GIIT-TA INNKUAN KHAT TANGTHU

Taakzang zau lam lou a neih kum hi a. Gamgi lui leh Sumsuih lui kikal ah lou zau ki phah suaka; zauto lam in Vawmko mual sunsuk a, akhunglam in Dakmual phatou phial hi. Hiai zau ah Taaksing(fir) tam a, agam kiphah dan zong hoih in mun khenkhat ‘munzang/muntaam’ cin a gentheih ding zong om a. Huaiziakin, hiai louzau hi ‘Taakzang’ cih a theih in om hi.

Zomite paunak in “ Heima a tuk Taaksing ciim ut/ Taaksing zong heima a tuk teh ciim” kici a. Taaksing icih heipi a kitou phonte ciim ut diak ua, nidanglai in meisel leh innsung a khonvak ding in a ciim te kizang hi. Huci bang a, taaksing ciim khonvak dia ki zangte “Mei-lah” kici hi. Taak hawng pan a ( thin bark), huanah, taaknai leh akung himhim zong mei a kangbaih sing ci khat ahihziak in, gamkang thuaklou a sibaih hi. Taaknou suanhing ahaksat ziak in “ Taaknou suan hingzoute damsot” zong kici sese hi. Zogam a sing poute lak a a etlom penpen khat himahleh, etkol a humbit ngai singkhat hi. Khangluite’n khuadou ua, kumthak-kumlui a khen ciang un, a hunpaisate uh phok kik a lungzung in hici bang in la nasa uhi:

Kumkhen na dia lahmei ka vak,
Ka sang-gah lai hong lang e.
Ka sang-gahlai hong lang e,
Naubang kahlai hong lang.
(lahmei = meilah)

Buhtuh kipanta a, lou haal in akat siat siallung bulte sel nonta ua. Gamkang a sing leh loupa maivelvulte hong sel non panta uhi. A khosakna uh suksiat a om tungleng vasa tuamtuamten leng lam-etna thak toh buu honsep ua, tuui hon tha in, nithak hunthak adia lam-etna lianpi toh tua atuuite uh opkhum uhi. Tua Taaksingten zong tehthak hon suangin, nidang mah bang in huih in amut ciang in Taaknah ging sialsial non panta uhi.

Hucih hunlai in zaukhung lam leh Dakmual kikal a vatlouh gam kihoi phei ah, Giit-ta pii khat in bu nei in, huai ah anoute khoi hi. Giit-ta icih vasa neucik hi a, ahompi a lengin neek zong uhi.

Nikhat, nidanga ahih ngeina bang un huai Giit-ta te neek zong ding in kuan khia ua. Tua Giit-ta nupi, a noute enkollai zong peih ngelkei mahleh, a noute akhualna in, Giit-ta honpi neekzong dia kuankhiate lakah va tel tei hi. Anoute laka a ann niampen in a neekngeingei neek gige cimtakta a, ann a neek ginatlouhna Giit-ta hun sim dan in sot kuam hita hi. Huaiziakin, zaudang a neek va zong a, a noute adinga aci tuam deuh neek ding hon puak lung-gulh hi. Huai ziakin, ‘ka om nuam ngel kei veh’ ci komkom in zau dang a neek zong ding in kuan khia hi.

Huai Giit-ta te asang asing a sim pha ua, tunglam huih khua ah leeng dim motmot ua, singkung a boh ciang un singhiangte kui ngiuungiau ua, a giit-ta rong la in, vawm depdup zou hial hi. A honpi in leng uh a, khat vei leh tung lamah, khat vei leh nuailam ah leng uh a, aleenna nuai uah ni liah zou phial uhi.

Hucih hunlai in huai Giit-ta honpite – loukuan leh gamvakte kigaak-khomna, ‘Khawlmun’ kici tung ah hong leng kha uh a. Huai a leenna nuai ua ‘Khawlmun’ ah pasal naupang khat, gophel leh sailung bangzah hiam toh na om hi. Huai Giit-ta leng zuazuate, ngiimpen leh tup pen zong neituamlou in tua pasal naupang in a gophel in kaptou mok hi. Ni danga vasa kap kha thei ngeilou khat in tua Giit-ta lengte lak a khat kap khe zenzen hi. Huai a Giit-ta kap khiak khak - huai Giit-ta nupi anoute enkol a, khoitu tak na hi kha hi.

Huai Giit-ta asang asing a simte lak a hiai Giit-ta nupi – ata neucikcik enkol lai bangziak a huai sailung in kap kha khelkhel ahi ding? Hiai Giit-ta nupi in thil hihkhelh aneih ziak a athilhihkhelh gu thuak ahi diam? Ama khelhna hia ahih kei leh api leh pute khelhna gu? Hiai Giit-ta nupi akim leh kiang a om Giit-ta dangte sanga khial zaw ahi diam? Ahih keileh, khovel a thudik avai homna omlou a, khelh leh dik thu leng hilou a, a vangtah tungtungtu suk mai ahi diam? Dikna leh felna in tu leh tunung adingin phattuamna anei diam aw?

Hiai Giit-ta nupi a innveng Giit-tate sangin khial zo tuanlou a, huci banga thil hoihlou hih ding in zong hun neilou a, ahangsanna leh pilna in leng cinlou a, kisi khop tak a hing khe nimnem khat hi. Huai ziakin, gitlouh ziak leh khelh ziak a got ding hileh amah penpen bang mah ahoih lam hi’n aselam hileh kuamah phakzohna neilou pentak, got biik na’ng omlou a. Tuaci mah bangin, kipahman leng bang lam peuh ah phulou hial hi. Bang lampeuh ah enta le hang, hiai Giit-ta nupi in hin na’ng ding ziak nei a, anoute abu sung pan a kam vak ngailai uh a, amau a neek zong thei nailou uhi. Himahleh, huai sailung haileen khat ziakin ahinna laaksak in om hi.

Hiai Giit-ta nupi kiangnai a leeng, a khaveng uh kizap kha phial a leeng Giit-ta khat enta le hang. Amah sih ziak a tagah ding, meithai ding omlou a. Giit-ta khotang leh a innkuan pihte mahmah in zong aniinluat uh Giit-ta khat ahi a. Huai kia hilou in, amah leh amah leng hin kining tuntun a, khenkhatten ‘a thanopna in cin hileh ki-awklum khinta ding hi’ ci hial uhi. Ahihleh bangziak a huai Giit-ta nupi - anoute vaaklai si a, hiai Giit-ta hin kining ngoihngoih dam ahi ding? Huai Giit-ta nupi si a, huai Giit-ta thulimlou ahin ziak a bang phattuamna om ding ahi ding?

Hiai Giit-ta nupi in athil hihkhelhte ziak a sai-lung a got a om hi’n ngaihsun tale hang. Ahihleh, a noute- amah tung a ki-nga liauliau, zan zek apiangten lah khelhna anei ding uam? Nu te kamvak vasa nou in khelhna lianpi neithei ding in um khang e! Ahihziakin, amau vaktu a pii uh asihziak in athuaktu pen bel hiai Giit-ta noute, apii kam vak a awmte hilou theilou uhi. Huai Giit-ta nupi akhelhna ziak a got hita leh, amah got ziak a anou poikhoihlouten thuak ding ahi cih suut tellouh ahi diam? Anoute thuakna ding ngaihtuahlou a apii uh gottu hehpihna adim leh thudik - thutang a vaihom ici thei diam?

Nitaklam hong hi a, Giita-ta nou dangte piite tung diamdiam ua, himahleh amau pii zaw hongtung thei mahmah lou hi. Tua Giit-ta noute gilkial dangtakin abu sung uah a pii uh tun kal ngaaklah takin na ngaak ua. Amit uh zong hakzou nonlou a, singteh keteng a pii uh ann toh hong tung sa in a kam uh nana doh uhi.

A pii uh, amuk a ann hontuah veuvau a hongkik non ding a omlouh zaan a, bang cibang a damkhosuak uhiam cih gen dan tampi om a, “kei panpihziaka dam khosuak uh ahi” azaklouh kal ua aci thei zong huai Taakzang zau a Giit-ta te lak ah ahunkuam om ua. Ahita zongin, huai zaan a daitui a bangtel hiam thei khang maw, gilkial dangtak a bahgop a kamka sa a a ihmut kal ua, akam ua daitui taaklut in dawi-havang kalah damkhosuak sak hi.

A pii uh etkolna nuai a omlai hile uh, a bu sung ua kamvak ding himahle uh, gilkialna in alouhtheihlouh in bingphut a, a kha’ uh zaka huih khua thoh ding in lau pipi leh, a kha’ guhte uh hat nai kei mahleh, gilkialna in ahat hun ding ngakzou nonlou a, a bu sung ua pan hong tom khia in neek zong uhi. Mangkangte’n “ A louhtheihlouh a kiphatmohna hi sinsaktu hoih pen ahi” ci ua. “Ka naupang lolai, ka guh a taak nai kei” ci a suanlam bol amau adingin noptaalna – adinmun un a phakzohlouh noptaalna suak hi.

Alehlam ah, hiai Giit-ta unaute’n, athiltuah uh ziakin, hun manphat dan thei ua, mahni ngaihtuahna, tha-leh-zung zanga mahni khe a din ding ahih dan leh, mahni khe a din theih dan, din siam dan zil khia uhi. Gintaklouhpi a a pii un a sihsan phut ziakin - sihna in cikciang a atuang ua vaihom khum ding hiam, cih atheihlouh ahihziak un, sihnung hilou a damlai ngei a ki-it tuah ding ahih dan zong zil sak hi.

Huai ‘Taakzang zau’ a Giit-ta khosa thei polin hong khang khia uhi. Huai a pii uh hong tun theihlouh zan a tua Giit-ta unau te thawm za khate’n alungsim uah kisuanlahna nei velvul ua, tua Giit-ta uanute vangpha in koih thei mahmahlou uhi. Himahleh, huai zaan- a pii uh sihsan zaan theikhalou a tuni a adinmun uh kia mukhaten bel Giit-ta unaute vangpha ci uhi. Huai Taakzang zau a tanu nei Giit-ta innkuan, ‘kei ka hi’ kici deuhten, tua Giit-ta unaute, miimtang, taangtang khawl in zawl den uhi, zong kici hi!

Hiai Giit-ta unaute a pii un dampih den hileh a pii uh tunga kipum ngak in tua atunna tan uh tung zoulou ding uhi, aci pol om ua. Ahihziakin, tua atunna tan uh atun theih na’ng ua, a pii un lungphon huai leh, mulkim huai tak a anotsiat - tua adinmun uh atun na’ng ua a man apiak uh, man tamlua deuh hilou ding hia? Tua Giit-ta unaute vangsia uh ahi diam, ahihkei leh, vangpha???

Banteng hileh, hun a pai ngei in pai zel a, huai lou zau a lou neitute’n ‘buhtuh’, ‘buh-hamkhoh’, ‘a thual non’ leh ‘lou-phuai’ zouta ua, buh min hun ding ngak uhi. Lou lai a, tangmai guiten a dam hunsung ding ua Siamtu sehsa zangzouta ua, khovel mangpha khak kom in vuai ningniang geuh uhi. Tangmai muat gim in hunkhat beita hi, cih hon theisak a. Himahleh, huai tangmai muat-ten a muatna mun ua, a tang/ tangmai tang a notsiat te na muh ciangin, ‘hon nose denlou a, hun thak leh ni thak a asik-leh-tang ding hon not siat hi’, cih na lungsim ah hong lang a, lungmuanna leh kinepna thak hon guam hi.

Lengthe ten leng hiai hun ding ngak uh hileh kilom in, a kibukna mun ua pan hong pot in Zogam hon awi non panta ua. Phavang nitum kuan, tumlam kawlmong ah eng singseng hi. Nitak khua hong mial a, zan hong sot ciang in; electric vak in a polh/hel daa louh, Kha vak ciiktak leh taksa tak nuai ah, Guiter gui kimlou tumkom a, “Ngaih aw kei a kia na hi…’ ci a lasa zak ding leng om hi.

Lou a buhte hong vui panta ua, buh vui-te min nailou a a tuipum ciang un, huai buh tuipumte tawp dingin, Giit-ta te ahonpi in vanlaizol ah, ham zoizoi kom in leng noinoi ua. Lou neitute’n a lou ua buh tuipumte, Giit-ta in a tawp siat veklouh na’ng in, Giit-tate lauh ding in ‘kilong’ khai ua, kilong akaih ging uhleh, Giit-ta hawl a kikou thawm sun nitum in kiza den hi.

Tua Giit-ta honpi, hiai Giit-ta unaute’n makaih uhi, kici hi.

INVICTUS

Zanmial in palbang hon nang zong in,
Kei din khim khua zing zong leh,
Pasian lungzai tungah nuam zel ning
Simsing bang gil lungtang ka neih vang in..

Lung ngaih lum-mei nuai’h ka hei zong’n
Ka vui lou a, naubang ka kaplou e.
Ka kung tungah vaanpi acim zong in,
Ka lu sisan akai zong, lau in akunlou e.

Hih laakmei luankhi leh hehna khen ah
Vangsel in haibang hon ngak ahi zong in,
Lungzin tuan a sawt mazap ka hi zong,
Lungdong tongkhong in ka donlou e.

Ka nun tuanglam kocik’n zong leh,
Pampaihna in hon ngak ahi zongin,
Ka vang keimah thuthu hi e,
Ka nuntakna boltu kei mah hi ing.

(Pu Williams Earnest Henley kianga kisuanglah taka ngaihdam ngen kom in)

DOKDAWN

"Dokdawn, Dokdawn koi a hoh ding?”
“Gun gaal ah.”
“Na tung zou dia hia?”
“Kileh lai ding ci kei voi.”

Dokdawn kua hi hiam?:
Zogam a teng a, khua-leh-tui hihna neite lakah Dokdawn suan huai penlou a. A mel ngaihbaang in vouna tuam neilou a, a siamna leh ganhing dangte sanga tungnunna leng neilou hi. Khuangbai bang in lasak siamlou a, zolengthe banga khuansiam in Zomite lungzuan kaithou in, thu leh la lam ah zong zolenghe mun luahzou deksuailou hi. Tangtel bangin lei hoih bol in Zomite hinna khoih khalou a, vahui bangin itna leh kinuam tuamna genna in leng kizang ngeilou a, Dokdawn hinkhua paunaak leh thugiil in zong kizang ngeilou hi.

Dokdawn, dokdawn koi a hoh ding?:
A hun leh amun athei om nonlou ua. Ahihziakin, Zogam a ‘Gun gaal leh lam pang khat’ ahi cih bel ciang hi. Tupna nei a, manohna tumta neite a gaal apanin zong theihtheih a, akal suan, khohei dan leh a mitmei suan un zong gen nei hi. Huaiziak takin, akim leh pam a omte ngaihsak loh a, a theih phak un om hi. “Dokdawn koi a hoh dek hiam?” cih houlimna pen hia, huaiziak takin a hawkdaak deuhte’n “ Dokdawn, Dokdawn koi a hoh ding?” ci in dong mah uhi.

Gun gaal ah:
A omna pan in Gun gaal ngaih tuah a. A lungsim mitkha in gaal lehlam mui ciiiciai in mu hi. A tup leh giim teng Gul gaal atun ciang ahih ding bol dingin koiha. Huai a lam-et leh lung-gulh gige gam atun ciang in huai ah a duh leh deih teng bukim dingin ngaihtuah hi. Zo huih khi nung hiauhiauten Gun gaal a ngaihna zual sak ua.

“Khiaklah lungtup anglai pai bang pom ing
Anglai pai bang pom ing e, ka lungtup
Deih lungtupin duang tham gubang nong zen e,
Duangtham gubang nong zen a maw,
Vangsel thaitong bang kahloh ngawng ing.

Khiaklah lungtup aw na laukha paibang kop ing
Na laukha pai bang kop ing
Lunga ka deih lungtup aw
Na vanglian sialsial ing a maw
Na sakmel lomnou dawn cim lang e.

Khiaklah lungtup siktui dawn ing e
Lungtup siktui dawn ing a maw
Luai nau bang oi oi veng e
Luai naubang oi oi ing
Sian nun ka zil zawng in
Leimi nun pai bang kop ing e”,
ciin Dokdawn in atup gildan la in sa hi.

Bang ziak a Dokdawn tuni khelkhel a Gun gaal a khual zin dinga kisa khia a, bang vahih ding hiam cih theih zong kul penlou a. Amah ngaih a zinpoi moh hi ding hi, cih I theih leh hun hi.

Na tungzou dia hia?:
Gun gaal a zin ding a, a tha-leh-zung leh ahatna in mite muh in ciin penlou a. Mite’n Gun gaal atun zawh gingtalou ua, hun paisa a ahihna in atunung hun dinga a lohcin leh lohsap ding ah thupukna na bol mokmok uhi. Hun paisa poimoh a, ahihziakin hun paisa ah kuamah kileh kik theilou a. Huaimah bangin lamdangthei hinna neite kikhek lamdang in ahinkhua lamsuk lamtou a apaina uah ‘ Damaska kho kiang ah vakin sun pai in’ hun thak ni thak ah kilamdana lian tak nei thei uhi, cih Dokdawn in haihlou hial hi. Himahleh, mite’n um zoulou uhi. Huaiziaktakin, ginglelhna toh “Na tung zou takpi dia hia?” ci in dong heihai uhi.

Ahihziakin, aman’ tupna leh utna nei a, Gun gaal lung-gulh den hi. A tupna in a khohei thoveng sak a, a lungsim ah singbul mei a kang mit theilou - huih nung neukha in a seem khak ciang a khuu non a, mei aam muh thamlouh apan hong kuang suah zel mah bangin, a utna lungtup phelh vuallouh in suak khe zel hi. A tupna mun, Gun gaal tung dinga lampi a atuah ding hatsatna tampiten amah lungke sak tuanlou ua, huai atuah ding haksatnaten amah ah tup guhna pe zaw a. Amah lungsim ah ‘haksa’ cih thumal omlou a, ‘couna’ cih bel om hi. A mel-et banglou takin ‘couna’ apan a tai sia maimai ding Dokdawn in piang khalou hi.

Kileh lai ding ci kei voi :
Dokdawn in lamdanna tak khat nei a.Mite ngaihdan in pailou a, amah in ngaihdan mulmal tak nei a. Mi’n bang teng gen mahle uh, aman amah hihna kitheician a. Mi hingten mit a amuh uleh agintak thu un ngaihdan kibol tom ua, apoimohpen asunga om muphalou uhi. A gaal apan na en a, mahni ngaihdan diklou tak leh thupukna diklou na bolten atheihphaklouh uh, amah Dokdawn sung-gil ah om hi.

Mangkangte’n “Tupna a om leh lampi om” acih bang un, atupna in guntui tung ah lei doh dinga, amah leh amah akimuan ngamna in huai lei kidoh kal suan kiptak toh zui ding a, a lung-gulhna in huai lei kidoh ah letsan kiptak bol dinga, huai len in atup leh a gim gige lui gaal lehlam tung ngei ding hi, cih zong ginlelh huai lou hi.

Huai ziakin, Gun gaal tun zoh maimai in Dokdawn alungkimlou a, kileh kik vetvet tum zomah lai hi.