SAP LA phuah siam minthang John Keats in “ Thil kilom tak zaw tangtawn nopna/pahna hi”( A thing of beauty is a joy forever) na chi a. Thil hoih, thil etlom leh ngaihnobei te pahtaak huai a, amuh nuam a, khovel sunuam a, hin thaman om sak hi. Thil hoih leh etlom te - mihing bol tawm gamgi in khum bichilh theilou a, amai uah lungsim gamgi zawng zulmang uhi. Hun leh kum pai liamten a manphatna uh kiam sak tuanlou a, khangthak hong piang zelten homthoh in phungvuh tou zel uhi. Huchibang mihing khutsuak thilhoih leh etlom – ‘tangton nopna’ tun theitu leh ngaihnobeite lakah Literature – Thu leh La I chih in mun poimoh tak luah hi.
Mihing buhsih kia in hingtheilou a. Buhsih kia ne a hing - mihing khat na om bang hita leh zawng, huai pa hiam nu hiam hinkhua, hinkhua nuam leh hinkhua en huai pen hilou ding hi. Buhsih mihing hinna adingin poimoh ahi chih nialvuallouh a miteng theih hi. Himahleh, buhsih avuak a neek sang a mehtoh meh a, malta vui bang i liah zeuh zel leh nuam hunphet hi. Uisa aduhten duh mahmah ua, himahleh, uisa amah chauh a huan nimtop a neek sangin - lengmasel hiam, anphui hiam toh huan khom lim diak a; tua uisa a helpih, sohpih a om chiangin uisa ahihna dau sak tuanlou in, tua uisa - uisa sak khol diak hi, chi uhi.
Huchimah bangin, mikhat in - bil a azakte, mit a amuh leh khovel a ahinsung a athiltuahte ah ngaihdan leh ngaihtuahna nei thei. Huai atak a omte kia hilou in mihing lungsim a om, atak a tung ngeilou ding zawng thil tampi om hi. Huchi bang thilte ngaihtuah a, sui a, gen a, phuak a, sa a a om chiang in, mi phaktan pha, mi ann neek hun a ann ne a, mi kam khuah hun a kamkhuah thei mi khat, mi taktak chei a chei theih mihing ahi chih ki chian hi. Huai tuh literature i chih hi.
Literature ichih thu leh la, mit a muhtheih a kilang khen lam gam a om, migen i zakte sang a thuk zaw, mihing suangtuahna, a let leh neu leng teh vuallouh – mihing ngaihtuahna khovela awmte gen khiakna, phoukhiakna ahi i chi thei bok a. Literature mit a I etchiangin i thugelh in Aesop Thangthu Pilte bangin atopna ah Zillai ahon pe ding chihna zawng hi tuanloua. Huai ichih hangin, literature sungah angaih nop leh zaknop huai ding lela pilna leh thudik kiphum zawng tampi om hi. Huai thu hiam - la hiam i sim chiangin ngaihtuahna hon zang sakin, khat vei leh hon kipak sakin, khat vei leh hon khase sak thei a. Huai chiah ahi mihing hinkhua, huchi bang a hon soisa thei thu leh la te literature ahihna hi pen hi.
“ Laiziak tep ahoih kei” chita le hang, hiai thuvual in athu-tun leh a gen hoih mahmah, dik leng dik hi. Himahleh, athu tun ahoih kei chihna hi hetlou lah, literature mit apan et in manphatna neilou hi. Literature toh kisai ahih chiangin – i theihsa, a thumal zat leng i theih luat, athutun leng thulamdang theih ngeilouh hi silou- ahih ziak a tua thumal i theih sate mah volhdan thak, gen khiak dan thak, akilom aki lom a gen dan thak a hon gen a, thu hiam la hiam ahon suah khiak chiangin huai tuh literature hi.
Etsak na’ngin la khat en khomta le hang
,“Sawlkha tang silsial nuai a houlung i kup,
Kumsawt zong ngaih aw zuanna danglou;
Singlel simthu’n lailung non ngilh zong,
Sen ngiingei ngaih aw chi ding hing e”
Hiai atung a la tang khat i gelh khiak ah – la pau hiin a thutun hileh lamdang lua omlou a, theihsa ngen ahi, chih theih hi. Ahihziakin, hiai Article gelhtu pa’n hiai la asim chiangin hiam, misak azak chiang in a dekmul thoutou phial hi.
Amasa in hiai article gelhpa vel chian phot le hang: Saptuam Upa khat hia, zi aneihna kum sawmnih valta a, tanu-tapa nungak-tangval nei ta hi. “Khovel ah som vei kiknon thei hileh, tua a zi ngei mah som leh khat vei neih non ut mi ahi (a zi in lem asak leh!)”. Phalbi leh nipi ataltang in thuak tamta ahih chiang in – mi’n amah thei khol kei mahle uh, ‘pa tal lang’ ahi chih zingkal tengin banga kitaak liimlang in hilh sek hi. A gil zawng akilom hun lel in puak kiikei hi!
Ahihleh, bangziak a hiai Pa Jampu la phuah in hiai Article gelhtupa – hinkhua nikaailam a ding, a kamsiamlou deuhten ‘ pa upa lam’ achih uh- huchi tuk a khoiha, thazoh thei ahi ding, nungak-tangval lai a kik non tum lenglah hi zenzenlou a? Aziak ahihleh, hiai laphuaktu in a la pau zat dan, a thumal lepkhom dan, agentup genkhiak dan asiamluat ziak hi. Huanah, a la khaih hoih a, a thumalte i sim chiang hiam, i sak chiang hiam in a luan khiak dan hoih in, duhthusam hi. Hiai ei voi literature i chih!! Huchi bangin la chitchiatlou, thu ah leng lungkuai, kilom leh etlom ngoihngoih gen khiak dan, puak khiak dan om hi.
Alehlamah, thugelh theih haksa, agelhtupa’n bang ahia a gen tup chih, hilhchet dan tuamtuam a mi siam tuamtuamten aki gen huan ua, simtute pilna leh thil theihsiamna chou thei thu leh la ten zawng literature ah ngaih sang loh uhi.
Mihingte mun tuamtuam ah tengin, nam tuamtuam, avom bang angou bang leh, chin dan ton dan, pau leh ham ah te kilamdang mah le hang, mihing ihihna sung-gil, alaimu tak ah kibatna om hi. Hiai asung-gil tak khoih kha thei literature ten koi mun peuhah ngaihnat loh a, khovel ah gamgi neilou in koi peuh ah ta vek in, apaina peuh ah kong zapi ahon in om a, lehlam leh lam ah na vai dontu ding om hi. Huaiziakin, nidanglai BC 1000/900 vel a kigelh Hebru literature Sam Laibu ichih mai uh tuni tanin ngaihnat in om hi. Huanah, BC hunlai a Greek literature Homer gelh, Iliad leh Odyssey te tuni tanin mihingten ngaisang lai uhi.
Huanah, kum 500 vel paita a English laigelh siam Shakespeare in a gelh Tangthu, Liimchin leh Lavui te tuni tan in – luilou in thaktou zelin khangthak ahong piang touzelten thaksak tou zel uhi. Aziak bang hiam ichihleh, mihingte apotham a ikilamdan nate, mel leh puam mai hilou, chindan ton dan, laisiamna, sum-leh-pai hauhna leh gentheihnaten a suklam dang khaklouh, mihing sung-gil a om , mihingte mihing ahihna uh khoih kha a kigelh ahih ziak hi uhi.
Literature bang ziaka zila, ngaipoimoh ding ihi hiam i chih leh, literature hi mimal leh nam lungsim, nam zia te hilh chetna hoih pen ahih ziak hi. Mihing hinkhua i chih muh theih a kilang khia leh kilang khe lou om a. Huanah, mihing ngaihtuahna khovel atak a tungtheilou lah, mihing lungsim suangtuahna a lah om boksite literature apan in kisui thei hi. Mihing hinkhua a om- itna, kingaihnatna, phattuam ngaihna, lomhoih aki bolna, muanhuaina , ginomna leh zalennate literature in tunvek hi. Huaithute i zil a i lungsim a ingaihtuah chiangin pilna, mipiching hihna leh thiltheih siamnate hon pia a. Pau leh ham zawng phungvuh in - kaankuah hi. Huaiziaka, literature ki zil hi.
Literature ichih chiangin novel te, poetry chi tuamtuam, play te, short story te leh essay te huam tel vek hi. Literature in lungsim ngaihtuahna hihliana, lungsim ngaihtuahna ah a sauzaw leh za zaw hon musak a, hin khua nuam sak a, hon sukipak bok hi. Huaiziakin, literature a sang minam khempeuh nam leh gam enkoltu dingin chin ua, gam piakin zawng om uhi.
Nam pil leh nam changkang peuh literature ah hausa ua. A changkan ziak ua literature a hausa hilou in, literature a ahauhsak ziak ua nam changkang suak hi zaw uhi. Literature ichih nam khat damkhosuah na’ng a kulhpi poimohpen khat hi a. Literature nei mulmallou namte atenna gam uh leh amau min suang gam, Map a koktheih ding nei khovel pianchil apan tuni dong om ngeinailou a, tunung chianga zawng a om gintak huailou hi. Literature hoih neiten aneiloute ol ol in pau leh ham, culture leh khovel muhdan ah te nomvalh ua, literature hoih nei ten khovel khangthu gelh uh a, amau gendan leh chiamteh dan ahi dan suak suk mai hi.
Tulai khovel ah sepaih leh galvan toh lalgam bolin, gam kek theih hi nonlou a. Himahleh, literature - ngaihtuahna, khovel muhdan, chindan ton dan, pau leh ham ah gamkek in nam dangte gallaak in lak theih hi. Huchi bang mahin, literature lam a na kulhpi luh khiakin om thei a. A hihkei leh, nang aluh khetu, gal laak a midang la tu na hi thei a. Hiai tungtangah neutral chih omthei lou a, a koi zaw samsam hiam na teel ngai hi. Huaiziakin, nang dam sung kia ngaih tuahlou a, khangthak hong om dingte, na tu leh tate dam khosuahna dinga literature kulhpi muanhuai na not siat kul hi.
No comments:
Post a Comment