BOOK REVIEW: Pau Leh Lai Gelhdan

“Pau Leh Lai Gelhdan”,
Paite MIL, BSE Manipur,
Gelhtu: Dr. H. Kamkhenthang
Suahkhetu: Paite Literature Society, Lamka.

By- Khamkhokam Guite

1988 kum vel hi’n ka thei a, U Dr Ngul Zadal in Manipur a pawl kua leh sawmte Sinlai Bu “ Zou Lai Gelhdan” kici bu khat hon pia a. Huai hunlai in abul saulou ka sim a, bang ziak hiam in abaan ka sunzom non kei a. Huai nungsang, sim sunzom non kei mahleng, tamlou kasim na a ka sim khak khenkhat ten tuni tan in ka lungsim vut den ua. Sim non ding kacih ciangin, sepna ziak a ka kisuan vialvialna lam ah, a bu ka koihna ka theikhe zou non kei a.

Tutung June, 2009 a Lamka lam ka zinin, Convention Book Room apanin “ Pau Leh Lai Gelhdan” leh “Siamsil Thaikawi”(Paite Rapid Reader) Manipur a Class IX & X te sinlai bu dia kibawl leh “ Graduate Level’ a sinlai bu dia kibawl “ Paite Late Leh Thute” ( An Anthology of Paite Prose and Poetry) cih ka lei a. Huanah, CBA Book Room apanin “ Zomite Khanglui Tangthu” cih leh “The New English Zomi Dictionary”, Dr. Dal Lian Haokip bawl khiak leng ka lei bok hi.

Hiai Manipur a Pawl kua leh pawlsawm sinlai dia kibawl “Pau Leh Lai Gelhdan” bu ka muh leh; 1983 vel a, Engineering College a Final Exam zou ka pai a, Imphal a lawmte kua kua hiam toh, Dr H. Kamkhenthang a office a kava muh ua, ka houlimna uh hon phok khe sak hi. Huai tunga Pa Kamkhenthang kiang a a Magazine bol “ Vaphual” kici a copy ka nget leh “ Ei lak a huci bang Magazine a leitu ding om nailou a, sun zom zou nonlou ka hi uh” ci in hon dawng hi.

Huai tungin, Manipur a Paite MIL a om dek tunglai ahi a, huai thu leng ka gen khom kha ua. Huai a ka houlim na uah bang toh kizom a ka gen hiam cih ka thei non kei a “ Skul a zil laibu in naupang lungsim ah saupi nna sem a…” cih ka gen leh Pa Thang hon dawnna “ Himah tham e, Germante’n khovel galpi nihna a Judate nuai 60 mahmah athah cimihna uh leng, a hong kipatna tak ahihleh, a skul text book uh ahi” ci a hon dawnna tuni tan in ka thei lai hi.

Pa Kamkhenthang gen mah bang in naupang pawl kua, pawl sawm vel ahong hih ciang un, Sapte’n ‘impressionable age’ acih uh - tangvalnou leh nungaknou hong hita ua, asinlai bu un a ngaihtuahna uh - a khovel muhdan uh leh, tunung ciang a mi bangci bang hong hi ding uh hiam cih ah, naakpi tak in atung uah vaihawm thei a. Hiai a ‘Etkikna’ I neih ding leng huci bang a, Paite pau zangte leh pianpih pau a Paite pau zang ta seselou leng hiai Sinlai Bu pawl kua leh pawlsawm MIL dia zil peuhmahte’ hinkhua leh a mizia uah bang cibang khe khap nose ding hiam cih et I ut hi. Mi mal mizia leh minam zia I cihte inn sung, khotang leh zilna mun a kisinsak dan in thu pua a. Huanah, Americate hausakna leh minam bang a athupina uh, biak inn pulpit ua akithuhilhna un gen tampi nei hi, ci uhi.

Pa Kamkhenthang hi amel ka theihma tham apan ka mi ngaihsang mahmah ahi a, skul ka kailai a, skul sinlai bu dia a bawl “Telsuina’ cih ka muh apan ka ngaihsang ahi a. Telsuina/ Science lampang ah vual polzou kei mah leng, naupan’ cil apan na ngaisang mahmah tei ka hi a. Huci bang sinlai bu abawl khiak ciangin, amah na ngai sangin; tunung cianga amah bat, ka neulai in kana tum sek a. Tuni a kahihna leng - amah phazou kei mahleng, amah ka ettawn ziak ahi ka ci ngam hi. Huai kia hilou a, Paite/Tedim pau phungvuhna toh kisai a, Pa Kamkhenthang sepkhiak leh thohkhiak zah - semkhia a, thohkhia zou India uk sungah om nailou ding hi. Huaiziakin, Pa Kamkhenthang hi Paite/Tedim pau zangte a ding a Pathian vualzolna ahi kacilou thei kei hi.

Hiai laibu, first edition 1984 apan 7th revised edition 2007 tan in bu 12,000 kisunta a. Mi’ laibu zatlui zang’ bang zah hiam om ding in ngaihsun tale hang, hiai laibu skul a sin a, hiai laibu in a hinna uh asuk khak naupang 20,000 lamlam om theita ding in sut theih hi. Hiai laibu a bul lama “ Thu Laizeh” kici hi, bang hiam ziak a hiai laibu sung a koih ngai ahihtak leh leng, a bu tawpna lam a koih hoih ding in ka gingta a. Naupangte skul sinlai bu ahi cih mang-ngilh kei le hang hoih ding hi.

Pek 1na, Para tawpna hiai bang in kipan hi, “ Lushei leh Hmar in Paite/Tedim pau a sang in laigelhna ding syllable kipatna laimal tam nei zaw uh hi. Paite/Tedim pau a omlou Hmar, Lushei leh Pawi khawng in a neih tungtuan uh Hl, Hm, Hn, Tl, Thl, At, R, F, Chh ahi. Thumal tawpna laimal zong Paite/Tedim neih sang in hau zaw uh hi”. Hiai Etkikna I neih laibu hi, skul sinlai bu ahi a, pau tuamtuam suutna, pau tuamtuam tehkakna bu hilou hi. Pau tuamtuamten’ amau a lamdan’na nei ciat ua, hiai a kilamdan’ ziak un khat genneu a adang khat gen tungnun’ na’ng a I zat leh hihkhelhna suak thei ding hi. Paite pau I zilna ziak ahihleh, kuate pau hiam a bat ziak hiam, a batlouh ziak hiam hilou in, Paite pau hi ziltaak, kepbit taak pau khat ahih ziak hi zaw hi. Paite MIL neih theih na ding in mipite, heutute leh pawl tuamtuam in naaktak a pan a laak uh hi ding in ka um a. Huaiziakin, Paite MIL a Paite/Tedim pau tuantualna naupangte sinsak a, pau dang khenkhat Paite / Tedim pau sanga a tungnunna uh hi dia I limsiamte zil sak daih na ding a I zat leh vangtah huai mahmah ding hi.

I theihciat mah bang un, khovel a pau tual lengpen English pau in laimal 26 nei a, ahihziakin, ‘aw gin’/’aw phoi’ 44 nei uh hi. Huaiziakin, vowel khenkhat I, E, O, Y cihten a omna uh thumal a zil in ‘ginkhiak dan/ lamkhiak dan’ tuam nei thei uhi. Huanah, a spelling kibang ciatciat zawng a gen, a lehna a tuam dung zui in a lamkhiak dan, simkhiak dan tuam thei hi. English a kammal khat “Set” cih in lehna / gen tuamtuam 146 nei hi citel uhi. Huaiziakin, Pa Kamkhenthang in Pek nihna Para masa a “ Kammal kipatna laimal I pau a a tawmluat man in Lushei leh Hmar pau sang in Paite pau I gelh ciang in laimal kibang a gelh ding tam lua hi. Etsakna : T + A + N+ G ci a gelhtheih I pau ah tampi omsak hi. Tua ahihman in simkhelh theih tampi om hi” acih zawng, thu vaal ahih baan ah, Paite pau Khothang pau leh Lushei pau sang a a niam zawk ziak hi lou a, Paite pau I cih napnul maimai theih hilou a, sin taktak ngai khovel a pau te lak a khat ahi, cihna hi zaw hi.

Tua I gen Para sung mah a, “ America Red Indian pau mawl penpen a a suikhiak uh, basic sound 20 nei a cih uh sang in I Paite / Tedim Pau mawl zaw suak hi” cih ka sim khak leh ka kiguih a. Koisan hiam a conference hiam, ahih keileh, khawmpi lian khat ah na hoh a. Huai khawmpina ah nam mawl penpen Tuikukte hiam, Bawmte hiam puan tokaihte toh a ning khat ah “ Nou loi huai ah vatu khawm un” hon cita le uh bang ngaih dan na nei ding? I sinlai naupangte’n Red Indian te tuma leh tulai dinmun thei law mahmah uh ahi cih thei kawm in, “Red Indian te kuate hiam?” cih en le hang.

Europe gam a Mikangte America gambuppi a alut tung un, huai America gamah ana teng masate ‘Red Indiante na om uh hi. Tua Mikang hongpen lut thakte’n tua na om masa Red Indian kicite thatcimit dek phial ua, a gam uh laksak ua, khovel a nam vangtah penpen te dinmun in ding sak uh hi. Cinema, tangthu leh novel te hi a vualzou lam gelh ahi ua. Huaite ah Red Indian te ase thei pen a lah leh phoukhiak in omsek mah le uh, atung ua Mikangte tatsiatna amau Mikangte lak mahmah a tampite’n zong dipkuat huai sa uh hi. Tuni in Red Indian te manmawl hi ua, gamsa bang in a mau gam sung ngei ah ‘Sanctuary/ Reserved’ sung a khawi in om uh hi. Hiai I laibu uh “ Pau Leh Lai Gelhdan” in, khovel khangthu a namvual-lel leh nam mawl Red Indian te toh Paite pau zangte Ak-bawm khat ah hon khum khawm hi. I tuailai, hiai Paite MIL sinlai bu a zangte lungsim ngaihtuahna leh a minam uh, a pianpih pau uh amuh dan uh bang cituk in a khoih diam cih ngaihtuah tham cing ding in um ing.

Hiai skul Text Book sung ah Paite pau a simmoh huai zawng a ‘lel/ hilel phot hi’ cih a genna om zeuhzeuh a. ‘Zeuhzeuh’ I cih a tam lo lam hi. Huci bang kampau a om hetlouh ding hi. Paite pau sintaak leh ziltaak ahihziak a Paite MIL om hi. Huan ah, Seminar paper hiam hileh kilawm a, a gelhtu in ‘ka muhdan’, ‘ ka hon gelh khia’ cihte zawng om a. Text Book gelhtu scientist minthang, thilmuh suah neite’n zawng a text book gelh ua a thil muhsuah uh a ‘quote’ ciang un, ‘ka’, ‘kei’ cih - a ‘ footnote’ ahlou zang khollou uhi. Huaiziakin, hiai laibu hi acil in Pa Kamkhenthang research paper hiam, ahihkeileh, a seminar paper ahong kipan zong hi mai thei a. Ahihziakin, School Text Book a I zat ciang in phiatsiang a bawl lem ngai om hi in kilang hi.

H.Harimohan Singh kici hi Paite pau siam mahmah a, thazoh mahmah; Paite pau’ a huumsam a man a, ngeibet fokfok thei ding khop a thazoh ahi ngei dia, Paite MIL Text Book ah mun poimoh tak piak in a om a. Bangteng hileh kipah huai ve ve! Hiai Pu Singh gelh bangbang ahih keileh, a hoih zaw deuh tanpha gelh siam, Paite kam pau sung ah om ding in um ing.

Part I a ‘ Zoulai Gelhdan’ kici hi Englishte grammer zang a, Paite pau grammer bolna ahi I ci thei a. English grammer a ‘Parts of Speech’ te zawng kizang tam mahmah hi. Part II Chapter I a H.Harimohan Singh gelh “ Parts of Speech’ in hiai Paite MIL a sunglai tang ding ahih sapsap in tuh, a bul a koih hileh, a kizawm dan dik zaw ding in gintaak huai hi. Aziak ahihleh, ‘Parts of Speech’ naupangte’n atheih cian ciang un, tua Part I – Zoulai Gelhdan zil le uh theih olsam sa zaw ding uhi.

Hiai “Pau Leh Lai Gelhdan” sung ah Part I ‘ Zoulai Gelhdan’ kici, Paite/Tedim pau gelh dik na ding in poimawh mahmah a. Huai ziak in, tulai a pau zilna toh kisai a laibu a bawlte uh toh kibang in, a Etsakna pe tam in, a thu a genthoh hoihthou mahleh, Example leh Exercise lam pang tua sang in uang bawl zaw leh, tua sang in lai gelhdan dik ah hon makaih thei zaw lai ding hi. Tua ‘Zoulai Gelhdan’ leh Dr Tualchin Neihsial bawl “Lai Gelhdan Tangpi’ kici gom khawm le hang, hiai laibu azang tute’n phattuampih in, Paite pau gelh I siam tuan mahmah ding un ka gingta.

Hiai “Pau Leh Lai Gelhdan” cih Text Book toh kisai a bawlphat ngai leh ngaihtuah tham cing a ka theihte anuai a bang ahi uh:
1. Khangthakte’n Paite Pau, Paite Nam akisak theih pih ua: zuun a phungvuh tham, gentheihpih tham, sihpih tham pau leh minam ahi cih a theih cian ding uh hi. Huai ding in hiai lai bu a ‘inferiority complex’ piangsak thei thumal te , self- confidence, self – esteem piang sak thei thu zeek a kheek khiak vek ding hi. Huci ahih kei leh, Paite MIL in ‘ciikpi’ bang a mite bemkawm a tai khualkhual minam hon suak sak ding hi.
2. Paite MIL Text Book tungtang a seminar leh workshop neih zelzel a, et thak gige ding hi. Nidanglai a Greek philosopher Socrates in “ Dotna dawng’ ngeilou minam a dam khosuak kei ding” ci hi. Tuni in eite a ding in leng dik hi. Bible translation hoihloupi kum sawm li phial zang a, pawl kua leh sawm Paite MIL etkik louh a kum sawmthum phial I zat leh, “Tuikuk Pathian siam zohlouh” mah kibang ding hi.
3. Skul Text Book bawl ding in Skul a sem, skulpu a hunsawt tak na semta, naupangte mizia, naupangte lunglutna leh amau hoihna ding theite’ innteekna a bawl deih huai pen ding a, midang te’n ahihleh huci bang in skul text book bawl uh hi. Hiai Paite MIL sinsaktu skulpute leh azangtu sinlai naupangte kiang ah ‘feedback’, suggestion’ leh ‘comment’ laak gige ding hi.
4. Paite MIL kum 25 neita hang a, Paite pau gelh dik lam ah ma I sawn phah uh hia? Ngaihtuah tham cing hi. Ma I sawn tuan kei leh koilai a bawl phat ding om? Paite MIL zil in Paite pau pianpih pau a zanglou te’n, Paite pau a siam phah ding uam? Paite MIL bang ziak a deih I hi ding? Tua Paite MIL I neih un MIL I deihna san uh awng a huu zou hia?
5. Paite MIL, Thadou MIL, Vaiphei leh Zou MIL cihte a kuapeuh in I zil theih leh haksatnapi omlou a, a ut peuh in I laak theih ngen hi uh hi. Hiaiteng lakah, nu-leh-pa te’n Paite MIL mah picing pen, huai zilte mah laisiam pen uh ahi aci thei ding uam? Huai acih theih na ding un pan laak I tum hia? I tup ding uh hi. Tunai in pawlsawm a Paite MIL a ‘question set’ leh ‘answer paper check’ cih vel ah mipi ginkailou a, Zomi sung a MIL dangte ah sinlai naupangte pemkhe tam mahmah a gen hiauhiau om a. Paite MIL laak ngeingei ding ci a kivau a, a la loute ‘Juda Iskariot’ bang a gen ding hi zawlou in, Paite MIL hoihna, picinna leh a quality in sinlaite leh nu-leh-pa te a hiip a, a zoh ding hi. A quality etlah huai a bol silou a, Paite MIL laloute ‘Paite hi ngal a Paite MIL la lou’ kicih ding zawng hilou hi.
6. Paite MIL azat dan I siam leh minam a ding in vangphatna leh dam khosuahna hontun ding a. A poimohna leh ahihnatak man phalou minam I hih leh bel, Paite MIL I neih ‘vokpi mai a suangmanpha paih’ bang ding hi. Hiai I cih in sinlai naupangte gen hilou in picing, a hoih ding thei dia kilom, ahoih bang leng deih ding a I minam in I lam-et, lah, a khut sung uh atun cia suangmanpha zawng leivui suaksakte I gennopna hi.
7. Paite MIL apan bang I lam-en dia cih kidong tale hang, a tam zawte dawnna ding ahihleh, Paite/Tedim pau gelhdan dik ah honpi lut dia, pau hoih hon sinsak dia. Huan ah, a thu tuun hoihte’n naupangte mi hoih, gam leh nam adia mi suantaak ding in hon sek khe ding in I lam-en hi. Kilam-en sang lua I hi diam?
8. A print, layout leh presentation te tua a sang a hoih zaw in bol phat theih lai ding in gintak huai a, edition thak ah ahoih zaw sem muh kilam-en le hang.

Dr H. Kamkhenthang, Paite Literature Society leh I minam sung ua Thu leh La lam a mi suan huaite’n tua I neih sang ua hoih zaw, Paite MIL hon bol khe lai ding in, talent neilua mahmah uh ahi cih, ken tuh khutme cin vom cia in leng ka ginglel ngei himhim kei hi.