" I MAW...."

Atut na’ng mun a atut dek leh Air Hostess nu’n a Coat la in hanger ah khaisak a. A tutna mun dingah tusukin a kawng-gaak gak a. A kiang a awm Tanchinbu lunglutna tuam neilo in a pekte phen kual phenkual a. Theitui a dawn zawhin, atheihloh kaal a lusu in ihmu a, manglam khawvel ah nidang a ameltheih mahmah kawngkhak ah lut hi.

“I maw....” chiin a bul pan a.

A inn ua ahawh masak ni a manglam lungsim mitkha in mu a. Tangthu saupi nei ‘perfume’ in anaak a gimtheihna khanglo sak hi. Kawngkhak kiang a tutphah naipenpen ah tu a. Bang hiam achihleh tai khiak pahna ding chihna bel hilo a, zakta lua ahih chianginin, kawngkhak a pan alut a tutphah amuh masakpen ah tu sukpah hi. Aziak leh hang nei a, gen thukpi nei bel hilo hi.

Bang zah vei hilh atupna hiam chih theiseng nawnlo a. A za veina hi maithei a, ahihkei leh a sangkhat veina zawng hihta maithei hi. Huntam veipi hiai bang hunlemtang na zawngta a. Hunlem awm theilo a. Hunlem a awm sunchiangin a hangsanna in daihlo a; a gawl ah a daltu leh a hutu awm hileh kilawmin, gen lawhsam zel hi. Bangteng hileh, midawilawk pente zawng lungsim guka duhthusam ah bel duai tuanlo uhi, chih athei chiantute lak a khat hi.

Hiai alungsim a tham-thaltang banga apaai gige genkhia in hilh thei hileh, khawvel kilumlet ding a – Tuivai toluan in, Ni suak leh tum zawng ki lamdang dingin ngaih sun a. Tunglam ento zelin, huai Van dum kiikiai khen apan a ensuktu awm in thei hi. A beidawt manin huai apan chikchiang hiam a hangsanna hawngpai suk a, amah hangsanna in thuam dingin gingta a. Himahleh chikni chiang hi ding hiam chih angaihtuah chiang in, ni khat sun khat zawng sawt sa a, aguh leh tangte ngawt ngawp ding bang uhi. Himahleh, bang alawh tuan dia!

Diktak a genin, khawvel pianphung paidan ngeina ah bel, amah hiai mun a awm ding hilo hi. Himahleh kuan ahia hiai khawvel pianphung paidan ngeina gen thei ding? A mel leh puam in vona tuam leh mite sang a tungnunna biik nei kei mahleh, amah khawm a ‘van chil phih’ a, amah khawvel tuam sung leh amah phakna tanah bel hiai khawvel pianphung paidan ngeina khek lam dang bel aphaktawk in na tum tei sam hi. Lungno apan Pangpalek zehoih taktak ahawngpian bangin, thilthulimlo a mihingten akoih uh thilte a pan in thilhoih leh khawvel kilawm saktu hawng piang thei hi, chihin amah ah lam-etna thak guan a. A khekhai zangkhai sakin, a lungsim puakgik apan tawldamna pia hi.

Thal tang kap khiaksa sapkik theih hilo mi’n chi ua. Alehlamah, thaltang kapkhiak lohin Sakhi – Sazuk man ngeilo hi. Tuilawngte tuipi tung a apai chiang un a siat theihna uh tam a, huihpi in leen in tuahsia in tuiah tumthei ua. Vuk khal hiam suang hiam phukha in tuipi ah tum mang thei uhi. Huai ziakin, Tuilawngte lawngkhawlna a a awm chiang un bit pen uhi. Ahihziakin, Tuilawngte tuipi a khual zin dinga bawl hi ua, lawngkhawlna a ding den ding a bawl hilo uhi. Thaltang kap khiak in kisikna atut theih mah bangin, thaltang kapkhiakloh in Sakhi-Sazuk mat ding kikhiam sak thei a, lawng khawlna a ding den Tuilawng in sum bawllo a, a lawng neitupa gentheihna ah pilut thei hi.

A ngaihtuah kik chiangin, amah hunlai a naupangte hihtheihte khat zawng hihtheih neilo a. Thaang a kam chiangin, vasa genloh, khut tal zawng awk thei ngeilo a. Gawphel leh Sailung kawlzal dim tawh vasa beng in kuan khe sek mah leh, a dam sungin vasa nih kia man a, anihin khahsuah zawmahlai hi. A khanvualte hihtheih bangbang ahihtheih awm sun ‘Tangsam bawh’ hi a, nuam a sak penpen school khang a singka hiang a tuan a, duhthusam gel hi. A pianna khawvel a teng mihingtenTumpi bang a ek a khawl ma uh khawvel a anaupa’n hunlai nazang a. Ahihziakin, aman huai hunlai in leng singka hiang zam a ekthak a- Tumpi bang a ek khawl a utlam takna hi hi.

Khangluiten “ Nahkia awn in Nahkia maam a suang” na chi ua. Nazaret ah thil hoih apian hun zawng awm thei sam a, a khanvualte aphaklohna in Tutphah leh Dawhkan bel sak a. Tua Dawhkan leh Tutphah in amah mualpho tadihlo in bawl a, chi-al sawh ding kitasamlo in amah koih hi. Himahleh, alungsim suangpek ah akhekhap nawsia a, asi san ah a gu tham den hi. Bangteng hileh, hiaiten amah lungsim guk a ‘huihkhua a innsang’ alam ding dallo ua, ‘vanglengtanu’ lam-en teisam hi.

Huihkhua a innsang lam dinga, ngaihtuahna khawvel a khualzin dingin ‘Visa’ ngailo a, ‘Passport’ kuaman phutlo ua, ‘quota’ zawng kullo hi. Dangka leh dangka-eng zawng ngailo a, azawng a hau, alian aneu khen tuam awmlohna gam hi. Na ut tantan na tam thei a, na ut leh pawt in- na ut leh na lut thei hi. Mi hing a piang khempeuh adingin tua munah zaleenna bukim awm a. Huai gam zaw ‘lungsim suangtuahna khawvel’ kichi hi. Huai khawvel a tengin na deih leh lung-gulh teng na nei thei a, na duhthusam teng bukimna leh na neihtheihna mun awm sun hi. Huai gamah ‘phuloh..’ chih awmlo a, ‘a zekaita, a kikhelta’ chih kam mal in mun neilo a. ‘Thil teng’ nang a hi mai hi.

“I maw...” chi a abaan asut zawp dek leh, gamlapi apan aw ging khat hawng leengin a awmna hawn naih hiaihiai in thei a. Tua aw-ging amah kiang hawngtun chiangin kiguihin khanglo hi. Air Hostess nu’n a ha-ngo sitset tawh nuiseihsaih kawmin, “Sir, Leentheihna in a Tual bawh ding hita, na tutphah atangin koih inla, na kawng-gaak gakta in” chiin hilh hi.