KA PU KHANNENG

Ka Pu Khanneng(ka Nu U) leh alawi nu, ka Pi Ngai, Lungchin / Empai khua, Churanchandpur District, Manipur ateng te date 09-12-2007 ni in atapa uh ka Pu Thangzalam leh te innkuan, Vasant Vihar, New Delhi a awmte veh ding in Lentheihna in Imphal apan Delhi tan leng uh a. Huai a ka Pu’n Lenna sunga a laphuah,

Vaimang siamsil thangvan zawlah
Kawi tawh holung kum ing
Zatam vualgen Delhi vangkhua
Vawnsiang zawt nuam kasa, chi hi.

Ka Pu Lamte leh a lawi nu ka Pi Mawii in anu leh pate uh date 11-12-2007 niin Delhi ah khawlai vak pih ua. Huaiah, Indira Gandhi Memorial Building ah va hawh pih uhi. Huai Building sung a a awmlai a, ka Pu Khanneng laphuah,

Theihloh kumpi na nua chiangah
Sausak lam bang vel ing
Zatam tatna zing vai na hawm
Laukha’n na lung zuang hiam.

January 18, 2008 velin ka Pu Lamte inn ah kava hawhleh Ka Pu Nengte kava mu hi. Kum hiai zahta ka Pu Khanneng tawh ka kimuhloh nung ua kimu ka hihchiang un gen ding bang vang zezen hi. Ka Pu kiangah ka neulai ua a inn katau khawng ua ka lasak sek uh, a la avek ale ka theih nawnloh khanglui la khat ka dawng a. Hiai anuai abang hi:

Ka Pa Tapa chi ngam lang e
Phunglai ho nuam ngai ing e
Gamlai tulta anah tual kia
A bul a sawlbang a bang, chih hi.

Ka Pu kianga hiai la bang chihna hiam chih ka dawt leh hi bang in gen hi:
Hiai laphuaktu Pu Pum Kho Mang Guite, Haichin hausa pa hia. Tuni tanin damlai a, Chikha , Burma ah khawsa hi chi hi. Haichin khua ahihleh Burma gam sung a awm India leh Burma gamgi zul a awm khua khat hi.

Hiai la hawngpianna ahihleh Pu Pum Kho Mang leh akhuate uh mikhat tawh kina uhi. Tua aki nak pih pa’n dawmlo in chizialzial hi mai thei hi. Himahleh, Pu Mang in, ‘Ka pa tapa chi ngam lang e / Phunglai ho nuam ngai ing e” chi ahih leh - ‘Ka pa tapa chi a ki sial a kinak kisel ngamlo / ut lo ka hi, huai sangin beh leh phung, u lah nau ki tuak diamdiam a awm ut zaw ing a, kihotheih mahmah ngai a- khelah ka hi’ a chihna hi chi hi.

Huanah, “Gamlai tulta anah tual kia zawng / A bul a sawl bang a bang” chihpen ahihleh “Gam lakah sing hawngpo in hawng khangto a. Hawng khangto zelin hawng sang hiai hiai a, akipatna abul suk-et hi. Himahleh, chikni chiang hiam in a nah leh a hiangte hawng kiak hun awm a, ahawng kiak chiang in aki patna bul mah ah ki bangin, a hawng kipatna mun mah ah kik nawn hi’ chihna hi chi hi.

Mau leh guate khangto in sang hiai hiai ua. Himahleh, ahawngsaan laklawh chiang un, anuai lamah hawng kui nawn uhi. Huchimah bangin, mihingte leng Pathian leh Siamtu / the unseen hand panpihna in khangto zel mah le hang chikni chiang hiam a, mihing a piang peuh mah in I pumpelh theihloh ding ‘lei tung a mahni hun tawp’ itunni a I luangkiang a hawntutpih a, it a hawnkah dingte I u leh nau leh I lawmte mah hi.