THE ENIGMA OF GOING HOME

Kum hiai zahta inn lam pai hun ding ngakta a. Sunkhawvak chiangin, kawlbulh theihloh leh gamlat leh nai in adaal theihloh, lungsim suangtuahna in ngaih tuah a. Zaan miala alupna tunga a ihmut chiangin manglam khawvel ah hun leh kumte khawl in, adinna ngei ua ding bangin mu hi.

Hi e, lungsim suangtuahna khawvela a ngaihtuah chiangin, chiklai hiam a, kawilai hiam a a zak leh muhte tuhun a akiang a awm bang leh ging bangin zathei zel hi. Hiai akhawsakna apan lungsim ngaihtuahna khawvela tenga, angaihsut chiangin; kum 40 paita a vaiham-saan-hun a, Sumtawng a Akpi tuilai kawkeek kawma, a Bubah apan leng khia a, Sumsung hawn bawh thawm gingte tu daka thiltung bangin zathei zel hi. Huai Akpi kawkeek ging second khat in 330 metres leeng taleh, tuni leh tuhun in a awmna apan a, 416,275,200 kilometres agamla tungta ding hi. Himahleh, lungsim suangtuahna khawvel ah zaw, 416 maktaduai Kilometre a gamla leh kum sawmli a sawtin haksatna bawllo a, tua Akpi kawkeek ging awlsam takin sam kik thei hi.

A pai hun ding tungdekta a. Kisakkhawlh hun hita hi. Hiai mun ‘zin leh leeng’ banga akingaihna mun, a it leh ngaih te kiang a ‘ei khawlam’ achihsek apan gamla pi a awm himahleh, hiai munah a hatlai sung teng zangzo a. Hiai ‘khualgam’ a atenna inn sung a et chiangin, kil chih leh mun chihin a innkuan tangthu uh gending nei in thei hi. Innbang/Zuak feet nih vel a sang a ganhing lem kigelh leh ABC kawi ngiingei a kigelh, bangzah vei hiam rawng kinuh khumta, muhtheih milmialte a et chiang in, ahunpaisa te ngaihtuahin, achangin nui hiauhiau a. A changin, a muhtheihnate vai a………

Huai innbang a Calendar khaina sikkilh/perek kiphut, nidanga amuh dan leh ngaihdan tawh, tuni a amuhdan kibanglo hial hi. Nidangin, huai innbang a Calendar khaina sikkilh in genneilo a, sikkilh ve maimai khat hi. Himahleh tuni in, huai sikkilh a et chiangin a hinkhua tangthu kemtu muanhuai leh a damsung tangthu tamzaw khaitu hiin thei a. Calender bangzahta huai sikkilh ah kikhaita a, a kum teng a Calendar thak kikhaite a ‘New Year Resolution’ bangzah vei kichiamteh ding hiam chihte angaihtuah maimai hi. A awmna pan hiai innsung a thil tungte kum bangzah sung leh bangzah atam mu dinga, ‘New Year Resolution’ bang zahta bawhsiat lai zawng mit a mutu hi ding hiam chihte ngaihtuah hi! Pau thei in houlimpih theihhileh, huai sikkilh in gen ding bang zahta nei ding a, amah ‘neutral ground’ apan a suk et chiangin hiai inn sung a thil tungte, amuh leh zakte ah ngaidan leh ‘advice’ bang zahta hawn piak ding nei ding hiam chihte angaih tuah hi!

Huai Bathroom kawngkhak a, kum bangzah vel hiam paita a, zingthawh tenga dinsan zawng tehna, Crayon a kigiit te, tuni in zaw anunlui-anunlui tankhawm uh, kohkik a sapkik theih hileh achih vungvungte lak a khat hi.

Aleh lamah, hiai mun a khawlden leh tamden thei hiloin ki ngaihtuah hi. Himahleh, mihingten a hun paisate uh, suanglaipi a laigelh, duster a nulmang bang a nulmang theilo ua. A taksa phel langkhat in, kum hiai zahta leh hun hiai zah, anuam leh haksa ana tuahna mun khelahlo theilo hi. A ma’n ‘khaw lam’ achih, ngai tawk mahleh, a ‘khual tamsawtna mun’ apiang a khang khia – a mahsa bang sapu, asisan apan piangkhia te adingin, a mah ‘khaw lam’ amau adingin mekmak gam suak ding hi, chih zawng thei hi. Mangkangte’n “History repeat itself” na chi ua, amah tunia alungleennate khangsawnte kianga pesawn ding ahi, chih zawng thei hi.

Himahleh, a taksa phel lehlam in, a khawvak muhmasakna mun, a neulai lawmte tawh akhawsak khawmna mun uh, zaan chiang zalmang a amatna mun; sun zalmang a kum hiai zahta ana akhawsak na ‘ka gam, ka lei, ka luguh phum na’ng mun’ achihna mun lung-gulh den hi. Ahita zawngin, lungsim suangtuahna khawvel chauh a awm - ‘liimsiam khawvel’ lung-gulh in, mahni khut a vasa khahkhia in, singdawna sava tuang delh ding ahi de aw?

Kawi lam leh kawilai peuh ah awmta leh, a taksa phel lang khat nawsia bang veve ding hi, chih zawng thei hi. Bangteng hileh, ‘ inn lam’ zuan a pailo thei hilo hiin kingaihtuah hi.

A lungsim mitkha a agal-et chiangin, taangsaam pak hun hidekta a. Khaw khung tangah Ngeisawk pak ding a mum muhtheih in awmta hi. Zolengthe ten zawng tukum a dinga ahun uh beidekta chih thei in a suun a zaan in Zogam awi in khuang den uhi.Liimsing kungah, Luaileng /Naubaan te hunthak, ni thak muak uh hileh kilawm in pak uh a, Khaal hawng tung ding a kisa khawl in, a kuungte (stem) uh tui a dimin puak il-el ngeuh uhi.

‘Hun leh Mun/ Time and Space’ in a let-tang a, a dal zawhloh lungsim suangtuahna in a mailam hun dingte ngaihsun hi. ‘ Inn lam’ atun chiangin, a neulai lawmte tawh, huansung a Behiang kunglak a rocker chair atu in, phalbi nisa lum awi kawm a, aneulai hun nuamte uh sut khawm dingin kingaih sun hi.

‘Inn lam’ atun chiangin, a suut khawm takpi mah ding uam maw??????