AIRPORT

Gelhtu- Khamkhokam Guite

“Security Check ah luut hun a hita” cih hon puang ua, lut ding in a Bag kuah in cibai hon buuk a, “Mangpha” a cihna in a khut hon vaanphei in, “Ka tun ciang in k’on phone ding aw” ci kawm in Security lam ah hon luut san hi. Security a a luut nung in, inntung lam a kahtou in, Leenna a aluut dek ciang a apaina ding lampi muh theihna tutphah ah kava tu hi. A lawmte toh Leenna a luut dia tonkhawm, a bil a MP3 gui kai lengleng den ka ngaal muh a. Innsawng tunglam apan amah ngaal-et ding a hon gingta ahi ngei dia, hon mu thei kei mahleh, ka omna lam a hong kihei in akhut in hon “Bye, bye” hi.

A nunglam apan hon gamlaat hiaihiai ngaal-et kawm in, a Nu toh a Birthday masa ka lop ni uh ka lungsimn in hong lang a, a hong din theiha - a kalsuan theih masak ni leh, ‘Pa’ acih theih pat nite kou innkuan a ding in zaw Khapi a mihing alut masak ni uh sang in thupi zaw hi.

Hunte hong pai zel in hong pau thei a, ni khat ka aang a hong tu kawm a, “ Pa, ka Nu toh, na nih un hon teek san ngei het kei un aw” ci a hon nget nite hawn phawk khesak hi. Kum hiai zah leh hun hiai zahta’ paita mah leh, Leenna a lut ding a siiksan a akahtouh lai en in; tukverh liimlang a hong lang kua hiam khat, talkolh vilvel leh, a bak samte a kaang leh a vawm kihel niknek khat ka mit heem a melh kawm in, “ Hi tham e, kou hihtheih a awm leh zaw, k’on teek san ngei het kei ding uh aw” ka lungsim in ka ci siausiau hi.

Leenna kongkhaak khaakta ua, Leenna kaalbi Tractor in hon kaih khiak lai en kawm in, ni khat a neucik lai a, “ Pa, ka let ciang in leng nou kiang ah hon om sak gige un aw” acih lai ngaihtuah kawm in, inn a alupna pindan om ding dan ka lungsim mitkha ah hong lang a. A lupna pindan baang a Sanapi kikhai in khohar tak a ahihtheih om sun “ tik, tok, tik tok…” ci keuhkeuh ding in ka ngaih suun hi. Huai Sanapi in tha-iit tak in pai pai leh, hun paisate pheek bang a zialkik a, hun paisa hun nuamte samkiik a, huai a omna pindan huulum’ lai hong tungkiik non thei ding a ngaihtuah hileh kilawm a, hun hong tung dingte hong tung mengmeng leh ci hileh kilawm a, ngaaklah tak a paipai ding in ka suangtuah hi. Huai a Dohkaan Drawal sunga High School a kailai a a Autograph lui niimnem, Ribbon lui zaw seem akigaak, Skul naupang khutlam koi ngiitngiat a kigelh, teirol lawm taa te kingaih nat thu kigelhte, tuni in zaw innkuan gou khat bang in manpha hi. A lupna kiang a Dressing Table tung a Make-up zat khitlouh a anawtsiatte’n thil om dan theisiamlou a, ngaak khat nei uh hileh kilawm a dak hiihiai geuh ding un ka lungsim suangtuahna in mu hi.

Leenna lengkhe ding in kisata a, a Navigation Light te dum kiikiai in hong vaak ua, phe leplep uh hi. Leenna nunglam a loupate Leenna khawl apan huihte’n seem ua, vuang ngeelngeel uh hi. Hucih hunlai in a neulai a, ni khat, a Home Work ka hihpih leh, “ Pa, Mathematics na naak siam ngei. Nang na neulai a ka Pu in Mathematics hon hilhilh hia?” cih hon dot lai ka thei khia hi. A hunlai a ka dawnna thei non kei mah leng “ Hon hilh e, Mathematics saang a saang zaw hon hilh a hiai tan hon tun ahi; ken nou bang tan kon tun zou mah diam maw!” ka lungsim a ka cihleh, ka mit ah honliah luakluak khat hong om in, ka mit muh theihnate hongvai a, ka et peuh nih ngen in ka mu hi. Ka gawl ah bang hiam in hon huutou a, ka kim-leh-kiang a omte lak ah ka mualphou dektak hi.

Runway apan Leenna leeng khe dia kisa a kangtou hiaihiai ka et lai tak in, ka kiang a nupi khat in “Nou a te’n leng Suty hong zang uh hia?” cih hon dot leh ka kiguih a, “Hi, hong zang uh” ci in ka dawng hi.

Hi e, ‘Suty hong zang’ hita uh hi!!!