NUMEI

A pau kawi khatin kek-kia sakin - vanpi ging saka, khawvel nguisak thei hileh kilawm a. Huchimah bangin, a pau kawi khatin khawsiat nia Ni hawng langa, mihingte gentakloh, sing leh lopate tanpha khanglo a halhsak mah bangin khawvel suvai vengin, thatho sakthei a. Mi beidawngte lam-etna thak guan a. A aw neem in lungsim leh taksa tawldam sak a, hihdam theihna zawng nei hi.

1. “Numei bang atel hiam?”

Nidanglai a Persia mipil khatin akhuakpilna tengteng senga angaihtuah vengveng nungin “pathianin rose pak, lily pak, gulpi, khuaizu, apple gah khat leh naasa a mautuaituai mek-khawm a; huai thil tuamtuam ahel khawm teng pathianin ‘numei’ chi a sam hi” na chi hi. Na gintak leh gintakloh thutuam hita leh!! Khenkhatte leuleu inlah, “Pathianin numei abawlma a pasal abawlna ziak ahihleh, thiltaktak I bawl ding chianga kisin phawt ngai a. Huaiziaka, pasalte - Pathian kisinna hia, numeite ahihleh bel ataktak hita hi” chi uh hi. Friedrich Nietzche taget inlah “Numei zaw Pathian thil hihkhelh nihna hi” nachi leuleu hi.

Sir Arthur Conan Doyle in Sherlocks Holmes kam apanin “ Numei gen khawlh sangin khua awmdan - khua a phat ding leh phatloh ding - gen khawlh awlsam zaw hi” chih nagen sak a. Spain laigelh siam Cervantes in “ Numeite ‘yes’ leh ‘no’ kikalah phimzangkhat zawng tazo kenteh” chihin namkip nawn hi. Huaiziakin, Sir G.K. Chesterton in “Numei te khut lumleh banga alungsim uh a khek vialvial theihna un, pasalte zi khat kia a lungkimna pia a. Aziak ahihleh, zi hoih khat na neihnakleh, na zi in alungsim akhek tengin zi thak nei bang na hi mai” na chi hi.

“Atung in” Pathian in khawvel alungkimna bang in bawl khia a, en in hoihsa hi. Huaizawh in, Amah kibatpih mihing /pasal - Adam kichi huai khawvel leh asung a awmte enkawltu dingin bawl khe nawn a. Adam amah kia a a awm hoih salo in Pathianin a kithuahpih dingin ‘Numei’ pia hi. Numei kichi amah makhua khual thei tak ahih ziakin, huai ni apatin Adam lungsim ah ‘a –awng’, amah numei lo ngalin ahukdim theihloh ding bawl ngala. Kum hiaizah leh khang hiai zah atam apai nungin leng, Adam suante lungsim ah numeilo ngalin a hukdim theihloh ‘awng’ awmlai hi. ‘Mihing Version-I’ akimlo bangzah hiam ‘Version-II’ ah sukbukim ahihziak leng himai thei hi!

Greek mi khawvel a mihausa minthang mahmah Aristotle Onasis in “Numei awm kei leh sum-leh-pai hauhsaknate bangmahlo mai hi ding hi” nana chi hi. Numei ‘yes’ leh ‘no’ kikal kawchik tawk mahleh, numei ‘yes’ leh ‘no’ in pasal hinkhua ah genthupi tak nei hi. Huchizah dawnga thupi himahleh, numei bang ahia, chihdawtna Adam apan tuni dawng kuaman gen chian theilo ua; huai genna dingin Thu in daihlo a, La in zawng ahihnatak awi khe zolo hi. Ahihziakin, paumawh pasalte - kawnga khekawl tangthei peuhin kamin genthei kei mah le uh, alungsim sung-gil uah bel numei (amau adingin) bang hi hiam chih theichian mahmah ua. Huaiziak takin, numeite zaw ‘Genloh a maang’ hi uh hi! Huaiziakin, “Numei bang hi uh hiam” chih lampang ah buai dah mai ni hang!

2. “Sen ngaih……”

Ka neulai in nikhat mikhual nungak thum ka nei ua. ‘Sawltak numei’ achihte uh hi. Alak ua khat, sauzinzen khat, akhuk, oh! akhuk tantan tuh ka mukha kei a, a ngal khawng , a siak khawng vawkthau anuh hiam zawlkelkel khat a gukin kana ngai zawng a. Ngaizawng lua kahih chiangin, a awmloh kal ua, a lupna ua azan puan uh kava napnap leh kava ihmu kha hi.

Ka nu’n “ mikhualte lupna ah va awm awm ken, azan puan uh na hihniin kha ding” hawn chi a. Mi zawlngai a kuiku zen,mi theisiamlo vang lak!! Ka nu adingin theih siam haksa mah ding hi, atapa kum sagih paita apiang ahih chiangin, zawlngai amim bangthum dingin gingtalo ding mahmah hi. Hiai in pasalte valno(puberty) ahihma un zawng numei ngai khin uh ahihna langsak hi.
Zomite paunak in “ Sen ngaih leh vang-ngaih” na chi ua. Neulai leh tuailai tunga zawlngaih haksat dan genna hi a. Huai hunin I ngaihtzawngte kiangah I ngaihthu kigen ngamlo a, I ngaihlam leng I ngaihten theilo phetlou in, I hinlam zawng atheihloh hun uh tam a, aguuk in mahni awm munah kingai mahmah hi. Hichi bangin lain nasa uhi:

Ngaih chih buang tawngdam sanloh, hem lawh lung-gulh
Lungzuang liang tul lim kai-ah lai neem ing.

Nang vang ngai awmlai vei bang lungtuak tangneem
Chiaukuam zangva’n, kei nawng laikuai ei-ma.

3. “Sanneem no”

Pasal naupang khat hawng khanglianin, “sen ngaih” apan in “ vang-ngaih” ah hawng kaisang a. Huai hun zetin tuh hichi bangin lain hawn awi hi:

Etchimloh, hochimloh sanneem no
Kawi kuam sal bangna hei hiam
Tangsang-gah ken na heina ngai veng.

Heutupa Dr Langkhogin La phuahin lungsim kilometer maktaduai asim tampi paisak thei hi:

Sawlkha ah I mai mit gel
Gawm maini ka san neemno

Hiai la phuaktu leh a lawm ngaih muntuam tuakah awm uh hihtuak hi. A ngaih zawng nu akianga awm a, itna simthu genkhawm pih utmah leh, amun leh hun in ziltalo a, hi theilo hi. Huaiziakin, hiai la phuaktu in, a sanneem no tawh a awmna tuak ua pan a, tung a Khapi, km 4.50 lakhs agamla, akituak a et a, amit uh, Khapi a gawm a ut thu lain sa hi. Huai in bangpi semkhe lemluam kei mah leh, hiai la phuaktu adingin kineepna awm sun hi a, kingaih natna leh kinuamtuamna gawl lua hi chih ensak hi.

4. “ Ka thaitawng aw…”

A hunlaia khawvela sepaih heutu minthang, Europe gambuppi akhe nuai a sikdenzo khawp a heutu lawhching - Napolean Bornoparte zawng azi Josephine mai ah ‘tawngdawl lep bangin’ nem ngiingei hi. Milan khawpi a galdo a a awmlai in azi Josephine, Paris khawpi a awm a itna simthu khak dena. Azi in “kei leng Milan ah nang kiangah kawng pai maithei” chih alaithawna agen ningniang lel lehleng Napolean - naupang Krismas dek kuan a phulalen puan-ak thak nei tawh kibangin kipak a, ui mei kang bangin awm maimai theilo in phevel vul hi, chi uhi. Napolean, thaupi leilingzen a ging dumdum leh thautang lutung a vuahzuk banga azuk chiang a zawng mitphelo pa’n, a zi Josephine kianga alaikhakte lakah “ kawn nak ngaihluat ziakin ka sia leh pha theihna tengteng abeita a, hawn ngai dam in. Mi vantang leng phazo nawnlo ding khawpin ka buai gawp a, ka hinkhua zan a mumang beitheilo bang ahita…” chih zawng tel hi.

Huai khawvel pianken in apiak numei thil hihtheihna in amat khak , England kumpi Edward VIII in zawng, England lalgam - nitum senglo a lian, kawilai hiama Ni atum chianga, kawilai hiam a nisuak theikhawp alian gama kumpipa hihna sangin-America nuthawi khat Wallis Warfield Simpson kichi tawh Thosilen khat kikawp natel zaw hi. Khawvel kidopi nihna hunlai a England Prime Minister, pa thawmngaihtak Winston Churchill in azi Clementine tawh kum 57 akiten nung un leng, azi khamzo mahmahlo leh ninhuai sanai mahmahlo ahi ding a, hichi bangin lai thawn hi, “ Hiai khawvelah mahni angma sialnaten hawn hihbuai lua a, huaiziakin si mai in, khalam khawvel kawisan hiamah, angmasialna ten hawn sukbuailohna munah, ei nihgel kituak khawm nawnin, huaiah itna bukim in hawn it leng chih ka lung-gulh tuntun hun atam mahmah” chiin laithawn hi.

America President lui Lyndon B.Johnson ta leuleu inlah Lady Bird kiangah “ Nang haipih khawpin kawn it chih tuni a ka theih khiak leh ka tup asang huaihuai a, ka kisathei mahmah a, ka awm bang leng a nuama, tha leng hawn pe mahmah”, chiin a ‘thaiboih’ thu kisak theihpih taget hi.

Liando in Gunlui a tuilian apan azi hunkhezolo a, azi akhuai niin hiai bangin la na phuakta hi:

Guntui tung a sawn ban ka kaih
Ka thaitawng aw, na pam lua hi.

Azi sihnunga atung a thiltungte I ngaihtuah chiang in, Liando in azi khuai kei leh, aneih alam a humbit zo diam aw? Mitampiten azi tawh dam khawm uh hitaleh, aneih-leh-lam humbit zo dingin gingta uhi.

5. “Bel kitam baih apan leihbuak thilhihtheihna leh pasalte”

Samuel Johnson in “ Dan in numeite thuneihna apiak khawl lohna san ahihleh, khawvel pianken in numeite thuneihna apiak tam luat ziak ahi” nachi a. Zomite paunakin “ Numei in zawhlah neilo” na chi a. Pasal kichitak sakpen zawng numei in chihtak zeta azawl uleh zo ahi, chih na hi.

Hiai khawvelah numei chituamtuam na piangta ua. Aigupta kumpinu melhoih minthang, amelmu peuhmah “a zawl-ai’ in bum chi khawpa ana gen uh Cleopatra te leh Greek gama Troy khua a nungak melhoih minthang Helente tunitan a atangthu uh khawvelin genchimtheilo uhi. Helen itna kituhin Troy khua leh Spartan khua na kibalsial nuaita uhi. Hiai nungak melhoih nihte igen hangin Mother Teresate, Lady Dianate leh Nightingale te I mang-ngilh chihna bel hilo hi.

Pasalten “Ngal ha-paksa tum kik lo”, “Pasal leh tempawng” chiin kisial sek mahle uh, pasalte Dan bawlsa numeiten ‘amendment’ na bawl zel ua. A “Acts’ min kheng silo in, lah, a Acts in atup leh ngim bel pasalte theihloh kalin or pasalte theihpihna(!) tawh, numeite etkaina nuaiah, “charlem” in na awm thei zel hi. Numeiten “A hihtheih liai leh zaw….” kamdam deuha achih chiang un pasalte nem duaiduai uhi.

Naupangin tungman ameek ua, a utut uh abawl bang un, numeiten pasalte amau utna tawh a utut uh suah ua. Numei khut ah Lungno Pangpalek kilawm tak suak thei a, Pangpalek kilawmtak zawng Lungno ah kiknawn thei tang hilhial hi. Pasal khenkhatte, Akno banga zun niinglak thai teuhteuha khawvela adam sung uh zang ding a kilawmte zawng, numei ‘ai’ nuai ah Muvanlai suak ua, meipi tawh kimawlin khawvel suk et thei uhi. Khenhkat te leuleu lah, numei khazak nuaiah, Vaphual tangsa Va-ak tangin, mi niinpaih peuhin ki naamtak thei zel uhi.

6. “Kawm kim ta pasal sagih neisa….”

Thilhih theihna in mawhpuakna kengtel a. Huanah, thilhihtheihna chituamtuam awm a. Huaite lakah numei thilhihtheihna zaw, akilang a khawvel muha vualtungtuanna ding a thilhihtheihna hilo a, neem-ngiingei a thilhihtheihna, mit a muhtheihloh thil hih theihna, ‘soft power’ achih uh hi. Huai dingin Bible in zawng hawn sinsaka. “Numei lu zaw pasal hi” na chi hi. Numei thilhihtheihna - pasalte maiteh leh belawi teh mal banga amal neen ua – dawl bang a alep ziahziah theihna uh, vualtungtuanna leh kithupisakna a azat chiang un vangtahna leh hamsia in zui thei zel hi.

Nidanglai a England lalgam vanglai a England kumpinu, Queen Victoria leh apasal Regent Albert, akiten nung uh sawtlo in bang ziak hiam in ki su-nuak kha uhi. A pasal Regent innsung pidan khat ah kikalh khum a, a zi in “ British kumpinu ka hi, kintakin hiai kawngkhak hawn hawng in” chi a kawngkhak mai a thupiak khauhtak tawh akiko lailai hangin tua kawng khak kihawng deksuailo hi. Pasal ichih huchi bang a ‘sai’ ding hilo hi, chih Queen Victoria in zilkhe nailo hihtuak hi.Kumpinu beidawng tawngkhawngin, Biakinn a kitengsaktu, Pathian Siampu kiangah vatai hi.

Siampu in Kumpinu kiangah, “Kumpinu aw, na pasal kianga na awm chiangin na Kumpinu hihna koih khia inla, azi na hih ding hi. Huanah, na kitenni ua Pathian leh Saptuamte mai a na pasal kiang a na kichiamna, na pasal ading kia a kipia a, a nuam leh haksa ah zawng, chidam leh chinat zawngkhal ah zawng, deihthawh a it tawntung ding a na kichiamna va hihpiching in” chiin na hasuan hi. Hiai kawngkhak, England kumpinu thupiak zahtaklo a, kihawng utlo leh kawng khak thumanglo - kumpinu’n apasal kianga kawngkhak lehlam apan a ngaihdam anget leh, tua kawngkhak awlsamtakin hawng kihawng duangduang mai a. Regent Albert leh azi Queen Victoria te nupa, tek-kun dawngin, sihna in akhenma, nupa kihothei leh ki ittak hi a gen hi uhi.

June kha hia, ‘Nu-leh-Pa ni’ zat chiangin agentu a dinga genkhiak thil nuam hilo, angaikhetu a ding aleng thuzak nawphuai hikhawllo khat “Ngau tui thalh’ banga gen khawmin awm seka. Gen khaka a awm naakziak ahihleh, tampite ngaihdan in laisiamte innsung leh tate etkawl a lawhching ding, Pathian a kipezote Pathianin a innsung leh tate etkawlsak dinga gingtakna ahi a. Hiai gindan nihte adik leh bel heutupa innsung ettawn tak mahmah ding hi. Himahleh, heutupa lawhsapna in mitampiten ngaihdan kiptak aneihte uh hihling a, mitampi lung-am sak hi.

Kam akigensawn tangthu in hi bangin gen hi: Nikhat heutupa’n a lawm ngaih mahmahte khawlai ah mu kha a. A inn a singpi dawn dingin chial hi, kichi hi. Hiaiah, heutupa - lawmte tawh innsungpa pen khawlaka Hotel a singpi dawn ching khawtang hinkhua anei lak a khang khia in - alawmte Hotel a tutpih mailo a, a inn lum a singpi dawn khawm dinga achialin, innsung khual leh mahni innsung ngaina mi ahi chih langsak hi.

Innteeknu’n a siamgat awlmawh lua leh laklawh salua ahih chiangin a pa uh kiangah “ singpi nang na bawl mai in” chi hi. Heutupa’n singpi-te awmna mu zolo a, anu un a siamgatna apan “ Huai tau ah a awmvawi, huai bang mulo, na mit kawia koih na hia, heihui teh ” chi phei hi. A nu un singpi-te awmna ahilh chiang bawk a, heutupa’n singpi-te koihna hawn mu khawngkhawng hi. Singpi no a ahawn sun dek chiangin, singpi-te khiitna hawnmu zolo taget hi. Heh ngawhtak a “Huaiah a awm vawi” chi kawma Innteeknu’n a slipper a deng phei hi. “Heutupa zi in thil lawt/thilden practice tamta hi dia, Singpi-te khiitna deng kha geih hi,” heutupa lawmten chi uhi. Heutupa tate etkawla alawhsapna leh a innsung-awm ding dan tungtanga thupukna bawl na’ng in hiai tangthu lengsawn maimai thuching hilo a, laktaaklou hial hi. Ahihziakin, heutupa innsung - bangvang a et a akilaat dan ahi chih leng nial vual hilo hi. Huaiziakin, hiai tangthu niinbawm apaih maimai chi zawng hilo hi.

Nidanglai in Saizang hausa Mangsum awm a. Pu Mangsum leh a zi Kawm kim in tapa sagih nei uhi. Ngeina danin tapa sagihnei ichih chiangin muanhuai a, ahunlai ngaihtuah in kisial na tham ching hi. Ahihziakin, Pu Mangsum leh atapa sagihte ahunlo in sigai ua, Pi Kawm kim tapa sagih nei sa teknung-vuai nungin anawlam a akiknawn ngai mai mah hi, kichi hi. Huaiziakin, Zomi paunak khat “ Kawm kim zawng ta pasal sagih neisa nua kik” chih paunak piangsak hi.