BUANG NUN NUAM

Amah khawpi ah teng a, solkal office khatah officer in tu a, ‘DDO’ achihte uh hi. Kha khatin cheng sing nih leh singthum kikal vel lawh a. A kha khat lawh tam vevu kei mahleh, a innkuan khawsak dan uh i et chiangin, a khalawh ki ning ching mahmah a muh theihin awm hi. Khawtang leh saptuam adingin kipezo mahmah a, khawtang heutu tuamtuamte leh saptuam a a seppih upate ban ah, tuailaite su kipak thei mahmah hi.

A veng ua dinga aneizopen pawl ahih chiangin a inn committee tuamtuamten office dingin zang uh a, lengla te leh hichi bang a committee tuamtuamte singpi limtak tawh navak gige thei uhi. A tate vaigam ah Publc School ah laizil in awm vek uh a. Huai banin, Upa Buangpu in gam mial vei mahmah a , amau innkuan kia in Missionary sagih bang vak uhi.

Upa Buangpu in Pathian thu agenchiangin Pathian itna leh Pathian ngaihdam hat dan lampang mahmah gen nuamsa a, gen chimthei ngeilo hi. A genzawng alunglutna lam ahi bawk a, siam mahmah hi. Numei pawl bangin a thu gen nethei mahmah ua, kipahpihthei mahmah uhi. Thumna aneih chiangin Numei pawl heutute - atawpna a Amen chih ging ngaihpen hih kituh uh hileh kilawm in ‘ Amen’ achih thawm uh hoih thei mahmah hi. Upa Buangpu agen chiang un ‘Buang nunnuam’ chi hial uh hi. Pulpit apan “Pathian itna.....” aw ling palhpalh achi a, a rawmawl a a mit anul chiangin – Upa pa’n bang gen tuma, banga aban hawn sun zawmding hiam chih thei kei mah le uh, numei te kikah huan uh a; huai tukverh kianga piteektu banghoh khem theih mahmahlo a, kidiik den hi.

Kum khat thupi “ Diktatna in nam atawisang” chih a gen chiangin ‘Diktatna kichi bang ahia?’ chi in mipite dawng heihai phawt a. Bible in “ Ka mi diktat tuh ginna in ahing ding, chi ahi” chiin amahmah in dawng zel hi. “Huai ziakin” chi hi, "Ginna ineih leh Pathian in ka mi diktat hawn chimai ahi’ chiin; niteng hinkhua, neekzawnna, solkal nnasepna leh innsak innkhang tawh ki unauna lampang a diktatna ngailo hi, chi chiah silo in, lah huchi bang a khiak-leh-ngaih theih dingin siamtakin genkhe thei hi. “Bible ah ‘Diktat law zezen ken’ chi leng kigelh ei ve,” chi’n kuamah muh ngeinailoh suangmantam khuk mu khia bang mai in gen hi. ‘ Diktat hunlel’ leh ‘Diktat luat zezen’ kikal gamgi bawltu dinga Pathian belseh bangin ki ngaihsun a, ama thutawp bawlpeuh Pathian in ‘Amen’ chia, alu sing-ngeuhngeuh dingin um tinten hi.

Upa Buangpu thugen azak chiang un mitampite a lungsim guk ua mahni mawh akisaknate uh leh siangtholo a akitheihnate uh, tap-pho nisa in vukbeu ahai a, zulmang bang mai in zulmang a, alungsim uh thawveng a, Pa Buang mahmah pakta uhi. Pa Buang thugen azak chiang un mipi vantangte kia hilo in, huai pulpit kianga pheitutte laka tampite , a sia-leh-pha-theihna puakgikte uh Pa Buang khabe sep in sep khia a, sep manga, alungsim puakgikte uh tukmangta uhi.

Upa Buangpu zi numeite lakah aheutu pawl mahmah hi a, a inn uah numei pawlten kipawlh khawmnate nei in, ‘Komichi’ te samin nuam takin hunzang sek uhi. Pa Buang zi in alawite kiangah, “ Naute asum zangthei ding hawng awm uhleh Ama’n ka thumnate uh hawn dawnga, a sumtamna leh a ‘side’ tamna a ka innteekpa uh hawn koihto zel a”, chih gen ning theilo hi. “ A Sappa bang un le ka Pa uh nnasep siam sa lua ei ve!” chi hi. “ Solkal nna khawng zaw a sep a sep gutgut ding le hilo a, a sep dan khat awm hi ve aw!” Pa Buang zi, a Solkal nnasemlo penin chi hi. A Dorcas pihten athugen theitaktak kei mah le uh, Pa Buangzi ahih buang chiangin, amau Buhtei in a batphakloh leh a hawlhphak loh tan Pa Buang zi Buhtei in hawlhpha ngei dinga gingta uh ahih chiang un, gen tam ngailo in athugen pawm thlap uhi. “Kipah thu gengen ding hi mai”, chiin kithukim uhi.

Jentelte lak a A thutangko pih dinga Pathian in Paula a belseh mah bangin, Minister leh U Lian te, abiiktak a, amah sumkhoihtu a koihtheite kianga ‘thu nnasem’ ding a Siamtu in abelseh hiin Pa Buang ki ngaihsun hi. Huaiziakin, a awmna veng bialtu MLA - Minister a laaklut ahih tengin Keltal pianhoih mahmah Minister Bungalow ah vakai lutin, Karmel tang a vuahzuk ding ngen a thumna nei, siampi 450 te sang a chitak zaw deuhin vualzawlna va ngetsak theizel hi.

Pa Buangin khovel ah Pathian thulo a bang mah awmlo hi chih pawmkip hi. Huaiziakin, Pathian in lemsa kei leh tua a ‘sum tamna’ a awmlo ding hi chih leng apawm siam dan hi. Bang ziaka a sumtamna, a ‘side’ tamna a Pathianin kei, Buangpu hawn koih ahi ding chih kidawng zel hi. Upa Buangpu pen tuikulh gam, gamlapi a amah kia a teng hilo hi. Muk niinpu, mukniinpute lak a teng hi zaw hi. Huaiziakin, Pa Buang in atenna gam, a awmna khawtang hinkhua leh mipi ngaihsaan zawngte zahtaak in amihinna thunun in, akhawvel muhdan leh aduhthusamte bawllo theilo hi. Tua hangin, ‘sumtamna a’ a awm sungteng adinmun aphatuam thei pen azat tum a, thihihkhial in zawng kingailo a, A vualzawlna zangsiam hiin kingaihtuah hi. Hiaimun – a sumtamna - a khoihtu in ‘chance’ pia hiin kithei a, alawktheipen dia adinmun zatphat tuam ‘mipil leh nnasep siam hihna’ in ngai hi. “ Mi hihdanlo lah hi mai zenlo a” chihin Pa Buang hinkhua makhaih a, tua thu vual khat pen amah adingin khawvel a ging kilawmpen leh thuvual lopi pen hiin ngaihsun hi.

Pa Buangin atate neulai in Bible a Joseph tangthu hilh zel hi. Joseph bang a naupang hoih hi dingin atate thuhilh sek hi. Ahihziakin, hiai Joseph tangthu in ahawnhilh nawp-pen a biktakin, Joseph Potipher inn apan suangkulh ataanna ziak - mahni mawhpuakna a ginawmna, kepsak a i awm thilte kep bitna ahi chih Pa Buang in manglam ah zawng na man khalo hi. Ataten ‘Danial Humpinelkai Kulhah’ chih tangthute zak nuamsa mahmah ua, nitaak tengin amah aman kei leh azi in hilh zel hi. Ahihziakin, hiai tangthu a alaimu penpen, bangziak a Danial humpinelkai kulh a khiak aawm hiam chihlam pang ngaihtuah kha ngeilo uhi.

Abul apat sutta le hang: Nidanglai in Juda tangval khat Daniel kichi awm a. Babulon gamah salin tang a. Babulon kumpi in Danial leh alawmte laizil sak uhi. Daniel, nitenga abiak a Pathian panpihna in huai hunlai a pilna siamte ah kumpi theih tuam ding khawp in pilin siam a. Babulon kumpi nuaiah Solkal nna lianpi khat sema. Huchih hunlaiin hiai lalgam ah kumpi Daria hawnglal a, hiai kumpi Daria in Danial deihsak zaw diak hi.

Kumpi Daria in agam vaihawm awlsam zawkna ding ngaihtuahna in a gam sung enkawltu ding mi za leh sawmnih tel khia a, huaite tung a vaihawmtu dingin, heutu lian thum khoih nawn hi. Tua heutu lian thumte lakah Danial akhatna hia, apil leh siam ziakin kumpi Daria in Danial gam pumpi tung a koih tum hi. Danial pen Babulon gam a suak leh sal nam apan ahih chiangin bang chi tukin pilin siam mah leh alian penpen a a awm ding, hiai gam khua leh tui diktak a kithei anuai a miten pawm theilo uhi. Huai ziakin Danial kumpi pa kiang a heksiat a suk siat na’ng zawng uh a.

“....himahleh thupatna ding ( ahek theihna ding uh) bangmah amu thei kei ua, diklouhna leng; amah lah mi ginom a hia; diklouhna hiam, khelhna hiam muh a om louh ziakin (...they could find no ground of accusation or evidence of corruption...Berkeley Version). Huchiin hiai miten, hiai Danial demna ding bangmah himhim i mu kei ding; a Pathian dan tungtang a amah demna i muh kei ngal leh, achi ua.” A Pathian biak dan apanin amah mawhpaih na ding hawn zawng ua, Danial solkal nnasepna leh neekzawnna ah demna ding amelmaten muzo mahmahlo ua, huaiziakin nitenga Jerusalem lam nga a Pathian kianga thumna aneih pan sanin Danial mawhpaih a hawng awm in humpi nelkai kulha paih a hawng awm hi.

Juda tangvalno, Joseph in hichi bang a ngaihtuah in “Ka pu Potipher zi et lah huai a, amah kiphal mai hilo a lum khawm dia hawn zawnzawn a, ka pu Potipher khualzinkal hi a - kapu inlah hawn mulo ding a, piching leh piching kithutuahna/ ’sex between consenting adults’ bang apawi zen zen dia, Pathian in lemsa kei leh bang dia hiai bang hun lemchang hawn pe ding!” chiin ki siamtan taleh khawvel in a gah alawh ding ngaihtuah mah dih! Joseph in amah leh amah siam kitanin lampam na sik-khial taleh kialkum, kum sagih in Aigupta lalgam sungah mihing bangzah atam gilkial in a mangthang dia, puktawkna ding mun neilo Jakob innkuante kialkum, kum 7 sungin Kanan ah a dam khawsuakzo mah ding uam aw? Jakob innkuante dam khawsuak kei taleh, Juda nam awmlo ding a. Juda nam awm kei taleh Toupa Jesu hawng pianglo ding a.

Tangvalno khat deihtelna leh thupukna in khawvel khang tangthu, khawvel leh van gam tanpha naak khoih khak hina mai zen e!! Nang leh kei, leh Pa Buang deihteelnaten hiai minam, hiai gam leh hiai minam tu nung khangtangthu ding leh akhalam dinmun ding tanpha bawlhoih in bawlhoihlo thei hi.
-by G.Khamkhokam
Zogam ooooooValueooooooSystem