MIPI CANDIDATE SUPER BRAWNY( Nuih hiau ding)

Gelhtu - kikim pa

“Nam leh Gam khualna in leh daikil kaala migentheite khitui nulsaktu dingin, na vote manphatak mipi candidate Brawny pia in”.


Tunitaak in, hiai ka kiang a Sofa tung a awm Brawny ka et-et chiangin, mipi ai-awh ding in etlah huai kasa mah mah a. Nomination file hun beita mahleh, Mipi/Floor Candidate dingin, ‘ mipite ngetna bangin’ hiai ah Brawny ka hawn vawk khia hi. Mipi candidate dinga leh mipi sik –leh-tanga ding diinga a chitna tampite lak a khenkhat hiai anuai a bang ahi.

Beh leh Phung thu-ah: Amah Brawny pen, beh-leh-phung thu ah Sap Ui, English Cocker Spaniel achihte uh hia, August 2000 kum a Kolkata apiang ahi. Peoples’(Canines’) Representative Acts dung zui in- qualify lohna khat zawng neilo hi. Mipite sik-leh-tang a ding diinga a chiin mahmah na khat bel, Sap nelnual ahihziakin-mahni pau a thugen teng a Sap pau telh balbal thupina a ngai minamte ai-awh dingin kilawm khawm mahmah hi. Amah mipi ai-awh in nei le hang, kisuanglah simkawma “ Sappau ‘use’ kha ‘reduce’ deuh le hang” chihchih ngai nawnlo ding hi.

Nekguk - taakguk lamah: Mite Uital leh mite Uipi te ‘fake teacher appointment’ achih uah amin uh lang teltual mahleh, amah Brawny minpen tua lakah kihel khalo hi. Huaiziakin, Brawny pen nekguk taakguk thilah singtho in - vuk bang a go hi. Huaiziakin, kei Brawny pu zawng, KYKL te lak apan Dangka Sum a kakitat khiak ngailo hi. Brawny min phat in awm hen!!! Khat vei mawngmawng negulo mipi ai-awh nei le hang- Gunlui, Tuivai leh Tuitha luite a toluan in; Vanpi ahawng kia takpi na hiam chih enkhe le hang chih mipite mumangpau hi.

Mipite pawimawh masa: Brawny mipi sik-leh-tang a ding diinga ahawihna mahmah khat ahihleh pen, mite tantuan ding lak sak ngeilo a, mite dawhkan nuaia a kha-teh-nen kia, mite khamval apiak khawmte un lungkim mahmah hi. Huaiziakin, amah Brawny mipi ai-awh in nei le hang bel - skul naupangte “mid-day meal” in mimal pucca building kilam nawnlo ding a, skul naupangten ‘mid-day meal’ ne khamin, skul ah ik pingping ding uhi. Amah Brawny, mipi ai-awhpen naupangte kha-the-nen, a skul bench nuai ua kia in kinamtak ding hi. Brawny telching le pen, mipite khamval, apaihmai dingte uh a lung-gulh manin; mipi laka a genthei leh chimawh tengin, BPL Ration Card in Nipi Kal tengin ration la gige le uh chih Kiginni Zaan thumpina ah Brawny in samtel veu ding hi!! Old Age Pension kum 65 nuailam leh a mihing awmlopi in laak theih ahihlam hilhhilh leng zawng thei tuan mahmah lo ding hi.

R.D. fund, Border Area Development Fund, SSA Fund leh Development Fund tuamtuamte guk dingdan kia buaipih sangin, huaisang a nuam zaw leh kuamah pawikhawihlo pen- Door Mat tung a ihmut hit hit tel zaw ding hi. Huaiziakin, mipite khatna a kawih a, mipite khamval neek a lungkim ding mipite sik-leh-tang a ding diing neih –a lung ngaitheite thumna hi.

Et-tawntaak: Brawny in thil hawih hih ding atheih mahmah kei leh zawng, mipite thil hawihlo leh chiin dan hawihlo zil saklo ding hi. Huanah, dinmun khiaklah man leh Dangka Sum deihtaak manin nam leh gam zuak manglo ding hi. Huaiziakin, Brawny I tel ching chiang un “Thil hoih hih kisinta un” chi a kamsang Isai kiko aw in gen neitheita ding hi. I khuapi uh ‘the sin capital’ hinawnlo ding a, ‘ Babulon kizuaknu, khovel thilninte nu” chih izak chiangin, midang- namdangte genna ahi chih lungsim a siit neilo achikawmin lungmuangtak in kitu phiu-phiauta ding hi.

Khenkhatte, mi-van-tang ahihlai ua Vakhu bang a nunnem a - pawi khawihlo dinga kilang te leng, power hawntawi chiang un, a luzang uah Kii nih hawngpo in, a taw-ngum uah Meisaupi hawng po thei hi. Hiai khawng tengteng ka gelgel chiangin leh, Theihchiansa Dawimangpa leh Theihchian-nailoh Dawimangpa kaal ka teh kakkak chiangin, hiai ka Uital, Brawny mah mipite sik-leh-tang a ding diingin etlah huai sa deuhdeuh ing.