Gelhtu- Khamkhokam Guite
“Security Check ah luut hun a hita” cih hon puang ua, lut ding in a Bag kuah in cibai hon buuk a, “Mangpha” a cihna in a khut hon vaanphei in, “Ka tun ciang in k’on phone ding aw” ci kawm in Security lam ah hon luut san hi. Security a a luut nung in, inntung lam a kahtou in, Leenna a aluut dek ciang a apaina ding lampi muh theihna tutphah ah kava tu hi. A lawmte toh Leenna a luut dia tonkhawm, a bil a MP3 gui kai lengleng den ka ngaal muh a. Innsawng tunglam apan amah ngaal-et ding a hon gingta ahi ngei dia, hon mu thei kei mahleh, ka omna lam a hong kihei in akhut in hon “Bye, bye” hi.
A nunglam apan hon gamlaat hiaihiai ngaal-et kawm in, a Nu toh a Birthday masa ka lop ni uh ka lungsimn in hong lang a, a hong din theiha - a kalsuan theih masak ni leh, ‘Pa’ acih theih pat nite kou innkuan a ding in zaw Khapi a mihing alut masak ni uh sang in thupi zaw hi.
Hunte hong pai zel in hong pau thei a, ni khat ka aang a hong tu kawm a, “ Pa, ka Nu toh, na nih un hon teek san ngei het kei un aw” ci a hon nget nite hawn phawk khesak hi. Kum hiai zah leh hun hiai zahta’ paita mah leh, Leenna a lut ding a siiksan a akahtouh lai en in; tukverh liimlang a hong lang kua hiam khat, talkolh vilvel leh, a bak samte a kaang leh a vawm kihel niknek khat ka mit heem a melh kawm in, “ Hi tham e, kou hihtheih a awm leh zaw, k’on teek san ngei het kei ding uh aw” ka lungsim in ka ci siausiau hi.
Leenna kongkhaak khaakta ua, Leenna kaalbi Tractor in hon kaih khiak lai en kawm in, ni khat a neucik lai a, “ Pa, ka let ciang in leng nou kiang ah hon om sak gige un aw” acih lai ngaihtuah kawm in, inn a alupna pindan om ding dan ka lungsim mitkha ah hong lang a. A lupna pindan baang a Sanapi kikhai in khohar tak a ahihtheih om sun “ tik, tok, tik tok…” ci keuhkeuh ding in ka ngaih suun hi. Huai Sanapi in tha-iit tak in pai pai leh, hun paisate pheek bang a zialkik a, hun paisa hun nuamte samkiik a, huai a omna pindan huulum’ lai hong tungkiik non thei ding a ngaihtuah hileh kilawm a, hun hong tung dingte hong tung mengmeng leh ci hileh kilawm a, ngaaklah tak a paipai ding in ka suangtuah hi. Huai a Dohkaan Drawal sunga High School a kailai a a Autograph lui niimnem, Ribbon lui zaw seem akigaak, Skul naupang khutlam koi ngiitngiat a kigelh, teirol lawm taa te kingaih nat thu kigelhte, tuni in zaw innkuan gou khat bang in manpha hi. A lupna kiang a Dressing Table tung a Make-up zat khitlouh a anawtsiatte’n thil om dan theisiamlou a, ngaak khat nei uh hileh kilawm a dak hiihiai geuh ding un ka lungsim suangtuahna in mu hi.
Leenna lengkhe ding in kisata a, a Navigation Light te dum kiikiai in hong vaak ua, phe leplep uh hi. Leenna nunglam a loupate Leenna khawl apan huihte’n seem ua, vuang ngeelngeel uh hi. Hucih hunlai in a neulai a, ni khat, a Home Work ka hihpih leh, “ Pa, Mathematics na naak siam ngei. Nang na neulai a ka Pu in Mathematics hon hilhilh hia?” cih hon dot lai ka thei khia hi. A hunlai a ka dawnna thei non kei mah leng “ Hon hilh e, Mathematics saang a saang zaw hon hilh a hiai tan hon tun ahi; ken nou bang tan kon tun zou mah diam maw!” ka lungsim a ka cihleh, ka mit ah honliah luakluak khat hong om in, ka mit muh theihnate hongvai a, ka et peuh nih ngen in ka mu hi. Ka gawl ah bang hiam in hon huutou a, ka kim-leh-kiang a omte lak ah ka mualphou dektak hi.
Runway apan Leenna leeng khe dia kisa a kangtou hiaihiai ka et lai tak in, ka kiang a nupi khat in “Nou a te’n leng Suty hong zang uh hia?” cih hon dot leh ka kiguih a, “Hi, hong zang uh” ci in ka dawng hi.
Hi e, ‘Suty hong zang’ hita uh hi!!!
Sunday, February 7, 2010
MICIH A DING TANCIN HOIH
Huan, angel in a kiang uah,
Lau khei unla, ngai un, mi chih
adingin tanchin hoih kipah
huai mahmah ka hontut a hi.
Luka 2:10
Hiai khovel a na kim leh kiang en vel mah dih. Tang leh mual, phaizang leh lui dung a tui luang ziahziahte na mu a. Hiai tang leh mualte sing leh lou in tuam dim a. I khopite uh en mah dih, inn hoih pipi leh inn sawng sang taktak khuaikhaak bangin kithuap lemlom hi. Huai tang leh mualte a mun ah va en cian le cin, kua hiamte mimal gam hiam, Huan hiam na hi ding a. Huai phaizang nuamtakte leng kuate hiam Leilet/ Tuilou na hi ding hi. Hiai na muhtheih thil khempeuh leh huai kholai a pai duamduam mihingte tan pha in, a neitu tuam nei ngen hi ding uh hi.
1. Khovel ah mi tengteng neihtheih ding a vaang mahmah:
Hiai khovel ah mi tengteng a ding a kibawl leh mi tengteng neih theih ding thil a tawm mahmah a. Pathian in mihingte Eden Huan apan a hawl khiak apan a tuni dong in, mihingte ngaihpoi mohpen ahihleh, mahni mimal thil ding, ‘ kei a’ I cihtheih ding uh ahi a. Khovel a thil hoih leh manpha I muhte uh mahni a ding in I deih ua, midang piak ding leh neih ding in I enlah kei uh hi. Hiai mahni masialna in guuktaak, laaktaak leh neekguukna mun ah hon kai lut sek uh hi. A hausate’n lah neih beh tum in a suun a zaan in buai ua, a neilou leh mizawngte’n lah cikni hiam ciang a hauhsak leh neih hun om ding a I gintak ziak in, lam-etna in I hing uh hi.
Huai na muh theih sing leh loute nang a ding in va la mah dih, huai gam-awng hi a na theihna munah Huan hiam, Aankam lei hiam va bawl mah dih, kuate hiam in ‘kei a ahi, ka gam sung ahi’ ci ding ua, thubuai hon bawl khum mai ding uh hi. Bangmah aneitu omlou khovel ah omlou hial hi. Mahni a ding biik I deihna lam un khovel “ A hat hat dam khosuahna” mun tang sak in, a hatlou leh pauzouloute nolkhinna mun I suak sak uh hi. Huaiziak in, hiai khovel ah mi tengteng, a zawng-a-hau uapzou a akibang a I neih theih ding uh bangmah omlou hi ici ngam uh hi.
2. Mi tengteng a ding, mi tengteng neih theih ding ikiphamoh uh:
Hiai khovel ah mi thupi taktak na piangta ua. Himahleh mi tengteng uapzou, mi tengteng a ding vaang mahmah hi. Politician thil hihthei taktak leng piangta ua. Ahihziak in, kuate hiam aa tuam hi a, mi tengteng a ding hilou in, deihsak tuam, phungvuh tuam nei sek uh hi. Mihausa taktak leng na omta ua, khenkhat te’n zaw phattuam pih mahmah mai thei ua, a hauhsakna uh zal lengzou pha mai thei uh hi. Ahihziak in, mi tengteng huam zoulou in, hiai langleihna khovel ah a tancin uh, “Mi Cih A Ding Tancin Hoih” cing zoulou uh hi.
Ahihleh, I gam-leh-nam un bang ahia akiphamoh? Tuni in I gam un akiphamoh langleih leh deihsak tuam neihna hawlmang a; mi tengteng uapzou leh akibang a deihsaktu ding I kiphamoh pen uh hi. Kuate hiam a-tuan-a-kaan a deihsak a, mi dang teng sang a phungvuah tuam sang in, mi teng deihsakna kibang a deihsaktu ding I nam un kiphamoh mahmah hi. Huaiziakin, I gam uh leh I minam uh kia hilou in, tuni in, mi tengteng in ‘kei a’ acih theih vek ding uh, Tancin Hoih khovel in I kiphamoh uh hi.
3. Mi Cih A Ding Tancin Hoih a hong tungta:
Khovel in a kiphatmoh penpen damdawi hong tung a, angel in belampute kiang ah “ Mi chih adingin tanchin hoih kipahhuai mahmah ka hontut a hi” ci in hilh hi. Dam khiak ding lam-et huai nawnlou, si dia kisa damlou kiang a dam ngeingeina ding damdawi piak bang in, khovel mihingte dam ngeingeina ding Tancin Hoih khovel ah hong tung hi.
Mi tengteng uapzou Tancin Hoih Toupa Jesu Kris ahong tun in khovel paidaan teng kilam dang a, mimawlpen a ngaih Belamcingte leh khovel a mipil penpen a ciamtehte’n tuplawk leh gen khawm leng omlou in ‘Gan aanpiakna Kuang’ lam manoh khawm uh hi. Mi hing thil tup hileh zaw, khovel in mi pil a angaihte uh leh khovel in mimawl leh tuantual a angaih uh belamcingte mun khat a khum khawm thil hitheilou khat hi ding hi. Ahihziak in, vaanlam thil hihtheihna leh theihsakna in mi pilte leh mi mawl- belam cingte Krismas masapen zang khawm sak hi.
Belampute a dingin zaw amau dinmun toh kituakin, gan aan piakna kuang lam manoh a zin khiak thil lamdang lua hilou mai thei a. Himahleh, mi pilte, gam-ukpa Herod tanpha in a thulaak mahmahte, huai gan aanpiakna zong a gam gamlapi apan ahong pai uh khovel a thil om ngeinailou hi. Himahleh, huai naungek Jesu zaw akuapeuh in ‘kei a ahi’ acihtheih uh hi a, khovel a dinmun leh rank te’n subuai phalou uh hi. Toupa Jesu omna ah mi pilte kaih niam in om uh a, mimawl penpente dawmsang in om sek uh hi. Toupa Jesu a om ciang in ngiate leh belamnoute gamta’ khawm thei uh hi.
Toupa Jesu nungzuite ngaihtuah mah dih. Toupa muhin khovel in angaihsangte leh khovel in a etniamte kibang vek hi. A nungzuite laka Luka icih, siamna sangtak nei Doctor hi a, himahleh, Peter icih ciang in Ngamat a neek zong, a neekzonna a niam dungzui in, a houlimna niam a, ngaphul taan hun leh leen khui dan loungal khovel thil ah houlim na’ng thei khollou ding in up huai hi. Paula icih ciang in, beh-leh-phung thu ah hi in, siamna lamah hitaleh, mi vaantaang tung ami hi a; huai hunlai a Judia gam a mi tawmcik in aneihphaak uh, Rome khua-leh-tui hihna nei pha hi. Hucibanga pianna leh khankhiakna kibanglou taktak Luka, Paula leh Peter te’n kituak tak in Toupa Jesu nung zui in, A nna semkhawm dialdial thei uh hi. Toupa Jesu leng ‘Dawi zawl ahi” ci a ngoh a a om ciang in leng huatna leh khaatna in dim tuanlou a, phuba laak ding dan buaipihlou hi. Hucimah bang in, mipite’n kumpi dia koihtum a abuai pih ciang un zawng kihisak in, a omdan, apaudan hong tuampah tuanlou hi! A hinkhua in zahtaak huaina leh takna kengtel a, huaite’n mite a kiang ah hip uh hi.
Khovel koi mun peuh a Toupa Jesu a lianpen a koihna mun ah zaw kihuatna leh kimelmaakna om theilou a, ki-ittuahna in dim zaw hi. Mi gentheite tantuan ding laaksak leh guuksak in omlou a, nam tawm leh nam tuantual deuhte leng simmoh in omlou ua, khotang hinkhua leh khovel kivaihawmna thil ah a pau zouloute siikdeen leh palzut in omlou uh hi.
Huaiziakin, tukum Krismas 2009 I zat in,
i) Krismas lungsim pu in, Toupa Jesu kingaihniamna, Pathian mihing bang a mun niampen a hong piangna, “ Kris Jesu a leng om, hiai lung sim” (Phil. 2:5) nei in, tu kum Krismas I zat apan in; lalna leh thuneihna ziak a kisatheite kai niam a; a dik-a-gamtatna ziak a gentheite pahtawina in zang ni hang. “ A laltutphah ua lal tute a kai khia a, nam tomte tuh a pahtawita a. Gilkialte thil hoihin a hihvah a, mihaute khut vuakin a pai mang sakta hi”. Luka 1: 52,53.
ii) Krismas lungsim pu in, vaan angelte lapawl in a gen mah bangin “Lemna” lungsim pu ni hang. I lak ua kihazatnate, thiikthusiate, kihuphulhnate leh kisaktheihnate pai khia in “ Kris Jesu a leng om, lungsim” pu le hang, Amah zaw lei leh vaan lalpen himahleh mun niampen hong teel a, hih damtu in sihpih tham liam thuak a, tui bawltu tui duh in bah a, khamuantu tangkhat takin vaakvai a, hinna petu nang adingin si a, khovel bawltu leikawm ah phum in om hi. Hucibang Kris aleng om lungsim tuni a Kristiante’n puciat le hang,Zawlnei Isai in Kris lalgam ana gen kholh “ Ngia leh belamnou lah a gamta khawm ta diing ua,…. Ka mual siangthou Zion ah siatna leh thil hoihlou himhim a omta kei diing” ci a ana gen ilak uah atak in hong tung thei ding a, lei ah lem lengta ding hi. Isai 65:25.
iii) Krismas lungsim pu in, Toupa Jesu Kris - micih a ding, mi teng uapzou tancin hoih ahih bangin, ei minam leng kila tuam lou, kihui tuamlou, langleihlou leh Toupa Jesu Kris ziak a belhtaak minam leh mimalte hih tumta ni hang.
I Bible cangteel ua pan I muh bangin, angel in “ tanchin hoih kipah huai mahmah ka hon tut a hi” a ci a. Khovel mihingte a dingin hiai bang a thu kipahhuai dang omlou hi. Hiai tancin hoih, Bethlehem a pan hong kipuang khia in taangtawn a si dingte tatkhiakna thu leh vaan gam cabi hon pia hi. Huaiziakin, hiai tancin hoih mi tengteng uapzou neitute ihih bang un “ Vaan Mang gou, pialgaal Suangmanpha ka neita” ci in la I sa uh hi. Himahleh, hiai la I sak ciang un Suangmanpha neite mel I pu uh hiam? I Krismas zat dante uh leh I om dan himhim uh ‘pialgaal Suangmanpha neite’ zat ding dan leh om ding dan ahi hiam cih kiveel cian ciat ni hang. Tancin hoih kipahhui mahmah, mi tengteng a ding hizawmah neitute ihih dungzui un, kipaktakin hiai Krismas zang ciat ni ciin ikicial hi.
Aw Jesu, tunin kou lungsung bawng inn sung ah,
Hong piang thak nawn in ka tangtawn Kumpi ding un;
Ka khut sang gah uh Na tun Mari khut hi hen,
Tangtawn in kipak in nunnuam tawntungta nu’ng.
(EBCC-Aizawl 25/12/2009 nitak kikhop a, Upa G.Khamkhokam thugen ding ahi)
Lau khei unla, ngai un, mi chih
adingin tanchin hoih kipah
huai mahmah ka hontut a hi.
Luka 2:10
Hiai khovel a na kim leh kiang en vel mah dih. Tang leh mual, phaizang leh lui dung a tui luang ziahziahte na mu a. Hiai tang leh mualte sing leh lou in tuam dim a. I khopite uh en mah dih, inn hoih pipi leh inn sawng sang taktak khuaikhaak bangin kithuap lemlom hi. Huai tang leh mualte a mun ah va en cian le cin, kua hiamte mimal gam hiam, Huan hiam na hi ding a. Huai phaizang nuamtakte leng kuate hiam Leilet/ Tuilou na hi ding hi. Hiai na muhtheih thil khempeuh leh huai kholai a pai duamduam mihingte tan pha in, a neitu tuam nei ngen hi ding uh hi.
1. Khovel ah mi tengteng neihtheih ding a vaang mahmah:
Hiai khovel ah mi tengteng a ding a kibawl leh mi tengteng neih theih ding thil a tawm mahmah a. Pathian in mihingte Eden Huan apan a hawl khiak apan a tuni dong in, mihingte ngaihpoi mohpen ahihleh, mahni mimal thil ding, ‘ kei a’ I cihtheih ding uh ahi a. Khovel a thil hoih leh manpha I muhte uh mahni a ding in I deih ua, midang piak ding leh neih ding in I enlah kei uh hi. Hiai mahni masialna in guuktaak, laaktaak leh neekguukna mun ah hon kai lut sek uh hi. A hausate’n lah neih beh tum in a suun a zaan in buai ua, a neilou leh mizawngte’n lah cikni hiam ciang a hauhsak leh neih hun om ding a I gintak ziak in, lam-etna in I hing uh hi.
Huai na muh theih sing leh loute nang a ding in va la mah dih, huai gam-awng hi a na theihna munah Huan hiam, Aankam lei hiam va bawl mah dih, kuate hiam in ‘kei a ahi, ka gam sung ahi’ ci ding ua, thubuai hon bawl khum mai ding uh hi. Bangmah aneitu omlou khovel ah omlou hial hi. Mahni a ding biik I deihna lam un khovel “ A hat hat dam khosuahna” mun tang sak in, a hatlou leh pauzouloute nolkhinna mun I suak sak uh hi. Huaiziak in, hiai khovel ah mi tengteng, a zawng-a-hau uapzou a akibang a I neih theih ding uh bangmah omlou hi ici ngam uh hi.
2. Mi tengteng a ding, mi tengteng neih theih ding ikiphamoh uh:
Hiai khovel ah mi thupi taktak na piangta ua. Himahleh mi tengteng uapzou, mi tengteng a ding vaang mahmah hi. Politician thil hihthei taktak leng piangta ua. Ahihziak in, kuate hiam aa tuam hi a, mi tengteng a ding hilou in, deihsak tuam, phungvuh tuam nei sek uh hi. Mihausa taktak leng na omta ua, khenkhat te’n zaw phattuam pih mahmah mai thei ua, a hauhsakna uh zal lengzou pha mai thei uh hi. Ahihziak in, mi tengteng huam zoulou in, hiai langleihna khovel ah a tancin uh, “Mi Cih A Ding Tancin Hoih” cing zoulou uh hi.
Ahihleh, I gam-leh-nam un bang ahia akiphamoh? Tuni in I gam un akiphamoh langleih leh deihsak tuam neihna hawlmang a; mi tengteng uapzou leh akibang a deihsaktu ding I kiphamoh pen uh hi. Kuate hiam a-tuan-a-kaan a deihsak a, mi dang teng sang a phungvuah tuam sang in, mi teng deihsakna kibang a deihsaktu ding I nam un kiphamoh mahmah hi. Huaiziakin, I gam uh leh I minam uh kia hilou in, tuni in, mi tengteng in ‘kei a’ acih theih vek ding uh, Tancin Hoih khovel in I kiphamoh uh hi.
3. Mi Cih A Ding Tancin Hoih a hong tungta:
Khovel in a kiphatmoh penpen damdawi hong tung a, angel in belampute kiang ah “ Mi chih adingin tanchin hoih kipahhuai mahmah ka hontut a hi” ci in hilh hi. Dam khiak ding lam-et huai nawnlou, si dia kisa damlou kiang a dam ngeingeina ding damdawi piak bang in, khovel mihingte dam ngeingeina ding Tancin Hoih khovel ah hong tung hi.
Mi tengteng uapzou Tancin Hoih Toupa Jesu Kris ahong tun in khovel paidaan teng kilam dang a, mimawlpen a ngaih Belamcingte leh khovel a mipil penpen a ciamtehte’n tuplawk leh gen khawm leng omlou in ‘Gan aanpiakna Kuang’ lam manoh khawm uh hi. Mi hing thil tup hileh zaw, khovel in mi pil a angaihte uh leh khovel in mimawl leh tuantual a angaih uh belamcingte mun khat a khum khawm thil hitheilou khat hi ding hi. Ahihziak in, vaanlam thil hihtheihna leh theihsakna in mi pilte leh mi mawl- belam cingte Krismas masapen zang khawm sak hi.
Belampute a dingin zaw amau dinmun toh kituakin, gan aan piakna kuang lam manoh a zin khiak thil lamdang lua hilou mai thei a. Himahleh, mi pilte, gam-ukpa Herod tanpha in a thulaak mahmahte, huai gan aanpiakna zong a gam gamlapi apan ahong pai uh khovel a thil om ngeinailou hi. Himahleh, huai naungek Jesu zaw akuapeuh in ‘kei a ahi’ acihtheih uh hi a, khovel a dinmun leh rank te’n subuai phalou uh hi. Toupa Jesu omna ah mi pilte kaih niam in om uh a, mimawl penpente dawmsang in om sek uh hi. Toupa Jesu a om ciang in ngiate leh belamnoute gamta’ khawm thei uh hi.
Toupa Jesu nungzuite ngaihtuah mah dih. Toupa muhin khovel in angaihsangte leh khovel in a etniamte kibang vek hi. A nungzuite laka Luka icih, siamna sangtak nei Doctor hi a, himahleh, Peter icih ciang in Ngamat a neek zong, a neekzonna a niam dungzui in, a houlimna niam a, ngaphul taan hun leh leen khui dan loungal khovel thil ah houlim na’ng thei khollou ding in up huai hi. Paula icih ciang in, beh-leh-phung thu ah hi in, siamna lamah hitaleh, mi vaantaang tung ami hi a; huai hunlai a Judia gam a mi tawmcik in aneihphaak uh, Rome khua-leh-tui hihna nei pha hi. Hucibanga pianna leh khankhiakna kibanglou taktak Luka, Paula leh Peter te’n kituak tak in Toupa Jesu nung zui in, A nna semkhawm dialdial thei uh hi. Toupa Jesu leng ‘Dawi zawl ahi” ci a ngoh a a om ciang in leng huatna leh khaatna in dim tuanlou a, phuba laak ding dan buaipihlou hi. Hucimah bang in, mipite’n kumpi dia koihtum a abuai pih ciang un zawng kihisak in, a omdan, apaudan hong tuampah tuanlou hi! A hinkhua in zahtaak huaina leh takna kengtel a, huaite’n mite a kiang ah hip uh hi.
Khovel koi mun peuh a Toupa Jesu a lianpen a koihna mun ah zaw kihuatna leh kimelmaakna om theilou a, ki-ittuahna in dim zaw hi. Mi gentheite tantuan ding laaksak leh guuksak in omlou a, nam tawm leh nam tuantual deuhte leng simmoh in omlou ua, khotang hinkhua leh khovel kivaihawmna thil ah a pau zouloute siikdeen leh palzut in omlou uh hi.
Huaiziakin, tukum Krismas 2009 I zat in,
i) Krismas lungsim pu in, Toupa Jesu kingaihniamna, Pathian mihing bang a mun niampen a hong piangna, “ Kris Jesu a leng om, hiai lung sim” (Phil. 2:5) nei in, tu kum Krismas I zat apan in; lalna leh thuneihna ziak a kisatheite kai niam a; a dik-a-gamtatna ziak a gentheite pahtawina in zang ni hang. “ A laltutphah ua lal tute a kai khia a, nam tomte tuh a pahtawita a. Gilkialte thil hoihin a hihvah a, mihaute khut vuakin a pai mang sakta hi”. Luka 1: 52,53.
ii) Krismas lungsim pu in, vaan angelte lapawl in a gen mah bangin “Lemna” lungsim pu ni hang. I lak ua kihazatnate, thiikthusiate, kihuphulhnate leh kisaktheihnate pai khia in “ Kris Jesu a leng om, lungsim” pu le hang, Amah zaw lei leh vaan lalpen himahleh mun niampen hong teel a, hih damtu in sihpih tham liam thuak a, tui bawltu tui duh in bah a, khamuantu tangkhat takin vaakvai a, hinna petu nang adingin si a, khovel bawltu leikawm ah phum in om hi. Hucibang Kris aleng om lungsim tuni a Kristiante’n puciat le hang,Zawlnei Isai in Kris lalgam ana gen kholh “ Ngia leh belamnou lah a gamta khawm ta diing ua,…. Ka mual siangthou Zion ah siatna leh thil hoihlou himhim a omta kei diing” ci a ana gen ilak uah atak in hong tung thei ding a, lei ah lem lengta ding hi. Isai 65:25.
iii) Krismas lungsim pu in, Toupa Jesu Kris - micih a ding, mi teng uapzou tancin hoih ahih bangin, ei minam leng kila tuam lou, kihui tuamlou, langleihlou leh Toupa Jesu Kris ziak a belhtaak minam leh mimalte hih tumta ni hang.
I Bible cangteel ua pan I muh bangin, angel in “ tanchin hoih kipah huai mahmah ka hon tut a hi” a ci a. Khovel mihingte a dingin hiai bang a thu kipahhuai dang omlou hi. Hiai tancin hoih, Bethlehem a pan hong kipuang khia in taangtawn a si dingte tatkhiakna thu leh vaan gam cabi hon pia hi. Huaiziakin, hiai tancin hoih mi tengteng uapzou neitute ihih bang un “ Vaan Mang gou, pialgaal Suangmanpha ka neita” ci in la I sa uh hi. Himahleh, hiai la I sak ciang un Suangmanpha neite mel I pu uh hiam? I Krismas zat dante uh leh I om dan himhim uh ‘pialgaal Suangmanpha neite’ zat ding dan leh om ding dan ahi hiam cih kiveel cian ciat ni hang. Tancin hoih kipahhui mahmah, mi tengteng a ding hizawmah neitute ihih dungzui un, kipaktakin hiai Krismas zang ciat ni ciin ikicial hi.
Aw Jesu, tunin kou lungsung bawng inn sung ah,
Hong piang thak nawn in ka tangtawn Kumpi ding un;
Ka khut sang gah uh Na tun Mari khut hi hen,
Tangtawn in kipak in nunnuam tawntungta nu’ng.
(EBCC-Aizawl 25/12/2009 nitak kikhop a, Upa G.Khamkhokam thugen ding ahi)
Subscribe to:
Posts (Atom)