 TUK LAI a vuah azuk khit chiangin, inn khang a Huan a Nahtang teh apanin vuah mal tak sukin anuai a ateh nuai nungzaw deng ging keuh a. Huai apan tua tuimal mah taksuk nawn in anuai a Nahtang teh deng suk nawnzel a. Huchi bang in zankhua in a Solfa nei a, music lepsiam takin in alep a, avaitu kizen takin a vai hileh kilawm in ging keuhkeuh den uhi.
Zing khua hawng vak chiangin, tua Nahtang uum a Nahtang pak zute tawp dingin vasa nupa, tha-it tak hileh kilawm in hawng leng ua. Tua Nahtang uum kimvelin kitheihsiam melpu takin, dak laplap kawm zelin Nahtang uum a Nahtang pakte tawp zel uhi. A mul pou dan leh a mul rawngte uh et mai in leng a bawltu in duat tak a, akilawm thei pen ding ngaihtuah vengvenga a bawl ahi chih kichiang mai hi. A muk zum zizeuhte amau tawh kilawm khawm in, pakzu tawp ding a Siamtu in a siam ahih dungzui in, pakzu tawp na’nga hoih in, pakzu atawng penpen a awmte zawng awlsam tak in tawp khe thei zel uhi.
Sun hawng hih chiangin kawilam apan hawng pai hiam chihtheihlouh vuahpua meivawm in hawn tuamin, kitatsatlou in vuah zu ngiahngiah a. Khiinpi tunga kanpuak te vawmbekbuk in nel huai lou bangin lang mah le uh, hiai bang vuahchiin ni adingin khawvel sunuamtu hia. Vawmbekbuk leh iinkingkai apanin, puak kiikei leh ngouliklek, namtui viauviau bawksi hawng piangin – belkuang sung apan i sawk seuhseuh chiangin khawvel ah kha-vaat ding dang tamlou hial hi.Veng naupangte inn kawng guam ah hawktui chingin buai zen ua, vuahmal tak ging ngiahngiah kalah apau ging uh kiza mialmial hi.
Nitaklam hawng hih chiangin vuah hawng theu a, inn nuai leh sumtawng bel a Ak awmte neek zawng ding in hawng kilaam khia ua. Kawngtual ah, Aktal luisan in - Akpi la nih kal a teel zawk dingpen atheilouh man in lunglutlou pi in khuang hi.
Akpi nou kai in anou te neekzawn pihin, api tuk nana a nouten um liai liai in tu seseuh uhi. Famkimlouhna khawvel ah Akpi in Huan sung ah anou taisan kha a, anou a pi kiang tungzoulou a, chimawh mangbanga ham chiakchiak zak ding zawng awm a. Kawlgit ten leng vuahtheu sung a atamthei pen nekmuh tumin, hun hoih awmsun aamtakin neek zawng ua, zawngtah kung leh inn tungvum kal kawm tuahin vial lenlen uhi. Phialphiah nupa, kithawh kawm a bikha kailap a abusung ua lenglut a, bang hihpen uh hiam chih theihlouh a hamchikchik zawng zak ding awm hi.
Khawkhung tang a Ni tumsuk dia kisa, mihingte mangpha khak hileh kilawm a sawtlou hawng kihiil in – bouruak a tuimal awmte hawn sal kha a. Huai huihkhua a tuimalte Ni zungin hawn salh chiangin, tua tuimal neu chikchikte sunga Siamtu in etlawmna aphum gukte – Ni awmlouhna lampang Suahlamah - Sakhituihup rawng ze tuamtuam akibawl kilawm tak mai in hawng lang khia hi. Gal lehlam tangah, tunglam bouruak a meipi lengte liim tai denden in kilang a. Inn sakte bawngnou nawi duha, api ngai a ham in Ni tum na’ng sawt nawnlou hi chih hawn thei sakthak nawn hi.
Vaikuante hawng tunma a tuitawi dingin inn ngaakte kuan ua, innsak lampi ah tuithei hawm ging avangkim in zakin awm hi. Khawvel kilawm saktu ding a A hawn sawlsuk hi dia agintaak, tuitawi dia kuan zawng anung lam pan gal muh hi!!!
|
No comments:
Post a Comment