sem thou mah leh, a mohpuakna lian pen ahihleh singtang mite gam humbit ahi deuh pen a. Ahihleh, I District Council un Tribal Land a humbit hia le? District Council bial sung a gam, non-tribal in a lei ding ciang in, District Council Chairman in phalna a pe dia, huai dung zui in DC in Patta a bawl ding ahi, ci ua. Ahihleh, tribal hiloute hiai zah zouzai mahni veng nei a, veng tuam tuam nei a omte’n bang ci a Land Patta nei thei uh ahi ding, kua moh puakna ahi ding? Tuni a bang mahlou a na ngaihte cik ni ciang hiam a na saa a lingtaang bang hi thei uh hi. Bang ziak a nungak sawmte lak a nungak ngate pil uh Bible in ci ahi ding? Thil dang ziak hilou in, tunung ding a khual phaak ziak lel uh hi. Ei loi in tunung ding I khual pha uh hia le? Pu MDC aw, khangthakte’n Zogam zuak mangtu a a hon ciamteh uh leh, cikni ciang hiam in na luang leh na guhte tanpha Zogam a vuitaaklou in ngai hial thei uh hi.

Gukna ah, CCpur District sungah na theihsa mah bangin, nang hun ma a mite’n ‘fake teacher appointment’ leh scandal ci tuamtuam tampi ‘Sangkhat Lapawl’ na lem ta uh hi. Huci bang tatsiatna te’n , I District uh ‘Babulon kizuaknu, kih huaina a dim’ toh na kibang sakta uh hi. Hiai I District uh lawktute gawt ding in District Council in thuneihna a nei kei cih leng ka hon theihpih ua. Ahihziak in, RTI Act zang phatuam a, CCpur District mipite tantuan kum teng a bang zah a tam, kuate’n gu gige uh hiam cih beek na constituents te’n ka thei nuam ua; nang ma hon kai a, mipite hon hilh pil ding in ka hon lam-en uh hi. Mite gam ah naupangte’n a skul uah mid-day meal ne ua, I zawn I gentheih theih mai zen uh toh, bang dia ei naupangte neek ding omlou ahi ding? CCpur District a Education Department office a seemte, mid-day meal lampang enkolte’n ‘building (concrete) nih leh thum lam zou pahpah uh ahi’ cih kholak singpi dawr a a gensek uh thutak hia, ahihkei leh, tangthu mei bolbol luang polpol? Mi gam a Below Poverty Line (BPL) te’n ration antang a mantawm la sek ua, bang dia ei District a singtang a teengte’n a kiphatmoh moh mai zen uh toh, ba la ngeilou uh ahi ding? Pu MDC aw, na heu in, mipite hamphatna, hiai India gam thupi tak gam a khua-le-tui a hihziak ua a tantuante uh- siamsinna lam ah, water supply lam ah, electric lam ah, social welfare lam ah leh Department tuam tuam ah, neck-tie ok, guta leh suamhatte’n suun khovak lai a bang zah a tam a kum teng a gukhia uh hiam cih RTI Act zangin pholh khia in, FIR zangin mipite hilh pil ni hang. Ma hon kai le cin, na kim na kiangah nang hon seppih ding in khangthak tampite kimansa in om uh hi.

Sagihna ah, pu MDC aw, hun paisa a thil tungte theih det ding leh mang-ngilh ding om a.Paula in Philipite kiang a a laikhak ah “ ahihhang in thil khat bel ka hih- nunglam a omte mang-ngilh in malam a om pen ka delh hi” acih mah bang in, I District uh tunai tangthu hoihlou, huatna leh khaatna a dim, misi siluang leh inn kang luahluahte I lungsim mitkha ua pan la mang a, I mangsiate mang-ngilh dan mipite sinsak inla, nunglam ngalou a, lam-etna thak toh malam en thei ding in lam-etna thak guan ding in k’on ngen uh hi. Unau kal I buaina te uh zaw ‘fair & just’ solkal, mipite’n a muan ngam uh leh vaihawm zou a, vaihawm siam bok solkal nuai a I omlouh ziak uh hi. Mite gam ah leng tualgaal bang na piang zel sam a (American civil war, Spain civil war etc), ahihziak in heutu hoih leh muanhuai makaihna nuai ah, mipite lungsim, taksa leh khalam liamnate ‘Gilead singnai damdoi’ nuh a, heutu hoih in itna toh ‘dam aw dam dam’ ci a, hehpihna leh theihsiamna toh a liamna ma te uh a zut sak ciang in, dam hun hon nei thei zel sam hi. Huai ziak in, pu MDC aw, mipite’n taksa, lungsim leh khalam a damna a ngah na’ng un ‘gam dai a dal guul khai kang’ en ding in, kou mipite ka ngawngte uh khauh tawk mahleh, hon hei sak a, hon en sak ding in k’on ngen uh hi. Huanah, mipite leng kholak a naupang hon in aktal nih a kituksak ua, a kim a a et bang ua - suktuah theih ding in om kei ni. Kihuphulh tuahna, kihazatna leh kihuatnate zaw gamlui mizia ahi ua; huai te gamla pi a paimang in, hong lamdang zaw ta ni hang!

Giatna ah, pu MDC aw, tunai in District Council nuai a skulpu ding 300 lak hi a, huai ah golhgukna sum gawmkhawm Rs 25.00 apan 30.00 crore kikal bang pha ahi cih khenkhatte’n gen uh hi. Tua MDC cingthakte’n golhguuk leh guuktaakna haw law mahmah ding in k’onn lam-en ua. Huanah hici bang kingohna hi ataktak hi kei taleh, ngoh a omte a dinga poi law mahmah ding a, pulpit a athugen bang uh mipite’n nethei nonlou kha ding uh ahih cing in, adik leh moh kitheih baih na ding in CBI te suisak pah mahmah ding in ka hon ngen nuam uh hi. Huanah, MDC term masa kum swmthum bang paita 1980 cihlam a beita ahihleh, bang cidan a MDC omloupi a District Council nuai a sem ding la thei uh hiam, huci dinga kuate Dan in thuneihna pia hiam? MDC omlou a District Council nuai a sem ding ala thei om ahihleh, mipite mandate neilou super MDC om cihna hilou ding hia? Hucibang Dan ana om ahihtakleh leng, akin theipen a hiai Dan niinbawm a pai thei ding in pan honla ngal un aw, huci hihkeileh, nou a mipi mandate neite na om uh kullou suak ding hi. Huanah, term masa bei hun leh tu kikal a semtu ding lak tengteng – a lak dan uh leh, sum leh pai senna tengteng sui vek a , Dan lou a semtu ding lak a omleh tawpsak a, Danlou a sum leh pai zang a om leh, akituak gawtna pe ngal ding in ka hon ngen nuam uh hi. Thil diklou dou hun ding atuam om tuanlou ahihcian, tu hun hih a dou hun ding diktak hi.

Kuana ah, na theihsa mah bang in Manipur Hill District a MLA 20 te’n Hill Areas Committee (HAC) cih nei ua. “ HAC Constitution nuai a body (State Innpi nuai a Committee/Body maimai hilou) ahi. HAC lemsakna tellou Manipur Innpi in tang gam ah Dan-leh-dun khung theilou, nasep khiakna (Executive power) pen State subject a dinga guan/piak himahleh, HAC State Governor ah direct in toukai thei veve” Pu T.Haukholian, Ex-MDC in (Manipur Express) ci hi. Huci hitaleh, Manipur tang gam District Council toh kisai a Dan hoihlou mahmah a I theih uh, MDC ( 3rd Amendment) Act 2008 bang leng HAC te lemsak pihna abawl ahi cih kiciang mai hi. HAC kum hiai zah omta a, Hill Areas a dinga athilhoih hih uh ankamtang maipek a gelh dim ding zawng omlou mai thei hi. Huaiziak in ,hiai HAC kintak a suktop/sukbei ahihkeileh, MDC te a dinga noksak kia mai hilou in, Manipur tang gam tangtawn tangtawn a ‘Dark Areas’ suaksak ding uh hi. Huaiziakin, pu MDC, hiai joker 20 te Manipur Innpi a lusu ngawkngawk dinga kiknawn ding in, hiai HAC pen singtang mite khualna in kintak in sukbeina dingin ma honla un aw.

Gen ding tam mahleh hiai zah in ka khin phot ding a, gam-le-nam awlmohna ziak a na kiang a ka vei zawng uh, kou na constituent te’n ka hontutte uh honna awlmoh pih ding in ka hon ngen thakthak nuam uh hi. Hiai tan hontun Siamtu kiang ah kipah thu I gen a, na ma bante uah Aman hon om pih in, hon pi tawntungta hen aw.

Manipur Sim Bial te sik-le-tang in,

Zokhual
Zogam.
13-05-2010

Tuesday, May 4, 2010

IF……

Gelhtu : Khamkhokam Guite

Britishte lakah a Lavui ngaihsang penpen uh teel ding in BBC in opinion poll 1995 kum in bawl a, huai opinion poll ah ‘IF’ kici Lavui in khatna la hi. Hiai Lavui hih 1896 kum a Rudyard Kipling in a phuah ahi a. Huai hunlai in ama taksa kum 31 hita hi. A phuaktupa, Rudyard Kipling hi December 30, 1865 in piang a; January 18, 1936 in honna sihsanta hi.

London a Wimbledon Tennis Court umna baang ah hiai Lavui a vual nih “ If you can meet with Triumph and Disaster / and treat those two imposters just the same” cih kigelh hi. Roger Federer leh Rafael Nadal te’n Tennis Final 2008 kuma akimawl dek un, Wimbledon Promotional Video ah hiai Lavui ‘IF’ kici simsuak in na omta hi.

Hiai Lavui ‘If’ kici hih khovel a pau thupi deuh teng in kilet deuh vekta a. A lettute leng khamkhokam, literature sin kha ngeiloupa bang maimaite hilou in, mi thupi taktak ngen hi uh hi. A lettute lak a minthang penpen khat ahihleh, Nobel Peace Prize bang leng piak a na omta - khovel a solkal kihhuai penpen Burma solkal khenkhiak a, mipi vaihawmna Burma gam a tunding tumtu, nu Aung Sang Sue Kyi ahi hi. Kum 14 sung vingveng Burma solkal in a gaakton nung un leng nu Aung Sang in hiai Lavui apan in tha ngah a; a koltaanna lungziin huai penpen mun ah leng, ‘Kawl’-aa-nisuak sim in hiai Lavui in amah ah lam-etna thak guan zel hi.

Hiai Lavui - kisit pipi a ka leh khiak lai in ka lungsim ah, laphuah siam a, Thu-leh-La lam a leng a lii thuuk penpen tan na luh khezou, phamta Pu T.Thangthuam bang in hiai Lavui ‘IF’ kici let taleh bang a ci leh ding, sim ut huai na maizen e! cih khong ka ngaihtuah a. Pu T. Thangthuam’ tancin kigelhna “Toupa Khuta Om Ka Hi” cih bu ka sim apan in, meiteite’n Pu Thangthuam that mai hilou un, tunung ciang a Thu-le- La leh, lam tuamtuam a I dinmun leh hihna ding uh, I future uh that tel uh hi in ka mu hi.

Teekpih ding a na deih nuungak na it a, na zahtaak bok hi. Hucimah bangin, La khenkhat ‘hoih sa’ cih maimai in a gen phaaklouh, na guh-ngeek kawm tanpha khoih kha thei La khen khat om hi. Etsakna ding in, ‘Invictus’, ‘If’ leh ‘Where The Mind Is Without Fear” cihte. Huci bang lakah, Thu-leh-La lam a zanzek a mit keuh pante khut khaakna ding in ‘zum moh, khovaak leng zahtaak lou’ hiam, ‘kelkong a sawl kibaang zahtaaklou’ kicih tawitawi theihna ding a bang sim na a; bang teng hileh, a bulpatna ding in ‘sakhi manlou’ in ‘ngaltang’ k’on ‘tum’ peuhmah phot ding a. Simtute’n hon tohkhawm khiukheu le ucin hoihpi khat hong suak ding in ka gingta hi. Hiai La a ‘If’ kici - ‘ciang in’, ‘ciang un’ cih in kon let a; a laaktom(contract form) in ‘cia’n’ cih hong kizang hi.

Zokam in:
CHIA’N


Na kianga mite haamhaih vek ua, lungsim ciimnei nangkia na hih cia’n
A haamhaih ziak uh nang ahon ngoh zawkmah ciang un,
Mi tengin ahon ginlelh ua, nang muang ngamtu nangkia na hih cia’n
Ahihziaka, hon ginlelhna un ziaknei hi cih na haihlouh cia’n;
Na ngaak ngiitngeet theih a, ngaaksawt ziaka na bah gawplouh cia’n,
Zuau a bawl siata na om a, zuauthu mun na ot tuanlouh a,
Huata na om a, huatna na lungsima adim tuanlouh cia’n,
Huanah, pilpen leh hoihpen banga na kihihsaklouh cia’n:

Duhthu na saam a, duhthusaam bawi a na taanlouh cia’n;
Na ngaihtuah a, ngaihtuah kia aa lungkim hi tuanlou in;
Vualtungtuanna leh Vangsiatna kibanga na tuah theih cia’n-
Hiai liimciing nihte kilamdangloua na et theih cia’n;
Na thudik gente mipil velveekte’n mihaite khemna dinga leh,
Nunglam apan dawt na’nga azat uh na puak siam cia’n,
Ahihkeileh, na damsung sepkhiak leh kingakna asiat vek cia’n,
A sia themte tomkhawm a, abul na patnawn peih ciangin:

Na neih tengteng na kaih khawma munkhata na siatkhawm a,
Khatvei thu a mansak theihna dinmun a na din a,
Huai na neihteng na mansak a, abul na pat kiiknawn theihcia’n,
Huai na mansaksate khasia taka na gen gen nawnlouh a;
Na tha-leh-zungte’n hon nawtsiat vek nung ciang a leng,
Na tupguh na ziak kia a na pan haamhaam theih cia’n,
Na pansan ding bei a na kihawm khai ciang a leng-
Na lung-gulhna kia suanga na pan teitei ngam cia’n:

A tamzaw lam na zuih hang a, na hihna na kep singthou leh,
Miliante toh kikhawla, vaantaangte ngaihnat lohthou sii in;
Na lawm hoih leh na melma in leng hon suknat theihlouh cia’n,
Langleihlou a, miteng in amau lampanga hon ngaih cia’n;
Ngaihdamna leh duat biik neilou ‘minute’ sunga ‘second’ teng-
Khat lelleeng thelthanglou a na zat phattuam theih cia’n;
Khovel leh asung a om tengteng nanga vek hi ding hi,
Tuate baanin ka tapa aw, MI’ taktak na hong hita ding hi!

………….x………….

Mikaang kam in:

IF

By – Rupyard Kipling

If you can keep your head when all about you
Are losing theirs and blaming it on you,
If you can trust yourself when all men doubt you,
But make allowance for their doubting too;
If you can wait and not be tired by waiting,
Or being lied about, don’t deal in lies,
Or being hated, don’t give way to hating,
And yet don’t look too good, nor talk too wise:

If you can dream – and not make dreams your master;
If you can think – and not make thoughts your aim;
If you can meet with Triumph and Disaster,
And treat those two imposters just the same;
If you can bear to hear the truth you’ve spoken
Twisted by knaves to make a trap for fools,
Or watch the things you gave your life to, broken,
And stoop and build ‘em up with worn-out tools:

If you can make one heap of all your winnings
And risk it on one turn of pitch-and-toss,
And lose, and start again at your beginnings
And never breathe a word about your loss;
If you can force your heart and nerve and sinew
To serve your turn long after they are gone,
And so hold on when there is nothing in you
Except the Will which says to them: “Hold on!”

If you can talk with crowds and keep your virtue,
Or walk with Kings-nor lose the common touch,
If neither foes nor loving friends can hurt you,
If all men count with you, but none too much;
If you can fill the unforgiving minute
With sixty seconds’ worth of distance run,
Yours is the Earth and everything that’s in it,
And-which is more-you’ll be a Man, my son!

-000X000-

KRIS THOHNAWNNA LEH GINGTUTE HINKHUA

Easter Sunday Message

Gelhtu : Upa G. Khamkhokam


“Huan Jesu’n a kiangah, Kei thohnawnna leh hinna ka hi; kuapeuh hon gingta tuh si mahleh a hing gige ding”. (Johan 11: 25)

Toupa Jesu’n sihna zou a A thoh nawnna hih Kristiante a dingin thugin bulpi leh akingakna suangphum ahi a. Paula in leng “ Huai Kris kaihthoha a omkei leh, I thugen uh bangmahlou ahi dinga, na gin uh leng bangmahlou ahi ding hi” (I Korinte 15:14) na chi hi. Ahi ngut tak a, theih pihtute’ theihpih pen leng “ Kris thohnawnna” ahi hi. Huai ziak takin, khen khatte’n Kristiante chiamtehna hih kros hilou in, han apan athoh nawnna etsakna in “ Han vuak/ Han hawm” hizaw leh achi hial bang leng om uh hi.

Kristiante a dinga Kris thohnawnna apoimoh dung zui in, khovel a mi tampite’n Kris hong pianna pom thei mahle uh, A thohnawnna pom haksa sa uhi. Kristian kichite lak ah leng Kris thohnawnna pom theilou om uh hi. Khovel in Toupa Jesu sihna zou a athohnawnna nialkalh mah le uh, Khasiangthou hongtun ni a nungzuite’n Tanchin hoih apuan khiak masak ni un “ Huai Jesu tuh Pathian in a kaithou nawnta ngeia, huai theite I vek un I hi uh” chi ngam uh hi. Tuni a ei gingtute leng Kris sihna apan a thoh nawnna pom aa gingtute I hi uh hi. Hiai ginna in Toupa thohnawnna thilhihtheihna in I tung uah nasem in, hiai khovel hamsia a dim I zou thei uh hi. Kris thohnawnna thilhihtheihna in hon piak hamphatna I dawn tampite lak a khenkhat I en ding uh:

1. Kris Thohnawnna In Khamuanna Hon pia:

Toupa Jesu Kris kros a kilhbelh a om a, si a vuia ahong om chiangin; mi huat leh eng bawl a om leng poisalou a Amah na zui sekte lau ua, vuallel kisa a liingin, kibu mang uh hi. Himahleh sihna apan thounawn Kris in amaute hong veh in, “ Na tung uah khamuanna om hen” akiang uah hongchi hi. Toupa’n sihsanta hii aa kithei a, lungdongte’n khamuanna hon nei non in, sihna letdet zohlouh Toupa neitu ahi uh chih hong kithei khia uh hi. Huai khamuanna in sihkihtaakna sal atangte tengteng suakta sak hi ( Heb 2 : 15). Huai ziakin, Toupa Jesu neite’n zaw han mial vot dekduk akipan aleng pii gaalkai thei sihna zohlouh belampu nei ahih ziak un, khamuanna khovel piak bang hilou khamuanna bukim neitute hi uh hi.

2. Kris Thohnawnna In Lam-etna Tultheilou Hon Guan Hi:

Jesu sihnung in huai Emau lampi apaite’n beidong tak in “ Kou Israelte tanpa ding a hih ka lam et et uh toh,” (Luka 24 : 21) chi ua, a Heutupa un asihsan ziak a amau kholam a paite’n leng lam-etna thak hon nei in “ Toupa A thounawnta” chi in hong kikou khe ngamta uh hi. Toupa Jesu damlai a akiang a, “ Toupa, kua kiang ah a hia ka pai ding uh? Nangman khantawn hinna thu na nei hi” (Johan 6:68) chi tupa Peter ngei leng, Jesu’n asihsan nung in lung dong leh mang bang in, Jesu’n a sap masaklai a aneekzonna, a nga matna lam ah kik non hi. Himahleh, mihingte lungsim ngaihtuahna in amuhphaklouh ah Pathian lem geelna in mihingte na ngak a, vaan gam lam-etna tul theilou tang ding in Toupa Jesu’n Peter vanaih nawn hi. Kris sihna ziak a beidong Peter tuh sihna apan thounawn Kris in va zong khia in, Kris adinga hing a, Amah a dinga a lubuuk leng phal ding khop in lam-etna thak in hong dim nonta hi. Sihna in mihingte beidong tongkhong in hon koih sek mah leh, sihna zou a Kris thohnawnna thihhih theihna in zaw gingtute lam-etna thak leh lam-etna tul theilou, sihnung lam-etna hon guan hi.

3. Kris Thohnawnna In Hangsanna Hon Guan Sek:

Toupa Jesu'n kros pua a kalvari lam manoh a vuallel tak a apai lai a, panpihtu ding akiphatmoh lai in a nungzuite’n kibuk mangsan ua, amah zuitu ding omlou uh hi. Toupa Jesu toh hun nuam a zat khawm lai ua, kihangsansak tak a pau phaan phaan sek Peter leng Amah taisan tute lak a atal lang penpen khat hi. Hihmahleh, sihna in a let-tang zohlouh a, hankhuk apan thounawn thilhihtheihna in amat khak takchiang in, mipi lak ah leng laulou in “ Na kilhdeen uh ka Toupa ahi a, vualzou in a thounawnta, chih theihpihtu ka hi” chi khe ngamta hi. Khovel ma a taisia a, lau a ling keuhkeuh kawm a kros paw sekte leng hiai thohnawnna thilhih theihna in a mat khaak chiang in, Pathian adinga pasal pha leh, nu suan huai hi thei zel uh hi. Huchi bang Kris thohnawnna ziak a vualzou hinkhua neite I Saptuam un kiphamoh hina mai zen e!

4. Kris Thohnawnna in Khantawn Hinna Hon Pia:

Bang ziak a hiai Kris thohnawnna in khamuanna hon pia a, bang ziak a beidongte lam-etna thak hon guan a, bang ziak a hiai thohnawnna mah in mi dawilokte hon suhangsan ahi ding? Aziak ahihleh, hiai Toupa thohnawnna in Khantawn Hinna hon piak ziak hi. Hiai khovel lungkham mangbatnate’n a sukbuai phaklouhna mun ah, Toupa thohnawnna in ei ding in khut a lamlouh Inn hon bawl sak a; hiai khovel hinkhua tulpah ding khenlam ah hinna thak hon kawkmuh ziakin, sihlauhna apan in gingtute honpi ngalkai in, hangsanna hon guan hi. Kris thohnawnna zaw khantawn khantawn daih ding hi a, chikmah chiang in si nawnlou ding hi. Huchimah bang in, hiai Kris thohnawnna thilhihtheihna zalzoutu: gingtu diktakte a ding in hiai khovel a sihna zaw hinna thak leh deih huai zaw kipatna lel hi a, huai in khamuanna leh lam-etna hon guan hi.

Huaiziakin, tuni a Easter Sunday I zat un, mi malmalte’n I hin dante uh ki-en chian ni hang. Kris thohnawnna thilhih theihna in I hinkhua hon suklamdanglouh hinkhua nei I hih in zaw, Easter Sunday tam veipi zang mah le hang, Independent Day hiam, Republic Day hiam zang toh kibang lel ding I hi uh. Huaiziak in, Kris thohnawn ni I zat in, ei a dinga sihna apan A thohnawnna ziak – khamuanna, lam-etna tul theilou, Setan dou ngamna ding a hangsanna leh khantawn hinna tangthei ngei ding in, hiai thohnawnna thilhih theih leh thupi in I hinkhua chiat uah nasem leh chih I kideih sak hi. Amen.

Thursday, April 1, 2010

INTERVIEW ON SPECIAL ISSUE

L.CHinkhanlian, Editor, Manipur Express

Khamkhokam Guite


Khamkhokam Guite,Chief Engineer(Power &Electricity),Govt of Mizoram leh L. Chinkhanlian Editor,Manipur Express houlimna:

Manipur leh Mizoram State kizom hilhel a om hinapi electric leh power tungtang ah kilamdanna leh kibatlouhna thupitak a om hi. Manipur ah load shedding nite ah nitaklam dak 5:00 vel apan meivak mit vengveng in nitak 10:00 in vak nawn a, huaizawh nitak(zankimlai) dak 12:00 in mit nawn vengveng hi. Meivak pai nite ah lah nitak tunglam in dakkal bangzah hiam mit teitei a, meivak paini chih himahleh nitak dak 10:00 tan kia meivak zel hi. Load shedding leh mei vak paini kichite ah leng sun khua a meivak chih om ngeilou in vak leh mit thuah zel hi.

Tuma chilehang kumlui ahita a, November 24, 2009 in Mizoram ka vazin a, Nov. 24,200 nitaklam dak 3:00 in Aizawl ka tung a, ka tunni a kipan Nov. 25,2009 sunnung dak 1:30 kikal in electric mei vak minute 15 vel a mit a, huai chihlouh electric meivak a mit lam himhim kitheilou, Manipur tawh ka teh kak chiang in lamdang kasa a, thil hithei vuallou dia ka ngaih Mizoram ah hibang khop a mei vak regular thei mawk bangchidan hiam, bangziak hiam chih ka thei nuam petmah a, Pu Khamkhokam Guite, Chief Engineer(Power & Electricity) Govt of Mizoram tawh ka kimuhna uah huai tawh kisai a dotna tamlou ka bawl aman hon dawnnate mipi adin bangtanhiam phatuam dia ka gintak ziakin tomkim takin anuai bangin kon taklang hi.

ME=L.Chinkhanlian,Editor/Manipur Express KG= Pu Khamkhokam Guite,CE

1. ME :Mizoram in peak hour in meivak Mega Watt bangzah a poimawh hiam? Hiaite koilai source apan na ngah uh hiam? Hiaite’n na poimawh uh taksap a hu(meet) zou hiam?
KG: Mizoram’ peak demand hih 100 Mega Watt(MW) vel bang in kigen sek mahleh, tutadih in 65 MW ka neih chiang un loadshedding om hetlou in meivaak kinei thei hi. A State sung a generation(Q.2) te ban in Centre Pool leh Tripura apan Mizoram share hichi bang ahi.
A.CENTRAL SECTOR:
Sl. No. Power Station Mizoram share in MW
1. Loktak HEP(NHPC) 4.56
2. Khandong HEP(NEEPCO) 1.97
3. Kopili HEPNEEPCO) 9.24
4. Kopili-II(NEEPCO) 1.57
5. AGTPP(NEEPCO) 5.20
6. AGBPP(NEEPCO) 15.80
7. Doyang HEP (NEEPCO) 3.93
8. Ranganadi HEP(NEEPCO) 23.13

TOTAL 65.39


B. STATE SECTOR:
Baramura(TSECL), Tripura. 5.25 MW

A vek a gawmkhawm(A+B) = 70.64 MW

Hiai atung kigente hih’ Mizoram in ‘a thu a’ State pua apan power share a neihte uh chihna ahi a, power station te’n buaina tuamtuam aneih ziak un ‘a thu a’ share kinei zahzah bel kidong deksuailou hi. Huai ziakin, poimawh zah, taksap zah leng huzoulou hi.

2. ME: Mizoram in a state sung a Hydel Power Project hitaleh power generation bangzah na nei ua, huaite apan na requirement uh bangzah a huzou hiam ?

KG: Mizoram sung a kou khut suak Hydel Project zawhsa leh akizang lel 9 ka nei ua. Hiaite louleng akizang thei nonlou bangzahhiam a om a. Huanah, Serlui B SHP 12.00 MW alian ka bawl lellel uh May 2010 vel a hon theih ka lam-en uh. Kou own generation ka neih uh hiai bang ahi:

SHP = Small Hydel Project
Sl. No. Power Stations Installed Capacity in MW
1 Maicham SHP 2.00
2. Serlui-A SHP 1.00
3. Khawiva SHP 1.05
4. Kau-Tlabung SHP 3.00
5. Tuipang SHP 3.00
6. Teirei SHP 3.00
7. Tuipui SHP 0.5
8. Lamsial SHP 0.5
9. Maicham-II SHP 3.00
10. Bairabi Thermal Plant 22.92

TOTAL 39.47

Hiai atung kigente lakah Sl.No 10 na hih’ Thermal Plant ahi a. Khatna apan 1 – 9 bel Hydel Project ahi uh hi. Hydel Project te hi’ tuuk vuah tam lai in hoihtak a ki-run thei a, khaallai in a hihleh tui taksap ziak in bangmah tham pe theilou uh hi. Huan ah, Thermal Plant pen leng unit generation cost a san ziak in, ‘stand by’ in kikoih a, a kul mahmah kei leh ki-run lou hi.

3. ME: Manipur in power source hoihtak (NHPC apan) Loktak a muh ban ah, Powergrid apan leng a poimawh MW 100/120 sang a tamzaw a muh ni leng om mahleh akum khawtawn a meivak regular louh ziaka ka buaina uleh haksatna uh na ngaihdan in bangziak ahi ding? Hiai solve na ding in bang lampi om din na thei a ( regular tak a electric meivak ngahthei ding in)

KG: Manipur in leng Central Pool apan Mizoram sang maha amihing tam zaw ahihchiang in, Mizoram share sang a tamzaw nei hi. Loktak apan in a share mongmong banah,12% a gam neitu ahihziakin, athawn in mu hi. Huan ah, tupna om hileh bel Centre pool a akidaih kei leh leng, private power producer-te hiam, Centre power sector te tawh hiam, ahihkei leh, State khenkhat tawh Power Purchase Agreement (PPA) signed in power lei thei uh hi. Huai malak in, NERLDC wed site i et chiang in Manipur in centre pool apan a quota uh leng draw khitlouh chang hau uh hi. Aziak om theite ahih leh-
i) Transmission leh transformation infrastructure-te hoihlouh luat ziak in power deihzah Manipur in lalut theilou hiding hi.
ii) Manipur sum-le-pai a ahaksat luat ziak in, power lei na’ng sum neilou uh hi ding hi. Huai ziak in, Lamka khawpi khong a power a omlouh ciang in Manipur in sum tampipi save dan a kingai uh hithei hi.
iii) A Department a nasemtute duk-daklouh ziak leh a solkal lam in leng ngaipoimawh tawklou in; electric neih gige a, zan tenga electric khua teng leh veng teng a vak phengphang gige chihpen Manipur gam a ding hilou a koihna nei uh zong hithei hi.
Hiai atung igen teng dik deuh vek ding in ka gingta.

Electric regular a neihna ding in solkal in a ngaih poimawh ngai a, a lampi ding a zon uh ngai hi. State solkal in ngai poimawh leh, a Department nasemte a ginat kei ua leh gawt ding ua, Transmission leh transformation ahoih kei leh puahpha in a bawl hoih ding uhi. Power akidaih kei leh bawl belh hiam, koisan akipan hiam a lei beh ding hi mai. Hiai atung ate hihloua, a short cut dang om thei ding in ka ngaih tuah kei. Central solkal in leng khua-le-tui teng in electric aneih ding ngai poimawhlua uh ahihchiang in, Manipur solkal in mipite electric piak tum taktak le uh, Mizoram te hihzawhtan beek ahihzawhlouh na’ng uh om in ka thei kei.

4. ME :Manipur a electric official khenkhat in a system lui gawpte HT line te hoihtak a power load a kikhah chiang in a gui niam hiaihuai maimah a chi ua, Mizoram a system kizangte a lui mah hia a thak na thuah uhia, bang chik akipan hiam?

KG: Manipur a electric gui lamlian kiang a kikhungte i etmai in leng lui lua, khen hunlaw mahmahta uh ahi chih amuh theih mai a. Huan ah, a kibawl dan mawngmawng leng a quality se lua hi. Sub-Station te leng huchi bang thou ahih uh ka gingta.

Central solkal, Ministry of Power in Accelerated Power Distribution Reformed Project (APDRP) chi ua, electric gui luite khen a, ahun tawh kituak a system upgrade na ding in scheme bawl ua. Huai scheme hih’ 2001-2002 apan 2008 March tan a zawh dia a bawl uh ahi a. Manipur leng huai adingin fund Rs 141.62 crores piak in om a, a sum leng Rs 42.76 crores pe ngal uh hi. Ahihziak in, Manipur in huai fund zang a anasep khiak uh February 2008( March 2008 a a scheme top ding) in Rs 2.67 crores ahi a. Kum guk/sagih sung a a progress uh 2% kia ahi. Naseplouh ziak in, Rs 140.00 crores phial taanlawh uh hi. Hiai sum zang a nasep hileh electric gui, transformer leh electric infrastructure te hoih hunkhop suah ding uh hi.

North East Load Dispatch Centre, Shillong-te wed site i et chiang in Manipur in Central pool apan electric a muh uh, a quota ua pan tawmchikchik electric la(draw) uh hi. A Manipur sung a hichi tuk a electric hoihlou a, kining ching si’lou a bangziak a amau a ngawihngawih central piak leng la gailou uh hiam ichih leh, a system a siat luat ziak in a kiphamawh zah electric la ding in a gui leh transformerte’n zoulou uh hi, chi uh hi. APDRP fund hoihtaka ahihna ding banga zat hileh bel huchi bang haksatna omlou ding hi. APDRP lah ahun beita ahihchiang in tua Reformed APDRP achih beek uh zang phatuam le uh, Lamka khawpi beek in phattuampih dingin ka gingta.

Mizoram ah ahihleh electric gui ka khek zelzel ua, Manipur ate bang a lui zen ahi kei hi.

5. ME : Manipur ah transmission loss tam taktak hipha din i gen ua, Mizoram ah huchi om sam hiam, transmission loss bangzah a om pha dia le ?

KG: Manipur a electric transmission loss hih’ India aleng a sanna mun pen ahih ka gingta a, power conclave a ka tel khakna khat a Power Finance Corporation(PFC) te’n Manipur-te loss a sutdan uh hichi bang ahi:

Kum Transmission loss %
2002-03 76.81
2003-04 69.70
2004-05 88.56
2005-06 77.83
2006-07 94.40

Huai conclave ah Manipur apan Power Commissioner, Chief Engineer leh Addl. CE te om ua, PFC te report adik kei chilou uh hi.
Mizoram ah leng transmission loss asang mahmah a, kumkhat a loss percentage, 33% apan 44 % khong ahi tangpi.

6. ME: Manipur ah ka buaipih uh power theft, unauthorized consumer, meter lutlou a heater zat chih khong ahi a, huchibang Mizoram ah a om sam hiam ?

KG: Mizoram ah leng electric gukching atam mahmah ua, ahihziak in Manipur bang zen zaw hilou hi. A Department a sem mihoihlou khenkhatte mah panpihna a aguk uh ahi a, kiven seng haksa mahmah hi. Electric guklouh ding ahi a, a gutute leng a Department in mat a liau sak ding, khenkhatte a connection bang uh leng lak khiaksak ding ahi a. Ahihziak in, a poimawhzaw ahihleh mipite’n electric a neih ding uh ahi.

Kou Department ah ahihleh, khateng in Executive Engineer te’n kha pailiamta a electric connection a etdik uhleh, a gu a mat zah uh, bangzah liausak chih Head Office ah hon report gige uhi.

7. ME: Huailou in Manipur a kigen minthang electric la(consumer) ten fee piak ding limsaklouin ba uh, huai ziakin power kiching ngah haksa ahi chih ahi. Mizoram ah consumer te’n fee piaklam hibang a gen tham nawng kaina a om hiam ?

KG : Manipur hi-in Mizoram ah hitaleh, electric fee subsidy ahi a, mipi in fee a piak khawmte uh bangmah tham hilou a, huan ah, hiai State nih a Electric Department te State solkal a ahi ua, mipite fee piak a kivak leng ahi kei uh hi. Fee bel hoihtak a piak chiat ding ahi tham a, a hihziak in, electric kining chinglou bel mipite fee piak hoihlouh ziak hi khollou ding in ka gingta. A fee pe hoihloute connection sutkhiak sak a, a pe hoihte’n electric a neih ding uh hi. A fee pe hoihlou om ziak a, a State pumpi hiam, District pumpi gawt chih fair lou a, State vaihawm zawhlouhna kilatna lel ahi.

8. ME: Mipi vantang(consumer) hilou in, Government department tuam adiak in Secretariat, Assembly Secretariat, JTO leh department tuamtuam banah office-te a kipan Mizoram in electric fee na muhkhiak dan uh a lungtunhuai huntawk hia le?

KG: Mizoram ah Government Department te’n Electric fee bat ding in a ngaihtuah kei ua, banghiam Department lam haksatna a om ziak a pe zekai chih bel om tham hi. Etsakna ding in PHE Department in Aizawl khawpi water supply pump na a electric power a zat ziak un, a bill uh a crore a sim a hihziak in a khatawp teng in pe mai theilou ua, kum khat a abat uh a crore a sim solkal sum-kum tawp dek kuan khongin hon sung oih zel uhi. Huanah, Local Administrative Department(LAD) in khawlai a street light-te a bill apiak uh ahih ziak un, a lakh a sim a ba sek ua, sum a neih hunhun un hong sung mai uh hi.

Tulai in office-te electric bill bat pe nuamlou chih gen a om non kei. Huanah, abiktak in, Secretariat leh Assembly Secretariat chih khongte a solkal leh a Electric Department neitu ahi ua, electric bill a piaklouh uh chih hi thil om thei ding in ka ngai kei hi. Department khenkhat electric fee pe nuamlou om taleh leng, Secretariat hih’ i va report na mun ding ahi a, a Secretariat office in fee apiak nop kei uh leh bel, lam-et bei leh mipi hi in Department te hileh, fee hoihtak a pe ding a lam-et ngaihna omlou ding hi. A Department ading in leng ‘a hi hi hisuk heh’ chih pilhuaipen ding hi.

9. ME: Electric transformer kisia a om chiang in department in a khen ngaite a thak in na khen sak uhi hia? Huchibang transformer khen ngaite khenna din hun bangtan na lasek ua? Aziak bel Lamka bang a kha ¾ meivak ngol veng a om sek a, transformer kithuah khenkhat a pawlam a thak a sunglam a lui chih a kigen hun tanpha leng om mawk hi.

KG: Transformer hih thil kise ut mahmah khat ahi a, a kisiat teng in a thak a khen chih kuamah in hihzou ding un ka gingta kei hi. Mizoram ah ahihleh, ‘revolving transformer’ bangzahhiam ka nei ua, akisia a om chiang in transformer hoih dang, a thak liklek chihna hilou, lah, zat theih in ka khek ua, akisia pen repair-contractor te kiangah repair ding in ka pia uhi. Huai transformer kisia pen akibawlhoih khit chiang in, a sia a om non chiang a akhekna ding in ka koihhoih zel uhi. Mizoram ah, mipite’n solkal officer-te sang in Minister leh MLA te a maingal zaw ua, a khua/veng uh transformer a kisiat leh a Minister or MLA te uh kiang ah mivantang maimai in leng a report ua, Department channel a report hong tun mama in Minister or MLA te phone, transformer ahoih a khek ding a hilhna, Head office in ka dong zel uhi. Koikawm hiam, khawta’ khong ah kha khat bang transformer kisia kheklouhna bang leng a om maithei a, ahihziak in 3/4 zaw hitellou hi.

Huanah, munkhenkhat a transformer a hun a akikhek zokzok theihlouhna ahihleh, huai veng hiam huai khua hiam in akiphamawh uh transformer chiah, a khekna’ng omlouh ziak ahi a, etsakna ding in, khua khat a a transformer zat lai uh leh a kiphamawh uh 63-KVA bang hihenla, transformer hoih kinei lel 630-KVA hiam bang hitaleh ( or vice versa), amau kiphamawh rating transformer 63-KV om hun ngak ngai ding hi. Huchibang haksatna a om sek a, huaiziak in ut banga kintak a transformer sia khek theihlouh chang om sak hi.

10. ME:Ahihleh Mizoram ah hichibang khop a electric meivak a hoih consumer te’n fee a piak hoih ziak uh hia, ahihkeileh government in fee kiningchiang a muhziak hia? Bang ziak ahi pen dia?

KG: Mipi in fee ahoih piak thou ua(collection efficiency = 98 %), ahihziak in a Department in bel tua sang in pe hoihzawlai le uh akideih a, fee akiningching kei a, a tariff leng amah leh amah kitoudelh thei ding a bawl hilou hi. A electric mahmah leng kiningchinglou hi. Ahihziak in, North East State-te lak a ahoihpen pawl ahihna san ahihleh, a Department, State solkal leh mipite’n electric hoih adeih ziak uh ahi. Electric ahoih kei leh, mipi bang leng Power Minister min sam in aveng aveng ah kikou mai uh hi. Huanah, solkal a milian lam apan in “ Bang ziak a?” chih phone kidong ngal hi. Mizoram a electric a hoihna ziak ahihleh, solkal in a fee kiningching amuhziak hilou in, a Department, solkal leh mipite’n a hoihlou a pomlouh ziak uh ahi.

11. ME:Power tariff domestic consumer-te adia Unit 1 bangzah rate hihiam, individual unit/worshop (HT basis) te bangzah hiam? Consumer-te a pan electric fee kimu power department revenue a general a lak in bangzah % a tungpha hiam?

KG: Mizoram a Electric tariff (metered supply), tua kizang lellel hiaibang ahi:

A. Inn sukvak na’ng a zatte-
• 1 – 50 kwh @ Rs 1.45 for all units.
• 51 – 100 kwh @ Rs 1.75 for all units
• 101 – 150 kwh @ Rs 2.20 for all units
• 151 – 200 kwh @ Rs 2.90 for all units
• Above 200 kwh @ Rs 3.65 for all units.

B. Sumdawnna a zatte –
• 1 – 100 kwh @ Rs 2.30 for all units
• 101 – 200 kwh @ Rs 3.80 for all units
• Above 200 kwh @ Rs 4.55 for all units.

Power & Electricty Department, Mizoram in kum khat a a revenue muh zah a kirual a lak in Rs 57.06 crores vel hi a, Plan Fund Assistance om hetlou a a Department akhe a adin theihna’ng a revenue a laklut ngai ahihleh Rs 190.81 crores vel ahi. Huai ziakin, a Department in fund akiphamawh zah revenue in 30% kia huzou hi, chihna hi.

12. ME:Manipur government in singtanggam khua om teng leng meivak piak vek ding chih thupi in nei uh a, singtang kilkoi tanpha mun khenkhat ah electric khuam phut uh a, hileleng a gui kikhung ngei tuanlou bang om hi. A gui kikhunna mun khenkhat ah leng power (electric) a om ngeilouh ziakin a gui kigumang maimah sek a, Mizoram ah huchi a om sam hia? A gui kikhunnate a current paisak na hi uhiam?

KG: Electric khuam phut a, aban sunzomlou a nawtsiat chih hih’ a nna zawhvek na’ng a sum paiteng a khuam phuhtan chauh daihsak ua, adang teng a semtute’n negai uh chihna ahi a, mipi leh a gam a teng a huai zalzou dingte’n i pom a, i daih dide ding uh hilou hi. Mizogam ah leng huchi bang hih’ 1980, 1990 leh, chih hunlai in mun kilkoi khenkhat ah om a, ahihziak in, tuni ciangin huchibang om theinon vual hilou hi. Mipi leh mipi ai-oh, a bial neitute’n pomthei peuhmahlou ding uh hi.

Central Government in kum 2012 chiang in khua tengteng kia hilou a, inn tengteng in electric a neih vek ding chih policy, Bharat Nirman nuai a Rajiv Gandhi Grameen Vidyutikaran Yojana (RGGVY) a chih nuai uah nei ua, Electric khua 1.2 lakh aluutsak vek ding, singtang leh khawta’ ateng innkuan 2.46 crore omte electric connection piak vek ding chih ahi. Hiai scheme in CCpur District a huamta hiam(a DPR ahihleh a submit ta ua) Ministry of Power in a pom uh leh pomlouh ka confirm thei kei a, Tamenglong District ahihleh huamta hi.

Hiai RGGVY hih’ thil poimawhlua ahi a, hichibang scheme om non zoklou ding hi. Huaiziak in, ngaihven a, koi khua teng huam hiam, a huamsung ah ahiding bang in na akisem hiam, chih ngaihven a khahsuahlouh ding ahi. Central Guideline strict tak nuai a nasep ahihziak in, RTI Act zat phatuam a, lungkim huailou a omleh Ministry of Power a thudik tut ding ahi. Huanah, a scheme kibawldan bang leng Electric Department apan lakkhiak a, huai bang in akisem hiam chih etzui pih ding hi.

13. ME:Mizoram tawh kigamgi Manipur a khuate apan nitak in Mizoram i gal et chiang in electric meivak phingpheng a, Manipur a khuate ah vak omsunte bel solar lamp leh inverter khawng hi maimah hi.

KG: Electricity Department, Manipur te wedsite a kimudan in CCpur District sung ah khua 502 ( Cencus 1991 dungzui in) om a, huai khua 502 omte lakah 391 kum 2001-2002 tana electric kipevekta bangin kigelh hi. A District sung a khua om tengteng lakah 77.89% khuate electric vak phingphengta chihna hi. Electric piak khit khua 391 te lakah ei lam bel tel khalou hihtuak hi.

A State solkal in electric a piak ziak un Mizoram a singtang ah leng electric vak a, State solkal in electric pe kei leh vaklou ding uh hi. Manipur solkal in i singtang khuate uh electric apiak louh ziak ua, electric neilou ahi ua, pe le uh nei maiding uh hi. Mizoram ah leng solar lamp leh inverter akizang thou a, ahihziak in, huaite ‘stand by’ in kikoih a, electric a omlouh chiang in kizang hi.

14. ME: Lampi om hi a na theih bangbang a om hiam? Government kia hilou mipi lam in leng mawhpuakna, sep ding leh panlak dia hoih nasak non kawkmuh theih a om hiam ?

KG: Mipite mawhpuakna ahihleh, a hoihlou himhim - electric hi in, tui, skul hitaleh, thil dangdang ah leng ahoihlou pomlouh ahi mai a. ‘A hoih neih ka right ahi’ chih bilbel a, ahoih na’ng leng zon ahi mai a, thil khat ahoih kei a, a hih hoihloutu in ahih hoihlouh man agah alawh tuan kei leh, hih hoih tupna omlou ding hi.

Huanah, Manipur Simbial i chih Manipur sung a om ahi a. Manipur ahoih kei leh, Simbial hoih tuam theilou ding a, thil bangkim hoih dia i deihleh, Manipur bawl hoih angai dia, Manipur i bawl hoih zawh kei ding a: electric, tui, lamlian, skul leh thil bang peuh a hoih i deih boksi’ in tuh, Manipur a peng khat hihlouh mai a solution om sun hi.

Lamka ah hi in, a Manipur sung mun dang ah hitaleh, electric infrastructure hoihna omlou a, tuni tan a bawl hoih om lou a, bawl hoih dia malakna leng muhtheih in omlou hi. Huaiziakin, tua Central Sector nuai a State tuamtuam a power project kibawl lelte honzou le uh leng, Manipur in a share lalut theilou dia, lalut theile uh leng a electric zangtu mipite kiang ah hawmzak theilou ding hi. Huaiziak in, Manipur ah RGGVY zat phattuam ahih kei ngal leh, electric hoih hun ding muhphak in omlou hi. “Manipur zaw hichi mah hi” chi a thilhoih mongmong lam-et neilou a khawsak ding hilou hi. Mipite’n electric hoih deih tuntun le uh, mipi ai-ohte’n amau tunung ding a khualna un hon semkhe mai ding uhi.

UPA BUANGPU LEH KEI - IV : Gam, Kho' Hausa Leh, Mipite

Gelhtu : Khamkhokam Guite

Innkong ka tun apan in Pa Buang thawm ging zaak theih ngal hi. Himahleh, thil lamdang lua in ka koih kei. Aziak ahihleh, Khawmpi Lian hoh hong tunna sawtlou ahihciang in, gen ding leh sak ding ahauh ding dan ka suangtuah thei mai hi. Saptuam toh kisai lampang ahihleh, kikhop tengin ‘Khawmpi Report’ cih suanlam in amahleh amah hun kipe gige thei a. Ahih ziakin, Khawmpi Lian a hohna a amuh leh zaak khenkhat, Saptuam toh kisailoute tua a gen keileh cikcianga koi a gen tuan ding hiam cih ka ngaih tuah ciangin, siamlouh ka tan thei kei a, a hi ding mahin ka koih hi.

Innkong hul-liap ka tun in, innsung a “A inn ki-um dan bekbuk khawng mahmah uh leh, a keelkong bawl dan lemlom khawng mahmah uh et mai a leng ngaihdan thak, ciin dan thak leh hoih zaw, zong-a- pawm thei ding ahi mahmah sam ua, a Jerikou kulhte uh Pathian thilhih theihna a cipsak ahih mateng huci ding mah hi uh”, acih lualua ka za hi. Pa Buang in kuate gen hiam cih theikei mahleng, ami gente om ding dan: Teengkawl, a Hawngsung(shell) a pan khovel en liakliak a, thilthak leh lamdang deuh a om cianga amah Hawngsung mah a, lau a tumkiik zel toh kibang ding un ka lungsim mitkha in muthei hi.

A pau pauna, ahuu in a gawlgui muutkeu gawp ahi ding a, innteeknu’ omna lam - An Huan Inn lam hi dia a gintaakna lam ngaphei in, “Kei a ding a huum. Singpi huum ka duh ziak a khopi a teng ka hih kha!” ci phei hi. Upa Buangpu ngaihdan tam zawte, kei bang a, a bilh-a-thouloute a dingin akciangtawn aleng ka sawk phaaklouh ngaihdan ‘loupi’ himahleh, singpi dawn lampang ahihleh ka kithukim theihna uh, a ngaihdan ka kop-pih phaakna omsunte laka khat hi!

“Khawmpi Lian hoh kawm a, pai man mahni za-ip apan senglou a, Pa Buang in a sung’te/ apu-zonte hon veh kawm ngal ahi hon ci ua; Lamka a Kris bazaar bok, Khawmpi hoh na zang phatuam ve. Teek nung - vuai nung tanpha a sung’te hucitel a tlon ding ahi dia hia? ” ci a ka ciam nuih leh, Pa Buang in “ Khawmpi palai suktawm ding cih ‘Agenda’ khong na ‘move’ non kei le cin hi mai, pai man senglou beek a sung’te I veh kei tel in” ci in, thu guuk tawpkhawk hon hilh bang in, mi lakah hon mitsiin gaih hi.

Lungkimna toh singpi ‘huum’, lum vitvit akam dim in valhsuk a, “Ci lailai le” ci in a houlimna baan sunzawm hi. “Minam kici in gam leh a sunga tengte huam tel a. Gam omlou in Minam omlou a; a gam pek vuak, gam awng vuak – asung a teng ding omlou gam awng in zong Minam bawl theilou bok hi. Zogam ci in la-in-sa in, awi awi mah le hang le, Pathian in gam honpiak I nawtsiat a, gam awng a I koih leh, Minam piang theilou ding hi. Huai dingin mipite leh I gam uh kilaigui zopsak kiphamoh hi. Hici ahihkei leh, khovel pian ken in awng (vacuum) ngaitheilou a;, a awng a omleh, koilai hiam, koimun hiam apan in huai ‘awng’ huu dimtu ding hong pai ding ua, I gam uh midang gam suak ding hi”, ci hi.

Pa Buang in huci bang hon gen leh, ka lungsim mitkha in ka kholui uh gam sung a, “Gaal-leengte khomun lui” kici mun khong amu dundun a. Huai ‘Zamsel kawl’ lam a cik a kisial hiam cih theihlouh lamlian hileh kilawm kisial khong ka lungsim ah hong lang hi. Hiai Zogam – zaan khomial a ka ihmut cianga ka mangmat a, suun khovaak cianga ka ngaihtuah gige; cikni ciang hiam a kuate hiam gam suak ding a, ka neulai khomun khong ‘Zomite khomunlui’ acih mai ding uh ka ngaih tuah ciang in patauh huai kasa hi.

“Ahihleh, Pa Buang, bang ziaka huci bang I gam ua tung ahi ding, bang ziak a I gam uh bawl hoih tumlou a, taizaak mai mah I hi ding uh?” cih, diip phu litlit kawmin ka dong hi. A man hici bangin a baan sun zawm hi, “Tua i om dan uh ahihleh, mipite, mimal gam- Hausate gam a vateeng, Sapte’n ‘tenant’ acih mai uh bang deuh ahi ua. Mipite’n a luah uh gam ah ‘right’ neilou ua, mi khat in midang khat inn luahman(bhara) nei a a va luah toh kibang ua. Huai ziakin, mipite’n lungsim taktak a kipna, gam leilung: guh – le - taang sung apan hong kipan itna toh, it taktak theilou uh hi. Huaiziak in, mi inn luahman nei in na va luah a, tui hiam, naupangte skul kaina hiam a haksatna na tuah ziak in, mi inn luah nana anuam zaw na zon non mai bang lungsim mipite’n pu’ uh hi. Tua na inn luah nang a hita leh bel, tui a haksaat leh, pem khiak mai tumlou a ‘tuikhuuk/Well’ tou ding cin a, skul kaina a gamlaat leh, Gari ngaihtuah mai ding na hi hi.

Hausate min a gam Patta teng a om ziakin, Rural Development Fund hong pai ciang a zong Hausa pa mimal min a hong pai a, a Policy bawltute’n a tup leh a ngiim uh mipi vangtang leh khosung a dinmun haksa zawte khut a a fund a tun ding zah tunglou a, a ‘kopi’ ah a sum tam zaw tum mang gige hi. Huai baan ah, Hausa I cih pian dan a mi khat a pu-leh-pa Hausa ahih ziak mai ua Hausa hi a, khosung khata amawlpen leh dot-taaklou pen, gam leh minam itna cang theilou penpen leng Hausa in pang thei hi. Kiluah sawn theih mipi heutu hihna dinmun (public servant) I cih India gam banga Democratic Republic toh kituak lemlou hi. Mipite’n ‘kho-phawkna/ngeingaihna/awareness I neih nailouh ziak maimai ua Hausa Institution, tua a om banga I gam ua om lailai hi”, ci hi.

“Pa Buang, khenkhatte’n Hausate tunai a kimu khawm ua; tulai hun Hausate a dinga ‘golden chance’ ahi a, tulai a Hausate lak a concrete innsawng leh car nei zoulou tuh mihai himai ci ua; huai dia gam zuak a, gam sung a sing, gua leh mau teng zuakbei dinga kifuih uh ahi ci ua, nang ngaih dan bang a hia?” ci a kana dot leh, bang a genna hi ding hiam, “ Sing a gah ah en le u’ cin, ahihna tak alang mai di” cih kia in hon dawng hi.

Pa Buang in a gen zelna ah “ Tua I Hausate uh mipite’n a deih ua a teel uh hilou ua, huaiziak in, mipite tung a mohpuakna (obligation) leh duty nei aleng kingailou ua. Hausa hoihlou paihkhiak theih na’ng Dan lah omlou a, Hausa hoihlou khua akipan a peem khiak hi ri-ngot mai hi. Hiai hih’ India Constitution spirit kalh hi a, a kinthei pen a bawl dik ding hi. Huai ciang a, tuni a singtang Hausate a Hauhsakna khua ua omlou tam mahmah ua, agaal apan kho Hausa/‘Non-Resident Chief’ ngen hita uh hi. Hiai in khosung vaihawmna ah haksatna lianpi piangsak a, khosung leng a khantouh ding bang in khangtou lou hi. Mipite’n a kho Hausa ding ua a deih pen uh, hunbi nei in teel le uh bel, a khosung a teng mah, Hausa dinmun a ding thei ding mah teel ding ua, thil bang kim ah–‘grass root political awareness’ ah hita hen aw, gam sung khantouhna lam citeng ah phatuam ding hi”.

“Ahihleh, Pa Buang aw, bang loh ding I hita mah ua le? Nam damna ding a kul leh poimoh hi a na theihte hon hilh ve le” ka cih leh hici bangin hon dawng hi, “ Ei toh kituak dinga ka up ahih leh, Nagate hih dan ahi a. Nagate’n Gaoburra ci ua, ei Hausa toh kibang nei sam ua. Ahihziak in vaihawmna leh thuneihna taktak bel mipite deihteel, ei Village Authority(V.A.) toh kibang nei ua, huaite khut ah om hi. Gaoburra/ Hausa pa lal a, ahihziak in, Village Authority in thunei hi. Hausa pa, Hausa pa ahihziak mai in – khosunga hinkhua hou pen pawl leh, heutu dinmun cinlou pen hileh zong Village Authority (V.A.) Chairman in pang mawklou hi.

Huanah, huai a khua un a etkol gam - kho mipite kihawm uh a, khua-le-tui tengin huai atenna khua ua V.A. gam etkol sungah amau min in gam nei ciat uh hi. Huai ziakin, huai khua a teeng tengteng in ‘neitu’ hihna nei ua, huai gam toh kilaigui zopna nei uh hi. Bible in “Na gou omna peuh ah na lungsim leng a om ding” ci hi. Nagate gam leh nam itna kibulphuhna hiai ahi ci le hang gen uang kihilou ding hi. Huci banga amau khua a gam, amau min ngeia ahon neih ciat ciang un, huai khua ah kikhual uh a, ‘neitu lungsim’ diktak leng honpu ua, huai a tenna khua uh hoih leh hoihlouh ah mohpuakna nei in leng kithei uh hi. Mipite’n lungsim detdou nei ua, bang hiam haksatna zek a om ciangin peem khiak mai tupna neilou uh hi.

Eilam ah ahihleh, Nagate bangin I tenna khua leh agam sungah mipite’n tantuan I nei kei ua, I tenna khua a Hausa pa gam vasiim bang lel I hi uh hi. Huaiziak in, I tenna khua a haksatna – skul tungtang hiam, tuineek hiam, lamlian tungtang hiam, neek-le-taak thu hiam, ahihkei leh, thil dangdang a nawngkaina a om ciang in, a hoihlou bawl hoih tupna omlou in, pem khia a, mi tate’n mun nuam zaw leh hoih zaw a ana bawlna mun uh I kidelh huan pahpah uh hi. Huai ziakin, unau Nagate’n eiloi “ Nomadic Tribe” honci uh hi. A dikna tan leng om hi. Hici bang a thil apaitouh zel leh, tunung sawtlou ciang in Manipur Simbial singtang gam teng gam awng suak ding hi. Huanah, bang hangin, kua ta in, amah aleng hilou, mimal(Hausa pa) gam a vasiim maimai humbit dingin a lubuuk a phal zenzen dia awi?

Tuni in mipite laka gam hawmzaak ahihlouh man in, Hausa khenkhat in gam zuakzuak uh a, khua khenkhat ah mipite lou neihna mun ding om nonlou phialphial in, singtang lou neih a neek zongte mabaan ding lungziin huai mahmah suak hi. Huanah, huci banga Hausate’n gam azuak uh khaam dinga kilawm ‘pawl’ khenkhat a heutute mahmah in singtang a Hausa khenkhatte apan in gam lian pipi lei khia uh hi. Huci bang gen khawmna a om ciang in, Maukot gam, Aibulawn leh Lungcin gam gen khaak in om veu uh hi. Mipite laka gam hawmzaak, Nam-leh-gam humbitna hoih pen a ngai in, Mizogam bangin leng tua gam awng om lai teng mipite kianga hawmzak tupna nei uh hi. Mipite’ laka gam hawmzak I cih, nam-leh-gam itna bawltu ahihbaan in, I kim leh kianga India khua-le-tui hi thou, Dan pansan a I lak ua ahong teen ding uh I daal theihlouhte daalna hoih pen hi” ci hi.

“ Pa Buang, tuni tan a minam bang a dam khosuak lai sam hang a, thil teng a selam a gen gen ding ahi dia hia?” ka na cih khialkhial leh, guul a mei a vasiik khaak mah bangin kei lam hong nga phei in, “ Andaman tuikulh gam a nam mawl puan-ak silh nacang leng theilou, Jarawa tribe te leng dam lai uh ei mah ve!” ci in hon hawk khum phei hi. “Gamsa bang a khosa a, tulai khovel khantouhna khat leng a zaalzoh neilou a I mi I sate uh a om nang poisalou maw? Electric neilou, lamlian omlou, health care lah omlou, solkal skul teng lah kum sawm nih val paita apan beivek, tuilawng(Water pipe) a tui siangthou khoteng piak ding cih lah eilam a vaan a khai bang a kilam-et phak vual hilou, ‘law and order’ lah omlou, ‘rule of law’ a vaihawmna lah om boklou. Naupangte mid-day meal ding teng koi a om, BPL ration dinglah koi lam tungta? Tua, singtang lamte louhneihna gam omsun teng lah zuak mang vek ding hita. A hoih gen ding om leh, gen gen nuam kei mah ve” hon cih san hi.

A gen zel na ah, “Nam cangkaang hi dingin I lak ua a zawngpente, a mawlpente leh a tuantualpente bang tan hiam atun ua, a cangkaan’ ding uh hi. I lak ua tawmkhate lai a siam’ ua, sepna sang nei I om zekzek ziak ua nam cangkang a ngaih kihilou in, a mipi vantang tam zawte a cangkaan’ ciang ua nam cangkang kihi ding hi. Zomite lak a khen khatte, pil-a-siam khenkhat om ua, foreign tanpha vasiik kha leng om uh hi. Ahihziak a, inn lam hong pai ciang ua, phaitam awngvang peuh a ektha maimai ahih ziak un, nam mawl leh nam tuantual, mite nuihza buuk hi thouthou uh hi.

Tuni ciang in, India gam khovel a solkal hat leh hausa gam khat hita a. Gam sung masawn na’ng leh, gam mipite makhua khualna in kum teng in scheme hoih pipi phualpi solkal in bawl khia hi. Huaite zalzou thei dingin leh, I gam uh masawn na’ng in mi dang, nam dangte’n hong sepsaklou ding ua, ei a gam a tengte mah in I sepkhiak ding uh hi. Hausa Institution I cih a hoih lai leh, I kiphatmoh lai bel om mah hi. Ahihziak in, tuni ciangin I gam leh nam in khan nelhta a, Institution dang, ‘village level’ kivaipuak dan dang ahun toh kituak I neih uh hunta hi. A hun toh kituak a pan I laak a, a hun toh kituak Institution I neih kei leh, hun in hon taisan ding a, khovel tangthu a ‘footnote’ zawng kiluah zoulou ding hi” ci hi.

EBC SAPTUAM IN I NGAIHPAWIMOH DINGA KA DEIH THIL NIHTE

Gelhtu- Upa Khamkhokam Guite

1. SAPTUAM NASEMTE LEH A INNKUANPIHTE UH: EBC Saptuam in nasemtu tuamtuam Pastor, Division & Field Superintendent leh Saptuam Skulpu te nei hi. Hiai Saptuam’ Nasemte singtang leh mun tuamtuam ah apoimoh dan dungzui in Saptuam in koih zel hi. Saptuam Nasemte a sepna mun ua innkuan a a om uh Saptuam in lam en in, a va omna Saptuam uh a ding in hoih hi. Huanah, a innkuan pihte uh, a diak in azite uh a omna Saptuam uh adingin phatuam uh a, huai ban in, I theihsa leh I thil tuah tuamtuamte ua pan I et leh,Saptuam Nasemte a sepna mun ua innkuana a om ciang un, minsiat leh lamkhang a siik-khelh khaak ding uh zawng veng hi.

Saptuam in I theih dia hoih khat ahihleh, Saptuam Nasemte nang leh kei banga mihingthou ahi ua, huai ziakin, kei leh nang kiphamoh teng kipha moh uhi. Etsak na’ng in, tate lai zilna lam ah. Kum a sawm-a-siim paita apat in, Manipur singtang gam ah Solkall Skulte paamtuul in, beivekta uh hi. Huanah, tuni in ki-elna asaan luat tak ziakin, singtang a Saptuam Skul omte’n laizilna lungtun huai tak pezou nonlou uh hi.

Huaiziakin, singtang a om Pastor khenkhatte’n a tate uh Lamka ah laizil ding in koih uh a. Ahihziak in, Pastor tamzaw te’n Lamka ah a tate uh na etkolsaktu ding mi muanhuai neilou uh hi. Huaiziakin, atate uh Lamka a innluah sak in, a Pastor khaloh un a tate uh vaak uh a, nu-leh-pa haksatakin, Pastor nna leh louna semin singtang ah om uhi. Enkoltu ding neilou naupangte’n ahilou lam ah pate khaloh na zangthaang thei uh hi. Singtang a Pastor om khenkhat tate Lamka zanga Skul kai ding a nu-leh-pa koih, enkoltu ding neihlouh ziak a khasiat huai tak a, khamtheih hih leng om uh hi.

Pastor ineihna uh kum hiaizah ahita a, Pastor tate bangzah Pastor a luut leh, luut thei ding I neita ua, Pastor tate khotang leh khovel vai ah bang zah misuan huai inei ua? I Pastor te lohchinna Saptuam lohcinna ahi a, lohsapna aneih ua leh leng, Saptuam lohsapna ahi chih I pom uh hoih hi. Aziak ahihleh, I Pastorte uh Saptuam maipho ahihziak uh ahi. I Saptuam Nasemte, tu leh ta etkolna a duhthu a saam kei uh leh- tuni in EBC Saptuam a Upa vaihawmtute leh, Saptuam milip in bang tan hiam ah mohpuakna I nei hi. Huaiziak in, bang ci zawng a panla a, Pathian’ Thutak a honvaak ding a kipumpiakte bangci banga panpihthei ding I hi hiam cih lungsim taktak seng a I ngaihtuah uh hunta hi.

Tuni ciangin, adiak in Pastor naupang lamte – khovel siam sinna hiin, Pathian’ thu zilna lampang hita leh, zil sangpipi I neita ua, I Saptuam un ma a sawn I cilou thei kei hi. A lehlam ah, hiai laisiam taktak leh zilsang taktak Saptuam Nasem I neihte uh - zilna lam ngaisang a, deih mahmahte ahi uh cih ciangsa hi. Huci bang a siamna saangtak nei Saptuam Nasemte’n tanu tapa Skul kaithei a neih hun ciang un, siam sinna lam ah a tate uh a dinga a lungleen ding dan uh, a khavaat ding dan uh muh kholh theih hi.

Huai dingin, I Saptuam Skul khat, etsak na’ngin, Ebenezer School, New Lamka; Boarding nei a, Saptuam Nasem’ singtang a omte tate omna ding deuh in bawl le hang hoih ding hi. Hostel Warden ding zawng naupangte, khovel siam sinna leh Pathian thu a makaih thei ding deuhte; huci lama lungluutna taktak neite leh, kiva deuhte koihna mun dingin siit in, kuate hiam meltheih hoih nei, Lamka zanga om theihna ding lemcang mai hilou deuh in. I Saptuam Nasemtute uh khaloh pe tam zoulou I hi cih thei kawm in, Skul leh Hostel fee te bawl lem bok le hang hoih ding hi.

Huanah, singtang a EBC Saptuam Skulte taksap awnghuu taktak ahi ua, huaiziakin, naupangte quality education - siamna taktak pe thei ding in bawl le hang hoih ding hi. Skul etkolna/Management hoih deuh nei a, bangtan hiam zalenna zawng piak a, thuneih kituhna in a suk buai phak/khak louh ding a bawl ding ahi. I Skulte uh Mission Field diktak ahi cih pawm bok le hang hoih ding hi. Gam mial vei ahoih a, Pathian in kawlmomg pha a A thu tangkou pih dinga ahon deihte ihi ua. Hucih dungzui in, ei tate leh ei gam a I mi isate lakah Skul zangin Missionary nna sem-le-hang, gam mial a teengte Pathian kiang a I piluut baan in, ei tate leng Pathian kiangah - siamna toh piluut I tup ding uh ahi.

2. SAPTUAM LEH ‘THU LEH LA’ : Ka biak inn kaina Saptuam ah khat vei Saptuam a heutu lian khat heu in ‘Naupang Camp’ om a. Zingkal khat huai Saptuam a Upa khat in heutupa thugen va siim hi. Tua heutupa’n naupangte kiang a athugen tam zaw ah Sap pau teelsak belbual a, Upa pa’n tua heutupa kiang ah, “Heutupa, naupangte theihtheih ding pau zang ve” va ci kha hi. Tua heutupa’n “Ka thugen na theihtheih kei leh na inn uah na pai lecin hi mai, Pathian apan ka dawn dan a ka gen ahi” nacih san hi. Adiktak in, tua heutupa’n Sap pau toh kihelh belbual a a thugen ding Pathian kianga pan mu hizawlou in; a thugen ding Sap pau a kigelh sim a, a thugen dinga alungluut taktak louh ziakin haaizaan louh in, Sap pau leh Paite pau kihelh lemluam a naupangte mai a hon sekhia hihtuak zaw hi.

Pathian thugentu minthang Billy Grahamte, Pastor lohcing Rick Warren, “Thiltup In A Pi Hinkhua” cih gelhtupa cihte enta lehang, Pathian thugenna ding a apau zat uh thazoh mahmah ua, Pathian thu - a mawlpen apan a siampente’n leng a theihsiam theih ding un gen siam in, gelh siam uh hi. Ngai khetu leh simtute lungkuai a, a gentu in a tup leh ngiim phoulang thei ding khopa Pathian thu gen-a-gelh theihna dingin, I pau zat kiziil a siam mahmah ngai hi. Sunday Skul I ekzam ciang a ‘Picing kam a dawng pawl’ omna Saptuam a Pathian’ thu gentu in pau dang toh kihelh belbual hon gen ciang in, ngai khetute khualna neilou thu gen hi a, ngaikhetute’ lungsim tawng deng kha theilou a, a thu genin ngaikhetute’ lungsim ah kilamdanna bawl theilou hi. Huci bang a ‘min phang’ a thugen in ngaikhetute lungsim vut ngeilou a, vut ngeilou bok ding hi. Khalam a Saptuam hatlouhna azung apan kalh khiak I tup leh, a kiphatmohna omloupi a Pulpit apan Sap pau I mawk zatzat uh a paan pat ngai ding hi. Na thugen mipite’n ahihnatak amat kei uh leh, bangci in khalam ah mipite na vaak ta dia le?

Pathian hon piak na pian pih pau, Pathian’ thu mipite laka na tangkou pihna dinga na zat pau na simmoh leh, na Thu nnasepna ah na lohcing ngei kei ding hi. Sap pau azat na ding munlou a na zatzat hangin, Mangkangte na suak thei tuan kei ding a, huai malakin, na pian pih pau ah na bahlawh zaw ding hi.EBC Saptuam I cih Paite kampaute a dinga minam ai awh ahi a. Huaiziakin, EBC Saptuam in Thu leh La a ma akaih a, mohpuakna a laak ding ahi. Paite pau’ Thu leh La lama ahauhsak theih na’ng in, EBC Saptuam khut ah ki-nga a. Huai ahih dung zui in, Paite kampaute Thu leh La a aniam uh leh zawng, EBC Saptuam in a moh tampi a puak ngai ding hi.

Mun khen khat, abiiktakin, Mizoram bangah Saptuam tuamtuam , mahni awmna veng sung ah om a, huci bang Saptuam tampite lak a om himahleh le uh, mi tampi te’n EBC Biak inn mah gamla pipi apat in naih tenten uh a, aziak ahihleh, Paite pau a ngaihnat ziak uh ahi. Huaiziakin, Saptuam in pau a ngaihnat kei leh, mi tampite EBC Saptuam a a awmna san uh bei ding hi. Huanah, Saptuamin pau a ngaihnat kei leh, EBC Saptuam amin in awmthou mahleh, pau dang – Paite pau hilou in biakna neih mabaan hithei hi.

EBC Saptuam sung a kithuzaak tuahna, Khuukpi apan hong pai laithon tampi te akimkhat phialphial Sap pau in kigelh a, Saptuam sung a pawltuamtuamte min ah Sap pau tam kihel thei lua in, a minte uh kikhek mun lua hi. Khuukpi heutute nasep min(designation) zong kikhek mun lua a, term khat sung zawng adaihlouh hun om hi. EBC Saptuam khopi kia ah omlou a, singtang dawn ah, zilna sang nei leng omlouhna mun ah zawng om hi. Hiai khuaten, namdang pau I khelh ua dim laithon te apoimohna bang in na ngaipoimohlou thei uh hi. Huai ziakin, I Saptuam un Thu leh La lampang ngaih poimoh kizil in – ahithei tanin eipau zangin, eipau a omlou namdang pau I zatte uh leng, ahithei tanin eipau in let thei le hang hoih ding hi.

Huanah, La pau ngai poimoh le hang deih huai hi. La pau in khalam lungleenna hon pia a, khalam lungleen hon neem a, I lungsim sung nung pen hon khoih kha pen hi. Huanah, La pau in I unau Teddim lamte toh, ciin dan I kikop ahih dung zui in, hon khuikhawm thei pen hi. Pau I cih kikheek kheek ahih ciangin, kholak pau a iki theih tuah non kei aleh zawng, I pi leh pute uh hihdan bangin, lavui a kihoulim theih lai hi.

Saptuam a halhna atun ciang in, Pathian in La zangin halhna pia hi. La leh Pau ngeingaih le hang tuni sang in La phuah siam kitam ding a, ei lakah La zangin Pathian in nnasem ding hi. La ngaihtaktak leh, lungkuai taktak, lungsim tawng hon khoih pha I phuah theih kei leh, I La siamte uh talent leng ahihnatak bangin kiphou khe zoulou dinga; Pathian thu leng athupina bangin kipuang khe zoulou ding hi. Huanah, La siam a, La phuah siam toh thuah I kiimleh kiang ua omte’ vualtung tuanna, Saptuam in La CD a bawl khenkhat ua mun poimoh tak a piak dan ua panin muhtheih hi.

……………X…………….