UPA BUANGPU LEH KEI – I

A lungsim kamtu khat awm hiin kilang a. Nidang bangin amaitailo hi. A chang in a dek khuat a, achangin anungzang thak hileh kilawmin kihei kihei hi. Huchi banga a awmhun chiangin, dai dide a amah zia ngak hoih pen hi chih amah Upa Buangpu tawh kumhiai zah kaki thuahna ua pan ka zil khiak zillai pawimawh khat hi.

Huchih laitakin a cell phone hawng ging a, kawi a panhiam chih thei kei mah leng, ‘Ha lo’ achih tuantuan danin gamla kuamtak apan ahopihtu khat awm hiin ka thei mai hi. Cell phone apan ahopihtu gen hoihtakin ngai khia a, himahleh a melput dan leh achezia apat phone a athuzak a kipahpihlam hilo hi chih chiang mai hi. Tuni a a zingthawh fuhlo hia, ahihkeikeh, a thu zak hoihlo himhim chih bel ka thei khezo kei hi.
‘
Bang hang a ken Vai Dangka thawh laizang ding?’ sosang deuh mai in chi hi. A kama kuva haizansa in Gari bang theh phungkhawpin kiko khia hi. Phone leh lam pang a pautu kahihloh ziakin, ‘Khawvak , Nipi leh Khapi’ kiangah kipahthu ka lungsimin ka gen siausiau hi. Lawmte khatin, ‘ Upa pa’n kha atan chiangin akiangnai ah na Pathianni puan silhin awm ken, na puan teng kuva a san gawp ding hi’ chih deihsaktak a hawn hilh ka phawk khia hi.
‘
Beh beh chi rigawt kenla, a tup leh ngiim in hawn heel ve , abilh-a-tholo nawnsa ahia? Hai nileng ka hi kei. Sakhi -sazuk man leng , saliang-sabak bel ka beh ka phung khawl mah ning. Ahita hal a, gamvai hawmna, mipi sik-leh-tang a sawl ding behbeh chih ringawt a teel ding, support ding nasa ua hia? Gam adia a tup-leh ngiimte ahoih a, tua bang semkhe thei ding mihing ahihleh, ka beh leh phung khello leng sum-leh-pai in pan pihin,ka vote zawng pe mah ning . Kua heel kua chial zawng ngai keng’ chi khe phei lawilawi hi.

‘ Behte support ding a mitengin hawn gingta thotho ding chihin aselamin Bawngtal gawh ding bangin kisuk zuih duanduan gige nawn kei le hi mai. Heutu ding-mipi sik-leh-tang a ding diing; a hoih, achiin leh siam in zawng unla, inn dawngta bawl in bawlnawn kei le uteh hi mai’, chi hi. Kua tawh kiho uh hiam chih thei kei mah leng, athu gen uh hi dia ka gintak bel awm hi.
‘......ka thei aka, gen-gen le ngai leng kasa kei. Tua na chiindan ua bel Vai Dangka tam bei ding mah ei vawi. Ki teel chiang a vasa no gilkial mah bang a, aleh lam aleh lam a dawh sohsoh uchin ua, ki teel zawh chiang a na sik-leh-tang ding ua na teel ua, nasawlte un ‘man a leisa nahi uh, no a zawng hi kei uteh’ hawn chi uh ei ta ve, mipi tung leh gam-leh-nam tungah leiba zawng nei nawn kei uh’, chi suk lai hi.

‘ Huai ei vawi ka gen gen na theita hia? Heutu ding lampam singsat a sat uchin ua, nap nul banga nul puat ringawt uchin ua. Heutu ding ateehna lo ding a teh uchin ua, a quali’ lo ding quali’ sak uchin ua. A siamna - pilna uh leh Sakhi ngal a tuivunglo ei vawi. Khenkhat pian ken BA zawng neilo, mengmuhna(vision) zawng neilo, khawlak singpi dawr a tutu a mivantang ngaihtuahna tan lengpha zolo ding khawng heutu dia teel uchin ua. Singpi dawr a ‘Huai hawn chih uleh ‘huchih’ le hi mai’ chi maimai ding khawng heutu na nei ua........... Politics ichih ‘the art of possibility’ hi a, problem sukvai veng theih possility hi a, heutu hoihteehna hoihpen bel - ase tawp khawk pumpelh thei dia problem solve theih ei vawi. Na heutu khenkhatte uhlah, La-gau sing a lamlian kiang khawng a bungvelvul uh hilo uhi a?” chihin a ban zawm hi.

‘Khenkhat lah, namdangte kianga ‘ka heutu uh, ka ai-awh uh ahi’ chih ding zawng zahtat huai ngoihngoih, chair a atut chiang ua zawng kitaw -tah ding mah bang gige, hunbi nih leh thum bang teel ching a awm zaw mah. Midangte ai-awhte tua ‘tutsa a kitawtahte’ dinmun a ahawng awm chiang ua, mi ai-awhte zaw tutsa akitawtah dek suailo ua, a kolom khetbuk ua sial-ek den dalh mah bang a hawn khen dalh dek uh ei vawi’ chi khe phuaphua hi. ‘Nidang a na lozau hawmdan teng uh, number thak vuah a, lo dawk khalo dia naval theih na’ng ua lo hawmdan suklamdang vek tum uh ei vawi’, chilai hi. ‘A semtu ding dinmun adin chiang alah, sep ding bawl ding phawk mawngmawnglo, lungsim ngaihtuahna in leng ban mahmahlo, mi’n ahawn sep chiang alah ‘temlo in ka ngawng uh tan uh e,tua ten ah’ chia aliamna ma kilak tuah den’, chi hi. Upa pa’n bang thu bang la gen hiam chih thei kei mah leng, a lawpna’ng a ‘Ngainu Tea Hotel’ a singpi ki khilai na’ng bel awm tuaklo hi.

‘ Huai le genlai ding kei ve!’ chi lailai hi. ‘.....huai tak ei vawi, tulai ate bel mipi heutu hi nawnlo ua, ‘gam-leh-nam Theka a latu’ ei ve ua awi. A lalsung nana ua, mipite hamphat na’ng leh gam puah na’nga hawngpai peuhpeuh na contract uh ei vawi. Sapi banga ‘mual a atuah mual a ne, guam a atuah, guam a ne’ ding heutu khawng na khawi khawi sung teng uh huchi ding mah nei ve uah. A taktak a paak tui buaktu ding awm silo a, pak bil abah ding awmlo chi a vuivui apha pen dia hia? Kua in na ai uh awh a, kua nasik leh tang ua pau ding chih tanpha na thei ua hia? Akno hawn api Musi in alaksaksa bang mai a belh ding enkawltu ding neilo na hi kei ua hia? Chi khe lualua hi. Pa Buang in amah banglo takin “ Huchi ding zaw hilo hi vaw’ beidawng takin chi hi. Beidawnna leh Upa Buangpu khawvela thil kituaklo penpente lak a khat hi.

A kiang a ka awmlam zawng phawk nawnlo in ‘Mi tawmchik , aki gen sia ding zawng awmlo chih lum-leh-phaw a zang a, mi’n thudik agen ding kidal kidal le, ahihna tak genloh sakloh a awm den dia, awlmawh huai ahihlam zawng kuan theita ding? Anatna pentak itheih keileh bang chi suk dam ding? Na khuak lungin aneek lam na theih kei a, ‘kawlphe damdawi’ na neek in na dam dia hia? ‘Aki gensia ding awmlo’ ichih ichihna lamin, thokang khuak zah nei khawng in hawn pipi le uh bang suak ding? Public debate nei theite mahin masawn ua, mipiten a right uh awareness nei ua, politics edu’ hoihtak aka hia. Mipi mawl luaten heutu mawl bawk tel ua. Public debate lahneilo a, Sumkuang bang a mahni shell sungpan khawvel igal-et sung teng vual kipha ngei kenteh, ’ ngaih zaw sem in a phone ah chi hi.

“ Hi mah tham e” chih tawh thuahin kei hawn ngawhbawl hileh kilawmin hawn en phei a. “A semlaiten lah a phatuam thamdia ngaihsaklo; asem nawnlo-pensionerten lah bangmah ngaihsaklo ua, asih hun ding uh vawkpi daileng ngaktak a na ngak gouh ua” chi hi. Upa pa’n huai agenleh pensioner khat ki puanna anuai abang ka lungsimin hawng lang hi:

I get up each morning, dust off my wits,
Pick up the paper and read the obits.
If my name is missing, I know I’m not dead
So I eat a good breakfast-and go back to bed.

Phone a akihopihpa’n bang gen hiam chih za kei mah leng Pa Buang in phone a “ Hi tham e, politician te lah hi chi,a ‘cian lote lah hi chi,” achih kaza hi. “ Pensioner - nam leh gam vei taktak, vote deih ziak leng hituanlo neite mah tukloh/phakzawhloh gimnam uh ei mah ve. Huchi bang neite nungah phunphun kawmin, ko leng amau muh bang deihtei ichi ichi dia hi mai ” chi a agen chiah za kei mahleng, huchi bang a gen taak –leh- leeng thil lamdang lua hilo ding hi. “Huaichiah, ilak uah namvei – nam awlmawh taktak, intellectual community chih ding tham neilo law zezen hanga. Huaikia leng hilo a, heutu dia hoih, a talent nei leh gin-awmna nei bawksi amihing ding awm mahmahlo ihi ua leng himah e ” chito zel dia gintak leng hi.

Phonea a kiho khit uh leh ki hokhit loh leng theih khawlhloh in, kei lam hawng nga pheiphut in “ Tuikuk Pathian siam zawhloh chih na thei ngei am?” nakpi in hawn chi phei hi. Upa pa kama kuva neng te’n honthehphei phung ua. Ahihziakin, akuva tamzaw valh khin ahih chiang in, ka puan a belh ding bel duhthusam bangin tam nawnlo hi! Pa Buang kam apat Kuva tang nengkhat hawng leng khia in ka neck-tie silk a kibawl mul hawn deng phei hi. Silk khau in thil neng hiptheihna, mangkangten ‘static electricity’ achih uh nei a, tua static electricity in tua kuva tang nana hip hi. Ahihziakin, Upa pa chiltui tawh amah gikna tawh akithuah chiangin ka neck-tie silk khau a static electricity ten tua kuva tang-neng hip taangzolo ua, kipei velvel in chikmah chiang a muh zawhnawnloh dingin anuai ah ke mangta hi!

Coming soon-
UPA BUANGPU LEH KEI-II
(Tuikuk Pathian Siamzawhloh)--------------------------------------------------------------------------------------------------------------------------------